Abantu Abaselula Bayabuza . . .

Kutheni Ndimele Ndahluke Nje?

“KUNZIMA ukuba ngowahlukileyo.” Watsho njalo omnye umKristu oselula. Ukuba nawe ungumKristu, ngokungathandabuzekiyo uyazi kakuhle indlela avakalelwa ngayo. Njengenkoliso yolutsha, ufuna ukuthandwa uze wamkeleke kwabanye. Into eyingxaki kukuba, ngokuqhelekileyo ukwamkeleka kuthetha ukufana​—⁠ukuthetha, ukunxiba nokwenza njengoontanga bakho. Umntu oselula ozama ukwahluka uzibeka emngciphekweni wokungamkeleki ebuthweni nokuba abe yintlekisa.

Ngoko ke ulutsha oluphakathi kwamaNgqina kaYehova lujamelana nemeko enzima. Singatsho sithi, njengamaKristu, lwahlukile kolunye ulutsha. Oku akwenziwa kukuba luphakamile okanye lucinga ukuba luphucukile kunabanye abantu. Kunoko, ngenxa yokuqeqeshwa kwalo ngeBhayibhile, ngokufuthi aluvumelani noontanga balo kwimicimbi yokuziphatha. Iimbono zalo ngemibhiyozo yokuthand’ izwe, ukubhiyozela iiholide zonqulo, nokwenza amadinga zisenokubaphazamisa oontanga balo xa bekubona oku.a

Elinye iNgqina eliselula lithi ukuba ngowahlukileyo “yeyona nkalo inzima yokuba ngumKristu.” Elinye lithi: “Abanye abantwana bakujongela phantsi. Kangangezihlandlo ezininzi ndiye ndabizwa ngokuba ndingungantweni nesinyabi.” Abazali bakho abangamaKristu basenokude babethelele ngokubhekele phaya ukuba ungahluki ngesimo sokuziphatha nje sodwa koko wahluke nakwimicimbi enjengokunxiba, ukuzilungisa, nokukhetha umculo.

Abantu BakaThixo Bahlukile!

Usengazibuza, ‘Yintoni ephosakeleyo ekufaneni nabanye abantwana?’ Eneneni ukwahluka bekuluphawu olufanisa abantu bakaThixo kususela mandulo. Ngasihlandlo sithile, uThixo wakhetha amaSirayeli amandulo ukuba abe ‘ngabantu bakhe abayinqobo.’ (Eksodus 19:⁠5) Oko kwathetha ukwahluka kubo bonke abanye abantu. KwiLevitikus 18:⁠3, uThixo wayalela: “Ize ningenzi ngokokwenza kwelizwe laseYiputa, enibe nihleli kulo; ize ningenzi ngokokwenza kwelizwe lakwaKanan, endinisa kulo, ningahambi ngokwemimiselo yabo.”

AmaYiputa amandulo ayezinikele kunqulo oluphantsi lwezilwanyana. Ubomi bawo babuzaliswe yinkolelo yokungafi komphefumlo. Umbulo wawuxhaphakile. Ngokufanayo, iKanan yayililizwe elalizaliswe lunqulo-zithixo, isini esigqwethekileyo, uphalazo-gazi, ukwenza amadini ngabantwana nobuhenyu. Ngoko ke, uThixo walumkisa, “Musani ukuzenza iinqambi ngezo nto zonke. Ningenzi nalinye kuloo masikizi.”​—⁠Levitikus 18:​24-⁠26.

UYehova wasixhasa esi sibongozo ngoMthetho owawulawula ngokoqobo zonke iinkalo zobomi babo: ukutya kwabo (Levitikus 11), izenzo zabo zokulondoloza impilo (Duteronomi 23:​12, 13), ukuziphatha kwabo ngokwesini (Levitikus 18:​6-23). UMthetho wawulawula kwanendlela yabo yokunxiba nokuzilungisa! UYehova wathi: “Mabenze iintshinga emasondweni eengubo zabo, kwizizukulwana zabo, bafake entshingeni yesondo intsontelo ebala limsi.” (Numeri 15:​38) Amadoda kwakufuneka abe neendevu yaye ayengavumelekanga ukuba azichebe “iintlontlo” zawo. (Levitikus 19:​27; 21:⁠5) Lo mthetho wawumele ugcinwe enoba umYuda wayengayithandi ingubo eneentshinga okanye wayekhetha ukuba azichebe ngokupheleleyo iindevu zakhe.

Ngoku, makhe sithi ubuxelelwe ukuba kufuneka ube neendevu kwaye unxibe ngendlela ethile. Ubungayi kukucekisa oko njengokuphazanyiswa kwamalungelo akho obuqu? Kanti, imithetho kaThixo yaphumeza injongo ebalulekileyo neneengenelo. UYehova wachaza: “Ukuze niyikhumbule niyenze yonke imithetho yam, nibe ngcwele kuThixo wenu. NdinguYehova uThixo wenu.” (Numeri 15:​38-41) Umthetho wokunxiba wawusisikhumbuzo esibonakalayo nesinamandla sokuba amaYuda ayahlukile​—⁠yayikuphela kwabantu abangcwele kuYehova. Imiqathango yokutya ayizange ikhusele impilo yawo kuphela kodwa yawakhusela ekubandakanyekeni kwiimbutho okanye kunqulo lwabantu ababengengomaYuda. Kaloku, kwakuyinto engenakwenzeka ngokupheleleyo ukunxulumana nomhedeni kuze kungabikho nkalo yomthetho kaThixo uyophulayo. Ngaloo ndlela uMthetho kaMoses ‘wawuludonga’ olwalusahlula abantu bakhe kwezinye iintlanga.​—⁠Thelekisa eyabase-Efese 2:⁠14.

AmaKristu Amele Ahluke

AmaKristu namhlanje ‘akhululwe kuMthetho’ kaMoses yaye anandipha inkululeko engakumbi kwimicimbi yokhetho lobuqu. (Roma 7:⁠6) Sekunjalo, uYesu Kristu waxelela abafundi bakhe: ‘Aningabo abehlabathi . . . ndaninyula mna kulo ihlabathi, [yaye] ngenxa yoko linithiyile ihlabathi.’ (Yohane 15:​19) UYesu wayengathi amaKristu kwakufuneka asishiye isijikelezi-langa esinguMhlaba. (Thelekisa eyoku-1 kwabaseKorinte 5:​10.) Wayethetha ukuba amele ahluke kulo “ihlabathi”​—⁠ibutho labantu abakude noThixo. Kutheni? Kuba njengokuba umpostile uYohane kamva watshoyo, “ihlabathi liphela lilele kongendawo.”​—⁠1 Yohane 5:⁠19.

Ngoku khawucinge ngolunye ulutsha olwaziyo esikolweni. Kuthekani ngendlela olucinga ngayo, ihambo yalo, intetho yalo, umculo nempahla oluyithandayo? Ngaba kuwe ulutsha olunjalo lubonakala lukhokelwa yimilinganiselo yobuthixo​—⁠okanye ngaba lukhokelwa yimigaqo ebekwe ‘nguthixo weli phakade,’ uSathana uMtyholi? (2 Korinte 4:⁠4) Ukuba lukhokelwa yimigaqo kaSathana, enjani yona ingxaki ozibeka kuyo ukuba wenza, uthethe, okanye ude ubonakale ulixelegu njengalo! Into embi kukuba, uphikisa ibango lakho lokuba uliNgqina likaYehova. Kanti eyona imbi kakhulu, usenokuzibona unikezela kwiimpembelelo ezimbi.

UKim, ibhinqa eliselula, uthi, “Ngokwenene abahlobo bakho bayayichaphazela ihambo yakho. Ngoxa ndandisesikolweni, ndandingomelelanga kakhulu kwinyaniso [yamaKristu], ngoko ndandinabahlobo abaninzi behlabathi. Kodwa oko kwakungalunganga kuba ndabandakanyeka kwizinto ezininzi ezimbi.” Kanti akuyomfuneko ukuba ude ubandakanyeke kwizinto ezimbi kakhulu ukuze ubuhlobo bakho noThixo buphazamiseke. Qwalasela ngenyameko oko kuthethwa yiBhayibhile kuYakobi 4:⁠4: “Anazi na ukuba ubuhlobo balo ihlabathi bubutshaba kuye uThixo? Othe ngoko wanga angaba sisihlobo salo ihlabathi, uzenza utshaba lukaThixo.”

Ngaba ngenene ufuna ukuzibeka engozini yokuba lutshaba lukaThixo? Kakade akunjalo! Ngoko yenza kucace ukuba awungowehlabathi. Noko ke, oku kuthetha okungakumbi kunokuphepha nje iziyobisi nokuziphatha okubi ngokwesini.

Indlela Yokwahluka

Ngokomzekelo, khawucinge ngohlobo lwempahla olukhethayo. Oko ukunxibayo kuthetha okuthile ngawe, oko ukumelayo, kwanoko ukukholelwayo. Noko ke, ngokungafaniyo nelungiselelo lamaYuda, ubuKristu buyakuvumela ukuba ube ngumntu owahlukileyo nonokuzenzela ukhetho lobuqu. Kodwa ngaba oko kuthetha ukuba ube ngudludla nazo zonke iifashoni ezifikayo?

Enye intombazana engumKristu yafuna ukulandela ifashoni eyayingundaba-mlonyeni ngoko yokunxiba iijeans ezikrazukileyo esikolweni. Ngokuqhelekileyo, akukho mntu ufuna ukubonakala esemva. Noko ke, abazali bakho benza ngobulumko ukukubekela imiqathango yokuba unganxibi ifashoni yobuxelegu, ethoba isidima, engaqhelekanga, okanye engafanelekanga. Ukuba ubuya kunxiba ngeendlela ezinjalo, yiyiphi ingcamango obuya kuyinika abanye? Intombazana eselula egama linguJeffie yakubona oku xa yayichebe ngendlela eyayisefashonini. Ithi, “Ndandicinga nje ukuba ‘yayahlukile.’ Kodwa abantu baqalisa ukundibuza, ‘Ngaba ngokwenene ungomnye wamaNgqina kaYehova?’ yaye oko kwakubangel’ iintloni.”

Icebiso elilungeleleneyo lifumaneka kweyoku-⁠1 kuTimoti 2:⁠9, (TE) apho amaKristu abongozwa ukuba anxibe ‘ngokunesidima, athozame.’ Ngokuqhelekileyo unokuba nesidima ngaphandle kokuba ubonakale ungenamtsalane yaye usemva. Enyanisweni, ukunxiba ngendlela efanelekileyo mhlawumbi akunakukubangela ukuba uthandwe ngabantu, kodwa kuya kukunceda wahluke​—⁠yaye ukwahluka kuya kukuzisela inkoliseko kaThixo!

Kuthekani ngohlobo lomculo owukhethayo? Ngexesha oluhleliyo ngalo ulutsha oluninzi luphulaphula umculo. Xa ulungelelene, umculo unokunandipheka yaye unokuba ngowakhayo. Noko ke, iEksodus 32:​17-22 ibonisa ukuba umculo unokuvuselela iimvakalelo neenkanuko ezithob’ isidima. Yaye uninzi lomculo wanamhlanje awufanelekanga kwaphela ukuba ungaphulaphulwa ngumKristu. Ngokomzekelo, umculo werap nomculo onesingqi esinamandla uyathandwa, kodwa inxalenye​—⁠okanye inkoliso⁠—​ithetha ngokuziphatha okubi ngokwesini, imvukelo, ugonyamelo, okanye kwanokusebenzelana nemimoya. Ngaba ulandela umndilili wolutsha ekukhetheni umculo, okanye ngaba unenkalipho yokuwukhetha umculo owuphulaphulayo?

Ewe, kufuneka inkalipho ukuze ube ngowahlukileyo. Xa ungabavumeli abahlobo nabo ufunda nabo ukuba balawule ukhetho lwakho lokuzonwabisa, intetho, okanye ukunxiba, ngokuqinisekileyo kuya kubakho imbambano. UYesu walumkisa: “Ngokuba ningengabehlabathi, . . . linithiyile ihlabathi.” (Yohane 15:​19) Ngoko ke ukuba ngowahlukileyo kunokuba yenye yezona zinto zinzima ekufuneka uzenzile​—⁠kodwa asinto ingenakwenzeka. Likhondo eliphakamisa imilinganiselo kaThixo. Kukuzisela ukuzihlonela nesazela esicocekileyo. Umbuzo ngulo, unganayo njani inkalipho yokuba ngowahlukileyo? Inqaku lethu elikwinkupho elandelayo liza kuwuphendula loo mbuzo.

[Umbhalo osemazantsi]

[Umfanekiso okwiphepha 20]

Osemtsha ongaphumeleliyo ekubeni ngowahlukileyo koontanga bakhe uyaliphikisa ibango lakhe lokuba ungumKristu