Imbono YeBhayibhile

Uxolela Ngokuphelele Kangakanani UThixo?

“Ndivakalelwa kukuba uThixo akasayi kuze azixolele izono zam. Akasayi kuze andifune ngenxa yoko ndakwenzayo.”—UGloria.

UGLORIA wayengenangxaki yokuxelela abanye ukuba uYehova wayenokuzixolela izono zabo.a Kodwa xa wayejonga ezakhe iimpazamo, uGloria wayeziva enetyala. Kuye ukuxolelwa nguYehova kwakubonakala kuyinto engenakwenzeka.

Ukuqonda ukuba ukhethe isenzo okanye ikhondo eliphosakeleyo ebomini kunokusiphazamisa isazela. Emva kokuba onile uDavide wabhala: “Ndadinwa kukukhala imini yonke . . . amandla am aphela tu.” (INdumiso 32:3, 4, Today’s English Version; thelekisa INdumiso 51:3.) Okuvuyisayo kukuba, uYehova uyakuvuyela ukuxolela iimpazamo. “Ukulungele ukuxolela.”—INdumiso 86:5, NW; Hezekile 33:11.

Noko ke, uYehova ubona intliziyo. Akaxoleli ngenxa yeemvakalelo nje kuphela. (Eksodus 34:7; 1 Samuweli 16:7) Umoni umele azivume ngokuphandle iziphoso zakhe, abonise ukuzisola kokwenyaniso, aze alishiye ikhondo lakhe eliphosakeleyo njengento enezothe nethiyekileyo. (INdumiso 32:5; Roma 12:9; 2 Korinte 7:11) Kuphela kungoko anokuthi lowo wenze okuphosakeleyo axolelwe aze afumane “amathuba okuphumza” avela kuYehova.—IZenzo 3:19.

Kodwa kwanasemva kokuba beguqukile, abanye basaziva benetyala. Ngaba bamele baqhubeke beziva benetyala ngonaphakade? Yiyiphi intuthuzelo abanokuyifumana eBhayibhileni abo baye baguquka ezonweni zabo baza bazishiya kodwa abasakhathazekileyo entliziyweni?—INdumiso 94:19.

Ukususa Umthwalo

Ekhathazekile ngenxa yeempazamo zakhe, uDavide wathandaza kuYehova wathi: “Khangela ukucinezeleka kwam nokwaphuka kwam, uxolele [“ukhwelelise,” NW] zonke izono zam.” (INdumiso 25:18) Apha uDavide wayecela ukuba uYehova enze okungaphezu kokumxolela nje. Wacela ukuba uYehova ‘akhwelelise’ izono zakhe, aziphakamise okanye azithwale azisuse. Isono sinemiphumo emibi, yaye ngokungathandabuzekiyo kuDavide oku kwakuquka umthwalo wesazela esicinezelekileyo.

Nyaka ngamnye amaSirayeli ayekhunjuzwa ngokubonakalayo ukuba uYehova wayenokuzisusa izono zolo hlanga. NgoMhla Wocamagusho umbingeleli omkhulu wayebeka izandla zakhe phezu kwentloko yebhokhwe, avume izono zabantu phezu kwayo, aze ayithumele entlango loo bhokhwe. Wonk’ ubani okhoyo wayenokuzibonela ukususwa kwezono zolo hlanga.—Levitikus 16:20-22.

Ngoko ke abantu abaguqukileyo ezonweni zabo banokuthuthuzeleka. Oko kwakusenziwa ngoMhla Wocamagusho kwafanekisela ilungiselelo elikhulu ngakumbi lokususa isono—idini lentlawulelo likaYesu Kristu. Eprofeta uIsaya wabhala oku ngoYesu: “Usithabathele phezu kwakhe isono sabaninzi.” (Isaya 53:12) Ngenxa yoko, izono zexa elidluleyo azimele zisikhathaze isazela. Kodwa ngaba uYehova uya kuzikhumbula ezi zono kwixesha elizayo?

Ukucima Ityala

Kumthandazo wakhe ongumzekelo, uYesu wathi: “Usixolele amatyala ethu.” (Mateyu 6:12) Igama lesiGrike apha eliguqulelwe ngokuthi “usixolele” luhlobo lwesenzi esithetha “ukuyeka.” Ngaloo ndlela, ukuxolela isono kufana nokuyeka, okanye ukucima ityala.—Thelekisa uMateyu 18:23-35.

UPetros wahlabela mgama koku xa wathi: “Guqukani ke ngoko, nibuye, ukuze zicinywe izono zenu.” (IZenzo 3:19) Ukuthi “zicinywe,” kuthetha ukutshabalalisa, okanye ukupheliswa. Kunengcamango yokucima ingxelo ebhaliweyo, ukucima amatyala angaphambili.—Thelekisa eyabaseKolose 2:13, 14.

Ngoko ke, abo baguqukileyo akufuneki boyike ukuba uThixo uya kubahlawulisa ityala asele elicimile. Uthi: “Ndingazikhumbuli izono zakho.” (Isaya 43:25; Roma 4:7, 8) Kuthetha ukuthini oku kumoni oguqukayo?

Ukususa Ibala

Ngomprofeti uIsaya, uYehova wathi: “Nokuba izono zenu zide zavela zanjengengubo ebomvu, zoba mhlophe njengekhephu; nokuba zide zayingqombela njengebala elibomvu, zovela zinjengoboya begusha.”—Isaya 1:18.

Ngokufuthi imigudu yokususa ibala elendeleyo empahleni yakho iba lilize. Eyona nto iye yenzeke kukusuka elo bala limbatshe kodwa libe lisabonakala. Hayi indlela ekuthuthuzela ngayo ukuba uYehova enokwenza izono eziqaqambe okwengubo ebomvu okanye engqombela zibe mhlophe okwekhephu.—Thelekisa INdumiso 51:7.

Ngaloo ndlela, umoni oguqukayo akamele avakalelwe kukuba uya kuhlala enebala ubomi bakhe bonke. UYehova akazimbatshisi nje kuphela iimpazamo zethu, ebangela ukuba lowo uguqukileyo ahlale ekhathazeke ngonaphakade.—Thelekisa IZenzo 22:16.

Ukuxhaswa Ngabanye

Nangona uYehova ebususa ubunzima, alicime ityala, aze alisuse ibala lesono, umntu oguqukileyo maxa wambi usenokuziva ezisola kakhulu. UPawulos wabhala ngomenzi-bubi owaguqukayo kwibandla laseKorinte owaxolelwayo nguThixo kodwa ‘ongewayedliwe kukuba buhlungu ngokugqithiseleyo [‘ongewayekhathazeke kangangokuba anikezele,’ TEV].’—2 Korinte 2:7.

Wayenokuncedwa njani lo mntu? UPawulos uyaqhubeka: “Kungoko ndiniyalayo, ndithi, luzinziseni uthando kuye.” (2 Korinte 2:8) Igama uPawulos awalisebenzisayo eliguqulelwe ngokuthi “luzinziseni” ligama lasemthethweni elithetha “ukuqinisekisa.” Ewe, abantu abaguqukileyo abaxolelweyo nguYehova nabo bafuna ukuqinisekiswa, okanye ukwamkelwa, ngamanye amaKristu.

Kuyaqondakala ukuba, oku kusenokuthabatha ithuba. Lowo uguqukileyo umele aphile ngendlela eya kwenza abanye balulibale ugculelo olwaziswa sisono sakhe aze azakhele udumo oluhle lokuba lilungisa. Ngomonde umele anyamezele iimvakalelo zakhe nabani na osenokuba wachatshazelwa ziziphoso zakhe zangaphambili. Okwangoku usenokuqiniseka ukuba uYehova umxolele ngokupheleleyo, njengokuba wayenjalo uDavide: “Kunjengokuba kude kwempumalanga entshonalanga, ukulukhwelelisa [kukaYehova] kuthi ukreqo lwethu.”—INdumiso 103:12.

[Umbhalo osemazantsi]

[Inkcazelo Ngomfanekiso okwiphepha 29]

Return of the Prodigal Son by Rembrandt: Scala/Art Resource, N.Y.