IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g93 12/8 iphe. 21-28
  • Ngubani Onokundinceda Ndicombulule Iingxaki Zam?

No video available for this selection.

Sorry, there was an error loading the video.

  • Ngubani Onokundinceda Ndicombulule Iingxaki Zam?
  • Vukani!—1993
  • Imixholwana
  • Amanqaku Afanayo
  • Oontanga—Ngaba Bangowona Mthombo Ulungileyo Wecebiso?
  • Ukubaluleka Kwabazali Aboyika UThixo
  • ‘Abandiqondi!’
  • Zizuzele Ubulumko Obusebenzisekayo!
  • Ngaba Ndifanele Ndixelele Othile Ukuba Ndidandathekile?
    Vukani!—2000
  • Ndinokwenza Ntoni Ukuze Ndibazi Kakuhle Abazali Bam?
    Vukani!—2009
  • Indlela Ulutsha Olunokulufumana Ngayo Uncedo
    Vukani!—2009
  • Ndimele Ndenze Ntoni Xa Abazali Bam Bexambulisana?
    Imibuzo Yabantu Abaselula—Iimpendulo Eziluncedo, Umqulu 2
Khangela Okunye
Vukani!—1993
g93 12/8 iphe. 21-28

Abantu Abaselula Bayabuza . . .

Ngubani Onokundinceda Ndicombulule Iingxaki Zam?

“UMNTU uzalelwa ububi.” Yatsho njalo indoda eyayidandathekile egama linguYobhi kwiminyaka emalunga namawaka amane eyadlulayo. (Yobhi 5:7) Mhlawumbi ubomi bakho abukho lusizi njengobukaYobhi. Kodwa ngokungathandabuzekiyo uneengxaki neenzima zakho ezaneleyo.

Xa elinye iqela lolutsha laseMerika labuzwa, “Yiyiphi eyona nto ikukhathaza kakhulu?” uninzi lwalo lwakhankanya isikolo, abazali, imali, abahlobo nabantakwalo njengemithombo yonxunguphalo. Kuthekani ngawe? Ngaba ujamelene nengcinezelo yoontanga, iingxaki zemali, okanye iingxaki zesikolo? Ngaba ukufumanisa kunzima ukuhlangabezana namahlandinyuka okukhula ngokwasemzimbeni nangokweemvakalelo okufikisa kubuntu obukhulu? Ngaba ukhathazekile ngekamva lakho?

Unazo zonke ezi ngxaki engqondweni yakho, kulula ukuziva ucinezelekile yaye udandathekile. Enyanisweni, ukuba ubumele uzigcine kuwe iingxaki ezinjalo ezikukhathazayo, ubusenokuzibona iimvakalelo zakho izezahlukileyo kwezabanye. (Thelekisa IMizekeliso 18:1.) Ngoko, unokuqhubeka njani uzicombulula ingxaki zobuqu? Ngaba ngokwenene umele ujamelane nazo uwedwa?

Nakanye, kuba iingxaki zakho—bungakhathaliseki ubukhulu bazo—azahlukanga kwezabanye. Emva kokuhlolisisa ngenyameko indlela abantu abasabela ngayo, uKumkani uSolomon osisilumko wagqiba ngokuthi “akukho nto intsha phantsi kwelanga.” (INtshumayeli 1:9) Ewe, bambi baye bahlangabezana baza bazicombulula ngempumelelo iingxaki ezifana kanye nezakho. Ngoko akuyomfuneko ukuba usoloko uzigqibela izinto ngokwakho; maxa wambi usenokufumana uncedo kuthile osele ekwenzile oko. Ngapha koko, ukuba ubuhamba kummandla ongawaziyo, ngaba ubungenakuzama ukufumana ulwalathiso kuthile owakha waya kuwo? Umbuzo uthi, Ufanele ubhenele kubani ukuze ufumane uncedo olunjalo?

Oontanga—Ngaba Bangowona Mthombo Ulungileyo Wecebiso?

Ulutsha oluninzi lukhetha ukwabelana noontanga balo ngeengxaki zalo. UAnita oselula uthi: “Maxa wambi ndiye ndicinge ukuba ezinye zeenguqulelo endihlangabezana nazo zahlukile. Ndiye ndivakalelwe ngolu hlobo, ‘Ngaba nomnye umntu ujamelana noku?’ Ndiye ndizibuze enoba bubudenge ukuvakalelwa ngale ndlela kusini na.” Usenokuvakalelwa kukuba ubani okubudala bakho unokuziqonda iimvakalelo zakho nokuba umntu omdala—ngokukodwa umzali—uya kugweba, okanye agxeke ngokugqithiseleyo.

Kodwa nangona oontanga bakho besenokuba ngabaqondayo, abanosizi nabanovelwano, basenokungasoloko benikela icebiso elilelona liphilileyo. Kunjengoko iBhayibhile icacisa, ‘abantu abakhulileyo banamandla engqiqo aqeqeshelwe ukwahlula okulungileyo nokubi.’ Njani? IBhayibhile iyaphendula: ‘Ngokuwasebenzisa ixesha elide,’ oko kukuthi, ngamava! (Hebhere 5:14; The New English Bible) Beswele uhlobo olunjalo lwamava, abantu abaselula abakwazanga kukhulisa ‘ubulumko namandla okucinga’ alingana nawomntu omkhulu. (IMizekeliso 3:21, NW) Ngoko ke ukuthobela icebiso lomnye umntu oselula kuyingozi. IMizekeliso 11:14 iyalumkisa: “Kwakuba kungekho mbonisi [lwalathiso lufanelekileyo, NW], bayawa abantu.”

Ukubaluleka Kwabazali Aboyika UThixo

Abantu abadala ngokuqhelekileyo ngabona bafaneleke ngakumbi ukunikela ulwalathiso lobulumko. UYobhi olilungisa ukubeka oku ngale ndlela: “Ubulumko abufumaneki na emaxhegweni nokuqonda kubude bemihla?” (Yobhi 12:12, NW) Kusenokuba, abona bantu bafanelekileyo bokukunceda kule nkalo ngabazali bakho aboyika uThixo. Phakathi kwezinye izinto, bakwazi ngakumbi kunaye nabani na. Ekubeni besenokuba baye bajamelana neemeko ezifanayo nojamelana nazo ngoku, banokwenza okungakumbi ukukunceda uphephe ukungena engxakini. Ethetha njengomzali, uSolomon wacebisa: “Luveni, bonyana, uqeqesho lukayihlo, nizibaze iindlebe ukuze nikwazi ukuqonda. Kuba ndininika imfundiso elungileyo.”—IMizekeliso 4:1, 2.

Cinga ngegatyana lomfana laseGhana eligama linguSamuel. Ngoxa lalikwisikolo semfundo ephakamileyo, kwafuneka ligqibe enoba lalifanele lisukele imfundo yehlabathi okanye lisebenze njengomlungiseleli wexesha elizeleyo wamaNgqina kaYehova. Liyachaza: “Ekubeni intsapho yakowethu yayisondelelene yaye inonxibelelwano oluhle, kwakulula ukuzityand’ igila kubazali bam.” Abazali bakaSamuel bamalathisela kwicala lobulungiseleli bexesha elizeleyo—umsebenzi asaqhubeka ewenza ngempumelelo. USamuel ukhuthaza abaselula ukuba babandakanye abazali babo ekucombululeni iingxaki zabo zobuqu kuba “banamava ngakumbi ngobomi ibe basenokuba babekhe bahlangabezana neengxaki ezifanayo . . . ibe ngabona banokunceda bakubonise ngokucacileyo amacala omabini ombandela lowo.”

Okubangel’ umdla kukuba, ngokohlolisiso lwakutshanje lweGallup, inani elikhulu lolutsha lifuna ulwalathiso lwabazali—nkqu nakwimibandela efana neziyobisi, isikolo nesini.

‘Abandiqondi!’

Noko ke, okubuhlungu kukuba, inkoliso yolutsha iyazahlula kubazali bayo xa ifikelela kwiminyaka yayo yeshumi elivisayo. Lumbi luvakalelwa njengenkwenkwe ekwishumi elivisayo eyathi: “Ndizamile ukuthetha nabazali bam ngendlela angandonwabisi ngayo amanqaku endiwafumana esikolweni ibe ndicinga ukuba esi sikolo singqongqo gqitha, kodwa basuka nje bandixelele ukuba ndiyonqena yaye ndifanele ndizame ngamandla.” Intombazana eselula yaseAfrika engumKristu yavakalisa inkxalabo efanayo, isithi: “Ngaphakathi kum, ndiyazi ukuba ndineengxaki zobuqu endifuna uncedo ngazo, kodwa ndinoloyiko lokuba abazali bam abayi kundiqonda.”

Kakade ke, kwanabazali aboyika uThixo maxa wambi bayasilela. Basenokwenza izinto ngendlela egqithiseleyo, bangakuphulaphuli, bakuqonde phosakeleyo okanye babe ngabagwebayo. Noko ke, oku akuthethi ukuba ufanele ubakhuphe ngokupheleleyo kubomi bakho. UYesu Kristu wakhuliswa ngabazali ababengafezekanga. Sekunjalo, iBhayibhile ibonisa ukuba uYesu “wabalulamela.” Ngokungathandabuzekiyo impembelelo yabo yamnceda ukuba ‘ahambele phambili ebulumkweni nasekuthandweni nguThixo nangabantu.’—Luka 2:51, 52.

Ngaba uyangenelwa kubulumko nakumava abazali bakho? Ukuba akunjalo, phawula oko kuthethwa yincwadi ethi Adolescence, nguEastwood Atwater: “Xa abakwishumi elivisayo bephenjelelwa ngokugqithiseleyo ngoontanga babo, kusenokuba kungenxa yokungabikho kolwalamano phakathi komzali nokwishumi elivisayo kunokuba oko kusenzeka ngenxa yomtsalane omkhulu ngakumbi woontanga.” Hlobo luni lolwalamano olukhoyo phakathi kwakho nabazali bakho? (Galati 6:5) Ngaba izinto azibangelwa kukuba uye wakuphepha ukunxibelelana nabo kutshanje? Ngoko kutheni ungenzi konke onokukwenza ukuphucula izinto?a Oku kuyinxalenye yoko uSolomon wakubiza ngokuthi kukuba “ngunyana wokwenene” okanye intombi kubazali bakabani.—IMizekeliso 4:3, NW.

UMalcolm, umGhana oselula ngoku ohlala eUnited States, wakha wacinga ukuba abazali bakhe abaziqondi iimvakalelo zakhe. Kodwa baqhubeka bedlulisela kuye amava abo obomi noqeqesho lweLizwi likaThixo. Kwileta awayibhalela abazali bakhe kutshanje, uMalcolm wathi: “Ndiyazi ukuba siye saba nezinto esingavumelaniyo ngazo kwixesha elidluleyo. Kodwa xa ndicinga emva, ndiyayixabisa indlela enabunyamezela ngayo ubuntlokolukhuni bam ibe nazamkela ngothando ezinye zezigqibo zam endazenzayo. Ndikholelweni xa ndisithi, ndiyakwazi okwenzeka kwamanye amakhaya, ibe iBhayibhile ngokuqinisekileyo yenze umahluko [kwelethu] ikhaya. Kwakhona ndibamba ngazibini.”

Zizuzele Ubulumko Obusebenzisekayo!

Kunokuba kudodobalise ukukhula kwakho, ukwamkela ukhokelo lwabazali bakho kunokuba yeyona ndlela ikhawulezayo yokufikelela kubuntu obukhulu. Ekuhambeni kwexesha nawe ngokufanayo unokukhulisa ‘ubulumko, ulwazi, namandla okucinga.’ (IMizekeliso 1:4, NW) Uya kuxhotyiselwa ukuzicalula iingxaki nokwenza izigqibo ezifanelekileyo ngendlela yokuzicombulula.

Kuyavunywa ukuba, asilulo lonke ulutsha olusikelelwe ngokuba nabazali aboyika uThixo. Noko ke, bekuya kuba yimpazamo ukugqiba kwelokuba ufanele ungayithobeli into abayithethayo ngenxa nje yokuba besenokungabi ngamaKristu. Basengabazali bakho, ibe bamelwe bahlonelwe njengabanjalo. (Efese 6:1-3) Ngapha koko, ukuba ubanika ithuba, uya kufumanisa ukuba maninzi amacebiso asebenzisekayo abanokukunika wona. Xa ufuna ulwalathiso lokomoya, zama ukuzityanda igila kwilungu elithembekileyo lebandla lamaKristu. Apho akumele kube nzima ukufumana umntu omkhulu owoyika uThixo noya kuphulaphula ngendlela engathabathi cala, onentliziyo eqondayo nenovelwano.

Kwakhona, khumbula ukuba, umoya kaYehova ungumthombo woncedo namandla asoloko efumaneka kwabo bawacelayo. (Luka 11:13) UYehova ukwalungiselele intabalala yenkcazelo onokuyifumana eBhayibhileni nakwiimpapasho ezisekelwe eBhayibhileni zeWatch Tower Society. Kaloku, kwanolu ngcelele lwamanqaku luye lwanceda amawaka olutsha ukufumana iimpendulo ezisebenzisekayo kwiingxaki zalo! Ngokufunda ukumba nokwenza uphando, usenokuzicombulula ngokwakho iingxaki ezininzi.—IMizekeliso 2:4.

Kakade ke, ukuba neengxaki kuyinxalenye yobomi. Kodwa kuluncedo ukuba nembono enyanisekileyo umdumisi awayenayo. Wabhala: “Kundilungele okokuba ndacinezelwayo, ukuze ndiyifunde imimiselo yakho.” (INdumiso 119:71) Ewe, ukucombulula iingxaki kunokukuxonxa kuze kukuqeqeshe. Kodwa akuyomfuneko ukuba uzilungise zonke uwedwa. Fumana uncedo. Ngokuqhelekileyo lufumaneka xa lucelwa.

[Umbhalo osemazantsi]

a Ukuze ufumane amacebiso aliqela aluncedo kulo mbandela, bona isahluko 2 sencwadi ethi Imibuzo Yabantu Abaselula—Iimpendulo Eziluncedo, epapashwe yiWatchtower Bible and Tract Society of New York, Inc.

[Umfanekiso okwiphepha 26]

Ukwamkela ulwalathiso lwabazali kunokuba yeyona ndlela ikhawulezayo yokukhulela kubuntu obukhulu

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share