Ingoma. Ingoma emnandi yoonyana bakaKora.+ Kumalathisi; mayidlalwe ngeMahalati, iculwe ngokuphendulana. IMaskili kaHeman+ umEzera.
88 Owu Yehova, Thixo wosindiso lwam,+
Emini ndikhalela kuwe,
Nasebusuku ndiza phambi kwakho.+
2 Mawuvakale kuwe umthandazo wam,+
Ndithobele indlebe xa ndikhalela uncedo.+
3 Kuba umphefumlo wam uzaliswe ziintlekele,+
Kwaye ubomi bam busecicini lengcwaba.+
4 Sendibalwa phakathi kwabo behla baye engcwabeni;+
Ndide ndayindoda engakwazi kuzenzela nto,+
5 Sendinikelwe kwabafileyo
Njengomntu obuleweyo olele engcwabeni,
Ongasakhunjulwayo
Nongasaxhaswayo nguwe.
6 Undithe tywa emngxunyeni onzulu,
Kwiindawo ezimnyama, emngxunyeni ongenasiphelo.
7 Buyandoyisa ubushushu bomsindo wakho,+
Yaye undongamele ngamaza akho atshabalalisayo. (Selah)
8 Ubagxothile abo ndibaqhelileyo;+
Undenze ndenyanyeka kubo.
Ndivalelekile ibe andikwazi kuphuncuka.
9 Ilihlo lam lityhufu-tyhufu ngenxa yokuxhwaleka.+
Owu Yehova, ndikhalela kuwe imini yonke;+
Ndizolulela kuwe izandla zam.
10 Uza kubenzela na imimangaliso abo bafileyo?
Bangavuka na ekufeni baze bakudumise?+ (Selah)
11 Kuza kuthethwa ngalo engcwabeni na uthando lwakho olungagungqiyo,
Kuthethwe ngokuthembeka kwakho kwindawo yabo batshabaleleyo?
12 Ngaba imimangaliso yakho iza kwaziwa ebumnyameni,
Okanye ubulungisa bakho kwilizwe lokulibala?+
13 Kodwa ndisakhalela kuwe Yehova, ndicela undincede,+
Ntsasa nganye ndithandaza kuwe.+
14 Owu Yehova, undilahleleni?+
Ubufihleleni ubuso bakho kum?+
15 Oko ndisentlungwini ukususela ebutsheni bam,
Ibe sele ndiza kutshabalala;+
Ndindindisholo ngenxa yezinto ezimbi ozivumeleyo ukuba zindehlele.
16 Umsindo wakho undongamele;+
Uyandinkwantyisa, ibe uyanditshabalalisa.
17 Undirhangqile njengamanzi imini yonke;
Undivingcele macala onke.
18 Ubagxothile abahlobo bam nabo ndibaqhelileyo;+
Ekuphela komhlobo wam ngoku bubumnyama.