Ukukhulisa Iintsapho Ehlabathini Lonke—Ukukhulisa Abantwana Ngothando, Ngengqeqesho, Ngomzekelo, Nangemilinganiselo Yokomoya
ABAZALI abavela kumazwe awahlukahlukeneyo baye bathumela iingxelo ezingokukhulisa abantwana babo ngo- kunempumelelo ukususela ebusaneni ukutyhubela iminyaka yeshumi elivisayo. Bonke bangamaNgqina kaYehova, yaye ke iingxelo zabo zigxininisa imfuneko yengqalelo kwimimandla emine edweliswe kulo mxholo ungasentla. Izicatshulwa eziveliswe apha zibonisa kuphela iinkalo ezimbalwa ezahlukileyo zokuqeqesha intsapho abazilandelayo.
Evela EHawaii
“Njengokuba iBhayibhile isixelela, uthando lolona phawu ‘lukhulu.’ Zonke iinkalo zothando ezixabisekileyo zifanele ziboniswe ekhayeni nasentsatsheni iphela. Mna noCarol siye salubonakalisa olu phawu lobuthixo emtshatweni wethu. Sisondelelene. Siyakuthanda ukuba kunye. Ndiyigxininisa gqitha inkolelo yam yokuba undoqo oyintloko ekukhuliseni abantwana ngokunempumelelo sisibini esonwabileyo emtshatweni.
“Ndisazikhumbula nanamhlanje iimvakalelo ezinamandla ezaphuphuma entliziyweni yam ebudeni beentsuku neeveki emva kokuba umntwana wethu wokuqala ezelwe. Sasikuvuyela ukuvela kwesi sidalwa sitsha siphilayo. Ndikhumbula ndibona uCarol onwabile yaye anelisekile ngoxa wayencancisa usana uRachel. Ndandivuyisana naye, kodwa ndaziva ndibucaphuka, ndinomona nje omncinane. UCarol wayenkonyene noRachel, kodwa kuthekani ngam? Ndavakalelwa ngokungathi ndikhutshelwe—noko kungathi kukancinane nje kodwa sekunjalo ndikhutshelwe—ngaphandle kwesangqa sentsapho. Ngoncedo lukaYehova ndakwazi ukuvakalisa iimvakalelo zam noko kundixhalabisayo kuCarol, yaye wabonakalisa uvelwano nenkxaso.
“Emva koko ndakwazi ukusondelelana nosana lwethu oluncinane ngokuncedisa kuyo yonke imisetyenzana enxulumene nosana, kuquka naleyo ingathandekiyo—ukuhlamba isishuba esingcoliselweyo kuyinto endingaqhelanga kuyenza ngaphandle kokuzibaxa izinto! Siye sanabantwana abahlanu abeza emva koRachel. URebecca nguntondo, ngoku uneminyaka esibhozo ubudala. Siye saqhuba isifundo seBhayibhile sobuqu, somntwana ngamnye wethu.
“Ikho enye into engakumbi ngokukhulisa abantwana abasebancinane. Mna noCarol sasikunandipha ukuthetha neentsana zethu ukususela kwixesha lokuzalwa kwazo. Sasithetha ngazo zonke izinto. Maxa wambi sasithetha ngoYehova nangemisebenzi yakhe emihle nemangalisayo. Maxa wambi sasithetha ngezinto ezonwabisayo, zokuthanda ukudlala, nezihlekisayo. Ngako konke oku, sasizama ukubafundisa okuthile, kodwa ngaphezu koko sasisiba nexesha elimnandi, lokuphumla nelimyoli. Ndikholelwa kwelokuba iintetho ezinjalo zafak’ isandla kakhulu kumanyano lomzali nomntwana. Alithandabuzeki elokuba zanceda ukudala unxibelelwano oluhle esasiba nalo entsatsheni yethu.
“UYehova uye wasifundisa imilinganiselo ephakamileyo yezinto zokomoya, ukunikela ngeziqu zethu. Mna noCarol asizange sibe nezinto ezininzi eziphathekayo, kodwa asizange sizifune ngokwenene okanye sizinqwenele. Ukuba besichithe ixesha lethu elingakumbi sisebenza nzima sifuna ubutyebi, ngesingabanga nalo ixesha elaneleyo lokulinikela kuYehova nakwintsapho yethu. Senza ukhetho olulungileyo.” (La alandelayo ngamagqabaza kaCarol.)
“Ndicinga ukuba ukuncancisa iintsana zakho kunceda kakhulu ekumanyaneni kweentsana noonina. Uchitha ixesha elininzi uwole yaye uphethe usana lwakho kangakokuba unyanzelekile ukuba usondelelane nalo. Umama akanakuze ashiye usana lwakhe ithuba elingaphezu kweeyure ezimbini ukuya kwezine. Mna noEd besisoloko singqongqo gqitha ngokushiya abantwana bethu nabantu abagcina abantwana. Bendisoloko ndifuna ukuba nexesha lokufundisa iintsana zethu ndize ndizibukele ngoxa zikhula. Ngoko ngexesha ezazisencinane ngalo, ndandingaphangeli. Ndicinga ukuba oku kuye kwazinceda ukuba ziqonde indlela ezazibaluleke ngayo kuthi. Eyona ndlela ingundoqo yokusondelelana nabantwana bakho kukuchitha ixesha kunye nabo. Akukho nto iyithabathel’ indawo into yokubakho kwakho ekhaya ngokobuqu. Zonke izinto eziphathekayo azinakuyithabatha indawo yakho.
“Iminyaka yabo yeshumi elivisayo yayinzima kuba kwakumele ndikwamkele ukuba abantwana babekhula. Kwakunzima ukuyamkela into yokuba babengasaxhomekekanga kangako kum yaye babezimela. Lixesha eloyikisayo, yaye livavanya wonke umsebenzi wakho wokufundisa, wokuqeqesha, nowokuxonxa owenzileyo. Selikushiyile ixesha ukuba uqalisa xa bekwishumi elivisayo. Liba selikushiyile ixesha ukuba uqalisa ngoko ukuzama ukubafundisa ukuziphatha, ukuthanda abantu, yaye ingakumbi ukuthanda uYehova. Ezi zinto zimele zibethelelwe ukususela ekuzalweni ukusa phambili.
“Uneminyaka eli-12 yokwenza umsebenzi wakho ngaphambi kwaloo minyaka inzima yeshumi elivisayo. Kodwa ukuba uye wazimisela ekusebenziseni imigaqo yeBhayibhile, kulixesha lokuba uvune uvuyo noxolo xa besenza isigqibo sokuba bafuna ukukhonza uYehova ngokusuka entliziyweni.”—NguEdward noCarol Owens.
Evela EZimbabwe
“Abantwana ‘balilifa elivela kuYehova.’ Itsho njalo iBhayibhile kwiNdumiso 127:3. Ukukhumbula oku kuye kwasinceda njengabazali ukuba senze konke okusemandleni ukunyamekela eli lifa. Omnye wemigudu eyintloko entsatsheni yethu yayikukwenza izinto kunye—ukuthandaza kunye, ukufunda iBhayibhile kunye, ukunqula kunye, ukusebenza kunye, ukutyelela abahlobo kunye, nokudlala kunye.
“Isohlwayo sasifuneka ngamaxesha athile. Ngesinye isihlandlo unyana wethu, kwiminyaka yakhe yokuqala yeshumi elivisayo, wafika ekhaya ebusuku. Sasikhathazekile. Wayeneendledlana ezingaqondakaliyo. Saqonda ukuba kwakukho into ephosakeleyo, kodwa sagqiba kwelokuba siwubekele ingomso umbandela lowo. Ngasezinzulwini zobusuku seva umntu enkqonkqoza elucangweni lwegumbi lethu lokulala. Yayingunyana wethu, enyembezana.
“‘Tata, Mama, andikhange ndikwazi ukulala kwezi yure zine zidluleyo, konke kubangelwe kukuba ndingakhange ndiphulaphule xa nanindiluleka ngokusuka eBhayibhileni ngonxulumano olubi. Ukuphuma kwesikolo namhlanje bambi abantwana baye bandinyanzelela ukuba ndiye kuqubha kunye nabo, yaye omnye waloo makhwenkwe uye wandintywilisela emanzini. Ukuba bendingakhange ndincedwe yenye inkwenkwe, ngendirhaxiwe. Bandihleka yaye bathi ndiligwala. Ndibuye ndaza ngqo ekhaya, kodwa ndiye ndahlala phandle kuba bendiziva ndinetyala. Ndiyazisola kuba ndingazange ndiniphulaphule xa nanindilumkisa ngonxulumano olubi, njengokuba kuboniswe eBhayibhileni.’—1 Korinte 15:33.
“Walila nathi salila. Kwasivuyisa gqitha ukubona ukuba uye wafunda isifundo, kodwa samohlwaya ukuze oko kubetheleleke kuye. IEksodus 34:6, 7 ibonisa ukuba uYehova unenceba yaye uyazixolela iziphoso, kodwa sekunjalo ‘akakhe amenze msulwa onetyala.’”—NguDavid noBetty Mupfururirwa.
Evela EBrazil
“Ndingumhlolokazi yaye ndimele ndikhulise unyana wam ndindedwa. Kwangaxeshanye, ndikwasebenza njengomfundisi-ntsapho. Akuyonto ilula ukufundisa nokuqeqesha abantwana. Okufunekayo yimfundiso evisisanayo, ingqeqesho elungeleleneyo, nomzekelo omhle kwicala labazali. Kwakunzima ngam ukuba ndibe ngqongqo ndize kwangaxeshanye ndibe novelwano. Kwafuneka ndiziqhelise ukuphulaphula, ingakumbi ndiphulaphula ngokusuka entliziyweni. Kubalulekile ukunxibelelana, kungekhona ukuthetha nje, kodwa ubandakanye nomntwana, umenze abonakalise indlela avakalelwa ngayo. Ndizama ukumenza azive eyinxalenye yentsapho ngokumbandakanya kuqingqo-mali lwentsapho. Xa kufika ityala lombane okanye elamanzi, okanye xa ixabiso leempahla okanye lezihlangu linyukile, besiyixubusha le mibandela kunye.
“Kubalulekile ukuncoma ngokunyaniseka ngezinto ezenziwe kakuhle. Xa amathuba evela, ndandidla ngokumbonisa ukuxabiseka kokulandela imithetho nemigaqo kaThixo. Ngesinye isihlandlo, emva kokuba ndimluleke amaxesha amaninzi, kwafuneka ndisebenzise intonga yokoqobo. Hayi indlela ekwakunzima ngayo kum, kodwa enjani yona ukuba mihle imiphumo! Kwixesha lakhe lokufikisa ebuntwini obukhulu sinawo amahla-ndinyuka ethu, kodwa sinokulibona ixabiso lemfundiso nengqeqesho. Uyandixelela iingxaki zakhe zobuqu yaye uyazivakalisa iingcamango zakhe.
“Ndimele ndihlale ndiphaphile ukuze ndigcine unxibelelwano oluhle. Ngoko ndiyazama ukuba ndingazixakekisi gqitha emsebenzini wam wempangelo ukwenzela ukuba ngamaxesha onke ndibe nexesha lokuba kunye nonyana wam. Xa sineengxaki, ndiyazama ukuba ndiphulaphule ngenyameko, yaye ngoncedo lukaYehova, siyazoyisa. Ndiyamazisa ukuba nam ndiyazenza iimpazamo. Ngesinye isihlandlo ndandinomsindo gqitha, yaye ndamxelela ukuba ‘avale umlomo wakhe.’ Wandixelela ukuba ukuxelela umntu ukuba ‘avale umlomo wakhe’ kwakubonakalisa ukuphelelwa luthando. Wayenyanisile. Ngaloo mva kwemini sathetha ixesha elide.”—NguYolanda Moraes.
Evela KwiRiphabliki YaseKorea
“Ndayisebenzisa ngenkuthalo imigaqo yeBhayibhile kubomi bentsapho yam. Ngokukodwa amazwi akwiDuteronomi 6:6-9 ayehlele nzulu entliziyweni yam. Ngoko ndazama ukuchitha ixesha elininzi nabantwana bam kangangoko ndandinako, ukuze ndisondelelane nabo, ukuze ndibethelele imigaqo yeLizwi likaThixo ezingqondweni nasezintliziyweni zabo. Kwakhona ndamema abavangeli basemazweni bexesha elizeleyo namalungu entsapho yaseBheteli ekhayeni lethu ukuze abantwana bam bafumane ingcamango yohlobo elulo inkonzo yexesha elizeleyo.
“Into yokuqala abazali abafanele bayenze xa abantwana bebangela iingxaki kukubonakalisa iziqhamo zomoya. Kulula ukucatshukiswa ngabantwana uze ube nomsindo. Noko ke, thina bazali, sifanele sibe nomonde yaye sibonakalise ihambo engumzekelo. Kubalulekile ukubahlonela abantwana yaye sibanike ithuba lokuba bayichaze imeko. Ukuba akukho bungqina bucacileyo besiphoso, ngoko bathembe yaye usoloko ubakhuthaza. Xa kufuneka wohlwaye umntwana, qiqa naye kuqala, mbonise oko akwenze ngokuphosakeleyo, yaye uyicacise indlela isenzo sakhe ebesingamkholisi ngayo uYehova nabazali bakhe. Kuphela mohlwaye emva koko. Ngokufuthi oonyana bam babedla ngokuthi emva kokuba bohlwayiwe: ‘Tata, andisazi isizathu sokuba ndibe nemvukelo. Bendisisidenge ngendlela engathethekiyo.’ Bayabaxabisa abazali abanenkathalo ngokwaneleyo ukuba babohlwaye.
“Abazali bafanele basiphaphele isiqalo sehambo embi. Xa unyana wam wamazibulo wayekwisikolo semfundo ephakamileyo ekwibanga lesithoba, ndeva umculo werock uvulelwe ngamandla egumbini lakhe. Ndafumanisa ukuba uye wangenelela kwiqela labafundi abadala, nabagqalwa njengababengumzekelo ababeluleka abanye abafundi yaye wayechanabeke kwiimpembelelo zehlabathi. Ndaye ndafumanisa nokuba phantsi kwengcinezelo ezingisileyo evela kumalungu eli qela nangenxa yokufun’ ukwazi, waye watshaya. Saqiqa sobabini ngeengozi zokutshaya, yaye unyana wam wazenzela isigqibo sokuzikhupha kwelo qela, nto leyo awayenzayo. Ukuvala isikhewu sokuba eyeke imicimbi yesikolo echasekileyo, salungiselela ukuzonwabisa okusempilweni kunye nentsapho namalungu ebandla.
“Ekugqibeleni, eyona nto ibalulekileyo endifuna ukuyithetha kukuba abazali bamele bamisele umzekelo omhle. Ndandisoloko ndixelela oonyana bam ukuba ndifuna ukukhonza uThixo njengomlungiseleli wexesha elizeleyo ndishumayela iindaba ezilungileyo. Xa unyana wam wesibini wagqibayo esikolweni, ndakwazi ukuyeka emsebenzini wam kumzi-mveliso wesilika ndaza ndaba ngumlungiseleli wexesha elizeleyo. Oonyana bam ababini bayibona indlela endizimisele ngayo baza balandela umzekelo wam. Emva kokuba bechithe ixesha elide entolongweni ngenxa yembambano yobundilele, bobabini bangenela inkonzo yexesha elizeleyo yaye basaqhubeka nanamhlanje.”—NguShim Yoo Ki.
Evela ESweden
“Sikhulise abantwana abasixhenxe, amakhwenkwe amahlanu namantombazana amabini. Ngoku sebekhulile, bonke bakhuthele ekushumayeleni iindaba ezilungileyo zoBukumkani bukaThixo. Ukususela besebancinane, abantwana bethu bebesiya kwiintlanganiso zebandla yaye behamba nathi kwinkonzo yasentsimini. Ngokwamabakala bafunda ukwenza umsebenzi wokushumayela—ukukhalisa intsimbi yokunkqonkqoza esemnyango, ukubulisa, ukuzazisa, nokunikela iphepha elinenkcazelo yeentlanganiso, iphecana, okanye iphephancwadi. Ngoxa babesebancinane, babenikela iintetho kwiSikolo Sobulungiseleli Sobuthixo.
“Maxa wambi iingxaki ezinzulu zazifuna ingqalelo ekhethekileyo. Kubalulekile ngelo xesha ukubonakalisa uthando nomonde—ukungabangxolisi okanye uxambulisane nabo. Iingxaki zaziconjululwa ngokuqiqa ngazo nokugxininisa iimbono zikaYehova. Sabaqeqesha kwimibandela yemali. Xa baba badala, babesebenza imisebenzi enjengokusasaza amaphepha-ndaba, ukukha iisoyi ezibaswayo, ukulungisa izitiya, njalo njalo. Ukutyelela ooninakhulu nooyisemkhulu kude nekhaya kwenza bazazi iingxaki zabantu abakhulileyo yaye babe novelwano ngabo.
“Xa sasigqiba iminyaka engama-30 sitshatile, safumana le ncwadi ilandelayo:
“‘Kubazali Bethu Abathandekayo:
“‘SIBAMBA NGAZIBINI NGAKO KONKE! Uthando olufudumeleyo eniye nalubonakalisa kuthi ngokugqithiseleyo, ukholo lokwenene eniye nalubethelela kuthi, ithemba elimangalisayo enisinike lona—ixabiso loku alinakulinganiswa ngamazwi okanye ngemali. Noko ke, siyathemba ukuba ngesi sikhumbuzo sincinane, niya kuyiqonda indlela esivakalelwa ngayo ngani, tata nomama esibathandayo. [Abatyobeleyo] Abantwana benu.’
“Xa sijonga emva kuyo yonke ‘le misebenzi yama-20 eminyaka,’ sinombulelo omkhulu kuYehova, uBawo wethu osemazulwini, oye wanenceba kangaka kuthi.”—NguBertil noBritta Östberg.
Amacebiso Awahlukahlukeneyo Avela Kubazali
“Ukuncancisa kukamama kuyindlela kaYehova yokusondelelanisa umama nosana ngokudibana ngokwenyama, kodwa utata unokukwandisa oku ngesihlalo esigungqagungqayo. Ndandizonwabisa ngokobuqu ngokufunqula abantwana bethu ezingalweni zam ndize ndibambambazele de balale phantse kubusuku ngabunye.”
“Njengoyise, ndandingakuxhobelanga ukubancancisa abantwana bethu, kodwa ndasondelelana nabo ngokwenyama ngokubahlamba busuku ngabunye. Oku kwakusonwabisa, kum nakubo!”
“Ngamaxesha athile, ndiye ndathabatha umntwana ngamnye wethu ngokwahlukileyo, ukuba ndiye kutya naye kwiindawo zokudlela sisobabini. Bayalithanda eli xesha lokuba ngamnye abe kunye noTata.”
“Njengokuba iminyaka ihamba, ngokuthe ngcembe sasibanika inkululeko neembopheleleko ezingakumbi. Isipringi esicudaniselwe esandleni sikabani simele siyekelelwe kancinane ukuphepha ukuba sidubule ngokungalawulekiyo.”
“Bonisa uthando lokwenene. Akukho mntwana wakha wabulawa kukugonwa nokwangiwa—kodwa iimvakalelo zabo zinokufa ngaphandle kwako.”
“Yiba nomonde, musa ukubadanisa. Musa ukubangxolela ngokubathethisa ngalo lonke ixesha. Bavumele bakhulise ukuzixabisa kwabo. Sihlandlo ngasinye ubagxeka bancome izihlando ezine!”
“Yenza konke okusemandleni, ukubenza balunge kangangoko banako.”
[Umfanekiso okwiphepha 26]
Abantwana abancinane abanjengoRebecca bafuna uthando lokwenene
[Umfanekiso okwiphepha 27]
Ukuchitha ixesha ekwenzeni izinto kunye kuya kufak’ isandla kumanyano lwentsapho olomeleleyo