Ukufunda Kwizigcawu
NGABA uyahlehla xa ubona isigcawu? Kwanabo kuthi abaye benjenjalo baye mhlawumbi bamangaliswa, nakuba besingayi kucinga ngako oko, yindlela ecwangciswe kakuhle nangokulungelelene ngayo indlu yesigcawu. Kwakhona, inkoliso yethu iye yeva ukuba indlu yesigcawu yakhiwa ngendlela emangalisayo. Kodwa kuthekani ngento eyenziwa ngayo loo ndlu—isilika?
Kudala izazinzulu noononjineli benomdla kwisilika eveliswa zizigcawu, yimibungu yesilika naziimpukane ezithile. UChristopher Viney, unjingalazwi oncedisayo kwicandelo lokufunda ngezinto eziveliswa zizilwanyana nezityalo nokwasisazinzulu ngemveliso yeentsimbi kwiYunivesithi yaseWashington, eUnited States, uye wenza uphando olukhethekileyo ngesigcawu esiyakha ibe ngqukuva indlu yaso. Ngokwephephancwadi laseToronto, eKhanada, iThe Globe and Mail, uye wafumanisa ukuba uhlobo olunye kwezintlanu zesilika eveliswa sisigcawu lomelele kunentsimbi—enyanisweni, lomelele izihlandlo ezilishumi kuneKevlar, umcu owenziweyo osetyenziselwa ukwenza impahla engaphumeli-mbumbulu, isiqu sesikhephe nezithuthi ezinqatyisiweyo!
Izazinzulu ezisebenzela uMkhosi waseUnited States ziye zakwazi ukukhuphela ukwakheka okungokwemichiza kwefibroin, iprotini eyenziwe ngayo le silika. Noko ke, izazinzulu zifumanise ukuba asikuphela kokwakheka okungokwemichiza kwesilika okubangela iimpawu zayo eziphawulekayo; kwakhona yindlela isigcawu esiwusonta ngayo lo mchiza. Kumalungu omzimba isigcawu esiwusonta kuwo lo mchiza, isilika iba ngathi ngamanzi. Iimolekyuli zayo ziyadibana zibe yimisonto emide ebizwa ngokuba ziipolymers, engafane yahlukaniswe ngokulula. Sekunjalo, okaViney uziva enentembelo yokuba ngesixhobo esikhethekileyo sokwenza imicu, ekugqibeleni izazinzulu ziya kukwazi ukukwenza noku.
“Izigcawu zisenento ezikwazi ukuyenza thina esingakwaziyo ukuyenza,” okaViney wayixelela oko iThe Globe and Mail, kodwa wongezelela oku, “Ngubani owaziyo? Mhlawumbi sinokusebenzisa oko size senze okungakumbi.” Mhlawumbi kunganjalo; mhlawumbi kungabi njalo. Enoba iyintoni na imeko, ngalo lonke ixesha oya kunconywa ngokuyila kwantlandlolo iya kuba nguMthombo omnye kuphela—Lowo wadala zonke izinto, uYehova.—ISityhilelo 4:11.