ROMNHORÉ 56
ꞌRe pawapto mono rowẽ na datsiré ꞌre dahöimana dzaꞌra mono da datsiꞌrãꞌõtõ ãma
Watsitsãnawã norĩ me, wahöimana dzaꞌra wamhã wa rotsaꞌrata dzaꞌra ni Rotiꞌwa Davi ne: “E niha ĩwẽ, e niha ĩrobdze datsitsãnawã norĩ rowẽ na tsiré ꞌre höimana dzaꞌra mono wamhã.” (Salmo 133:1 TNM) Tadzahã, ãhã rowẽ datsiré dahöimana na hã, taréi õ di. Wahöiba mono bö tsada ꞌre ĩwanhiptete dzaꞌra mono da tsi.
1. E marĩ na, datobꞌudzudzé Jeová nhibꞌaꞌuwẽ norĩ ãma.
Datsiꞌrãꞌõno ꞌmadöꞌö wamhã, Tiꞌai waꞌõtõ höiba amoi ãma, te dza atsima ĩrowẽ damreme aima waihuꞌu õ nherẽ. E marĩ wa. Ropotoꞌwai mreme na, wa te romnhoré dzaꞌra wa, tô romnhorédzém norĩ na Tiꞌai mono bö. Duré wa tsada ꞌre wanhiptete dzaꞌra mono ꞌre watsitsawi petse dzaꞌra mono da. Waro hã aimawi nherẽ, wahöiba mono bö ‘wa ꞌmahörö dzaꞌra ni Jeová nhitsi dzô watsiré ãma ꞌre wawata dzaꞌra mono da.’ — Sofonias 3:9 TNM.
2. E niha te dza ꞌre ĩpawapto mo datsiré rowẽ na ꞌre dahöimana dzaꞌra mono da datsiꞌrãꞌõtõ ãma.
‘Maꞌãpé tô tsena na, aipẽꞌẽ na ꞌre atsitsawi petse dzaꞌra waꞌaba mono.’ (1 Pedro 1:22) E niha ãhã te dza ĩꞌmanha. Marĩ ĩwatsété na tsi dahöimanadzém na rotsaꞌrata upana, rotsaꞌrata uꞌötsi marĩ ĩwẽ norĩ na. Atsine ĩhöimana dzaꞌra norĩ ãma tsi atsiwaihuꞌu da nherẽ, tsada ꞌre atsiptete mono waihuꞌu da atsitsãnawã norĩ atsine ĩhöimana dzaꞌra õ hã. Wa dza duré tsada ꞌre wanhiptete dzaꞌra wa te awamro dzaꞌra da tsiwaꞌru danhimiwẽꞌõꞌdzé wapẽꞌẽ ꞌre. — Tsõré na 1 Pedro 2:17.a
3. E marĩ te dza ĩꞌmanha a hã datsitsãnawãi me atsitsadaꞌöbö aba wamhã.
Rowẽ na watsiré ꞌre wahöimana dzaꞌra mono nherẽ, wahöimana upa dzaꞌra di. Nimahã na hã, wa dza watsiwaiꞌre dzaꞌra ni. Taha wa, Ropotoꞌwai mreme te tinha ‘marĩ na watsina wa te ꞌre upa dzaꞌra mono wamhã, watsiꞌãma wa te ꞌre ꞌmadöꞌö dzaꞌra mono tõ da.’ Te duré tinha: ‘[Jeová hã] aiwatsédé te te oto aiꞌãma ꞌre ĩꞌabꞌmadöꞌö aba mono õ ne, dawatsédé hã daꞌãma ꞌre ꞌmadöꞌö dzaꞌra waꞌaba mono tõ.’ (Tsõré na Colossenses 3:13.) Jeová wa te natsi awaiꞌre uꞌötsi nherẽ, te te waꞌãma ꞌmadöꞌö dzaꞌra õ di. Taha wa, te tsima wẽ watsitsãnawã norĩ ĩwatsété dzaꞌra dzém na hã wa te ãma ꞌmadöꞌö dzaꞌra tõ da. Atsina waihuꞌu wamhã, marĩ na ĩdawaiꞌre na hã tsada ꞌre atsiptete rowẽ na apö dame aihöimana da. — Tsõré na Mateus 5:23, 24.b
WAIHUꞌU DURÉ
Te dza ĩꞌmadö e niha te dza ĩpawapto romharé na duré rowẽ na datsiré ꞌre dahöimana dzaꞌra mono da datsiꞌrãꞌõtõ ãma.
E marĩ te dza ĩꞌmanha romharé höimana uꞌötsi da.
4. Danhimiwẽꞌõ wẽꞌõ na
Wa watsima wẽ dzaꞌra ni wa te ꞌre tsawi dzaꞌra mono da aihĩni watsitsãnawã norĩ. Tadzahã, ãté pire di wa te tsawi dzaꞌra da niꞌwa watsine ĩhöimana õ. E marĩ te dza wapawaptob dzaꞌra. Atsiré tsõré aba Atos 10:34, 35. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Jeová tsimiwẽꞌõ õ di. Te dza tsima wẽ dapoto mono bö ãma ꞌre dawata dzaꞌra mono da. Taha dzarina, e niha ĩrotsaꞌrata da tsi atsine ĩhöimana dzaꞌra õ norĩ ãma.
E mahã danhimiwẽꞌõdzé ĩré hã atsõrõwa ꞌratamhã. E marĩ wa, te atsima ĩwẽ awẽꞌõ da.
Atsiré tsõré aba 2 Coríntios 6:11-13. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha te dza atsina ĩroté watsitsãnawã norĩ atsine ĩhöimana dzaꞌra õ tẽme.
5. Dawatsédé daꞌãma ꞌmadöꞌö tõ aipẽꞌẽ na duré rowẽ na dame aihöimana
Jeová te te ãma upai õ di. Taha wa, niwa wa te ãma ꞌmadöꞌö dzaꞌra õ di dza ĩwatsédé hã. Tane nherẽ, wawatsédé te te natsi waꞌãma ꞌmadöꞌö dzaꞌra õ di. Atsiré tsõré aba Hebreus 8:12. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E marĩ ãhã romnhihödö te rowahutu Jeová dawatsédé te te daꞌãma ĩꞌmadöꞌö õ dzéb ãma hã.
E marĩ wa, te dza ĩhepãrĩ Jeová ma aiwatsédé te te aiꞌãma ꞌmadöꞌö õ wamhã.
E mahã romhöimanadzém norĩ na ãté pire di rowẽ na watsiré wahöimana dzaꞌra da.
E niha wa dza tsidzutsi dzaꞌra ni Jeová watsitsãnawã norĩ tsiré rowẽ na ꞌre wahöimana dzaꞌra mono da. Atsiré tsõré aba Provérbios 19:11. Taha parimhã atsima robdzanhamri aba ãhã dadzadanharĩ ãma piꞌrebamhã:
Niꞌwa te te aiꞌrãi waꞌro wadzere wamhã, e marĩ te dza ĩꞌmanha apö rowẽ da hã.
Nimahã na, marĩ na wa dawaiꞌre dzaꞌra ni. Ãne wamhã, e marĩ, wa te ĩꞌmanharĩ dzaꞌra da tsi. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
Ĩropoto na, e niha wahidiba, ma tsiwatsutu rowẽ na dame höimana da.
6. ꞌRãdzaꞌõtõ marĩ ĩwẽ norĩ na datsitsãnawã norĩ höimanadzém na
Watsitsãnawã norĩ me, natsi wahöimana uꞌötsi dzaꞌra wamhã, wa dza waihuꞌu dzaꞌra ni marĩ ĩwẽ norĩ ĩhöimana dzaꞌra dzém na duré ĩtsibꞌuwa dzaꞌra dzé hã. E niha wa dza waꞌrãdzaꞌõtõ dzaꞌra ni marĩ ĩwẽ norĩ na watsitsãnawã norĩ höimanadzém na. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ te dza aipawapto natsi ꞌmadöꞌö da marĩ ĩwẽ norĩ watsitsãnawã norĩ höimanadzém na.
Jeová te natsi tiꞌrãdzaꞌõtõ marĩ ĩwẽ norĩ na wahöimanadzém na. Atsiré tsõré aba Salmo 14:2. Taha parimhã atsima robdzanhamri aba ãhã dadzadanharĩ ãma piꞌrebamhã:
Jeová te natsi tiꞌrãdzaꞌõtõ marĩ ĩwẽ norĩ na aihöimanadzém na. E niha te aihöiba ãhã waihuꞌu wamhã.
Ẽtẽ waipo ĩwẽ ĩꞌupa ĩré hã. Tane nherẽ, waꞌöbö dzaꞌẽtẽ di. Ãne duré aihĩni watsitsãnawã norĩ höimana upa dzaꞌra nherẽ, waꞌöbö dzaꞌẽtẽ dzaꞌra di Jeová ma.
NIꞌWAM NORĨ TE NHARĨ DZAꞌRA ÃNE: “Dawatsédé te daꞌãma ꞌmadöꞌö õ di dza, ĩ̱ma datsiꞌruiwapari waptsi.”
E marĩ wa, ãne wa te rotsaꞌrata dzaꞌra õ di dza.
ĨWAIHUꞌUDZÉ HÃ
Dawatsédé daꞌãma ꞌmadöꞌö õ wamhã, duré aihĩni watsitsãnawã norĩ ma atsimidzawidzé höiꞌré wamhã, te dza ĩpawapto datsiré rowẽ na dahöimana dzaꞌra mono da datsiꞌrãꞌõtõ ãma.
Ãma aipoꞌre puꞌu
E marĩ te dza ĩꞌmanha danhimiwẽꞌõdzé wẽꞌõ da.
E marĩ te dza ĩꞌmanha datsitsãnawãi me atsitsadaꞌöbö aba wamhã.
E marĩ wa, te atsima ĩwẽ tsidzutsi da Jeová dawatsédé te te daꞌãma ĩꞌmadöꞌö õ dzém na.
TSÔ AIRĨTĨ DURÉ
Jesus ma tô ãma tsimiréꞌé dawatsédé wa te daꞌãma tsaꞌra dzaꞌra tõ da. ꞌMadöꞌö e niha te te ãma ĩtsimiréꞌédzé te dza wapawaptob dzaꞌra.
E wa dza dawi waptẽrẽ dzaꞌra ni da te waꞌruiwapari dzaꞌra tõ da, wanhimiroꞌmadöꞌö na hã wa te upa dzaꞌra õ nherẽ.
ꞌMadöꞌö e niha niꞌwam norĩ ma tô waihuꞌu dzaꞌra danhimiwẽꞌõ ãna dama ꞌre höimana dzaꞌra mono da.
ꞌMadöꞌö e marĩ te dza ĩꞌmanha datsitsãnawãi me rowẽ na aihöimana da apö rowẽ datsiꞌrãꞌõtõ ãma tsiꞌutõrĩ wana ré.
“ꞌWapé na ropire norĩ atsimidzawi na” (Roꞌmadöꞌöꞌwa, maio 2016 na)
a Ãma ĩrowatsuꞌuꞌdzé 6 te ãma rowatsuꞌu e marĩ Jesus dzadawa dzamarĩꞌwa norĩ tinhimidzawi na te te ĩꞌmanharĩ dzaꞌra da tsi dahödzé te te dama ãma ropé dzaꞌra tõ da.
b Ãma ĩrowatsuꞌudzé 7 te ãma rowatsuꞌu e niha wa dza dama wahöimana dzaꞌra ni romhöimanadzé robꞌuipradzém na niwamhã dama ĩpire norĩ nhimirotidzém na höimana wamhã.