Ukugcina Imfundo Ikwindawo Yayo

INGCAPHEPHE yomzobi ikwazi kakuhle ukuzoba umfanekiso ube ngathi uyiloo nto iyizobayo. Eyona nto izikhathaza ngayo yindlela obonakala ngayo ngaphandle kunangaphakathi okanye ngaphantsi. Zinjalo ke nezinto eziza kuqala kuthi ebomini. Zimbi kuzo zimele zijongwe njengezibalulekileyo kunezinye.

UYesu Kristu wathi: “Banoyolo abangamahlwempu ngomoya; ngokuba ubukumkani bamazulu bobabo.” (Mateyu 5:3) Ngaloo ndlela, izinto zokomoya zimele zibe kwindawo yokuqala. Ngokuchasene noko, izinto eziphathekayo zimele zize mva.

Imi phi ke yona imfundo? Ngokuqinisekileyo iyinto ebalulekileyo kumKristu. Ukuba nemfundo ethile yehlabathi kudla ngokuba yimfuneko ukuze azalisekise imbopheleleko engokweZibhalo echazwa ngumpostile uPawulos: “Ukuba ke umntu akabakhathalele abakhe, ngokukodwa abendlu yakhe, ulukhanyele ukholo, unobubi ngaphezu kongakholwayo.” (1 Timoti 5:8) Ukongezelela, uthumo uYesu awalunika abafundi bakhe, lokuba benze abafundi, ‘bebafundisa ukuba bazigcine zonke izinto awabafundisa zona,’ lufuna ukuba ubani ‘abe nolwazi’ aze afundise abanye ngokuphumelelayo.—Mateyu 28:19, 20; Yohane 17:3; IZenzo 17:11; 1 Timoti 4:13.

Sekunjalo, imfundo imele igcinwe ikwindawo yayo. Ayifanele ifunwe ngenjongo yokuba sisidwangube sesifundiswa okanye ngenjongo yokufumana izidanga ezingayiwayo. Ukunika imfundo indawo ephambili engayifanelanga kukuzifaka engxakini. Kuyavunywa ukuba isengakwenza ume kakuhle ngokwezinto eziphathekayo okwexeshana. Kodwa kunjengokuba uKumkani uSolomon osisilumko waphawulayo: “Kubakho umntu omigudu yakhe inobulumko, inokwazi, inempumelelo; ukanti uya kuyinika umntu ongenzanga migudu.”—INtshumayeli 2:21.

AmaNgqina kaYehova anomdla kwimfundo, akafundi nje kuba kufuneka efundile, kodwa afundela ukuba luncedo ngakumbi enkonzweni kaThixo nokuze azixhase. Ekubeni ubulungiseleli bawo bungumsebenzi ongenangeniso uninzi lwawo luxhomekeke kumsebenzi wempangelo ukuze lulale lutyile. Oku kunokuba lucelomngeni ngokukodwa kubalungiseleli bexesha elizeleyo bamaNgqina kaYehova, ababizwa ngokuba ngoovulindlela. Bamele bahlale benocwangciso oluqinisekileyo kubulungiseleli kwangaxeshanye bazixhase ngokwaneleyo bona neentsapho zabo ukuba batshatile.a—IMizekeliso 10:4.

Wambi amaNgqina kaYehova akuba ewuphonononge macala onke lo mba, aye akhetha ukufumana imfundo eyongezelelekileyo. Kakade ke, kuye kwafuneka alumke ukuze agcine imfundo ikwindawo yayo. Yintoni ewancedileyo ekwenzeni oku? UJohn oselula waseBrazil uthi: “Ziliqela izinto ezandincedayo. Nangona kwakufuneka ndifunde ebusuku, ndandingaphoswa ziintlanganiso zamaKristu. Kwakhona zisuka nje ndabenza bacacelwa abo ndifunda nabo ukuba ndingomnye wamaNgqina kaYehova.”

UEric, naye ongowaseBrazil, wayewaxhakamfula amathuba okuthetha nabanye ngeenkolelo zakhe ngoxa wayesandisa imfundo yakhe. Uthi: “Isikolo ndandisijonga njengentsimi yam ekhethekileyo. Ndandiqhubela abafundisi-ntsapho nabafundi abaliqela izifundo zeBhayibhile, ndithetha nje abahlanu kubo babhaptiziwe, ababini kubo ngabadala.”

URichard wabuyela esikolweni phofu engafundi ixesha elizeleyo eye kufundela isidanga sokuzoba. Uthi: “Ukufunda kwandinceda ndafumana umsebenzi wokuxhasa mna nowakwam, kodwa kwandivulela elinye ithuba. Njengokuba ndandidla ngokuya apho kwakhiwa iiHolo zoBukumkani ezakhiwa ngokukhawuleza ndize ndithethe nabo bongamelayo, ndaphawula ukuba bafuna umzobi.b Imfundo yam ngoku iluncedo kolu lwakhiwo. Ukongezelelela, mna nowakwam sinethemba lokuba ekugqibeleni siya kukhonza kwikomkhulu lehlabathi okanye kumsebenzi wokwakha wezizwe ngezizwe wamaNgqina kaYehova.”

Kwangaxeshanye, amaNgqina kaYehova amaninzi aye ahlangabezana nocelomngeni lokuxhasa wona neentsapho zawo engakhange ongezelele mfundo. UMary uthi: “Ndizixhasa ngokusebenza emizini yabantu kabini ngeveki. Into ehlekisayo kukuba imali endiyifumana ngeyure ingaphezulu kuneyabanye abantu endibasebenzelayo. Kodwa umsebenzi wam ndiwujonga njengento endizixhasa ngayo. Undigcina ndiqhubeka nomsebenzi wobuvulindlela, ibe andizisoli.”

USteve uvakalelwa ngendlela efanayo. Uthi: “Xa ndandiqala ukuba nguvulindlela, abanye babesithi kum: ‘Uza kuthini xa utshata okanye xa unentsapho? Uza kuzixhasa ngantoni?’ Into eyenzekayo kukuba ndenze iintlobontlobo ezininzi zemisebenzi kangangokuba ndazi imisebenzi emininzi eyahlukahlukeneyo. Ngoku ndinomfazi ekufuneka ndimxhase, ndiphawula ukuba ndifumana imali eninzi kunezinye izifundiswa zasekholejini kwindawo endisebenza kuyo.”

Oobawo abangakholwayo basenokuba baye bafuna abantwana babo abancinane bongeze imfundo yabo, ibe iZibhalo ziyabanika igunya lokwenjenjalo. Noko ke, kwiimeko ezinjalo, yaye ngokuvisisana noMateyu 6:33, ulutsha lunokufundela izinto eziya kulunceda lusebenziseke ngakumbi enkonzweni kaYehova okanye eziya kuluvumela lukwazi ukuxakeka kubulungiseleli bexesha elizeleyo ngoxa lusesikolweni.

Eyona Mfundo Ibalaseleyo

Onke amaNgqina kaYehova, kungakhathaliseki ukuba afunde kangakanani na, ikho into afana ngayo. Ayaqonda ukuba eyona mfundo ibalulekileyo efumanekayo namhlanje iseLizwini likaThixo, iBhayibhile. UYohane 17:3 uthi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” Kungakhathaliseki ukuba umKristu unemfundo yehlabathi engakanani na, eyona nto imele ibe kwindawo yokuqala kuye kukungenisa ulwazi ngoYehova noNyana wakhe, uYesu.

Lo ngumzekelo owamiselwa ngamaKristu enkulungwane yokuqala. UManayen ‘wayefunda kunye noHerode umphathi wesithili’ ukanti wayekho yaye exakekile phakathi kwabaprofeti nabafundisi bebandla lakwa-Antiyokwe. (IZenzo 13:1, NW) Ngokufanayo, uPawulos wafumana imfundo ebesinokuthi kule mihla yeyaseyunivesithi. Ukanti, akuba ngumKristu, walugcina olo qeqesho lukwindawo yalo. Endaweni yokulusebenzisela ukugagamela abanye, ulwazi lwakhe ngezentlalo, ngomthetho nangembali walusebenzisela ukushumayela kuzo zonke iindidi zabantu.—IZenzo 16:37-40; 22:3; 25:11, 12; 1 Korinte 9:19-23; Filipi 1:7.

AmaKristu enkulungwane yokuqala ayengadumanga ngemfundo yawo. Inkoliso yawo ‘yayingenamfundo yaye ingenakwazi,’ ingazange iqeqeshwe kwizikolo zoorabhi. Kodwa oku akuthethi ukuba ayengamaqaba. Ngokwahlukileyo koko, la madoda namabhinqa ayekwazi ukumela ukholo lwawo—buchule obo obabubonisa ukuba ayefunde kakuhle.—IZenzo 4:13.

Ngoko ke, onke amaKristu, anomdla ngokwenene kwimfundo. Kwangaxeshanye, azabalazela ‘ukucikida izinto eziziincamisa,’ eyigcina imfundo—nezinye izinto—ikwindawo yayo efanelekileyo.—Filipi 1:9, 10.

[Imibhalo esemazantsi]

[Ibhokisi ekwiphepha 22]

Imfundo Eyongezelelekileyo

IMboniselo kaNovemba 1, 1992, yathi ngamaNgqina kaYehova nenkonzo yexesha elizeleyo: “Utyekelo oluqhelekileyo kumazwe amaninzi lukukuba umlinganiselo wemfundo ofunekayo ukuze ubani amkele umvuzo ofanelekileyo ngoku ungaphezulwana kunokuba wawunjalo kwiminyaka embalwa edluleyo. . . . Kunzima ukufumana imisebenzi ehlawula imivuzo efanelekileyo ngokusuka nje ugqibe elo banga lifunwayo ngumthetho . . .

“Kuthetha ukuthini ukuthi ‘umvuzo ofanelekileyo’? . . . Umvuzo wabo kusenokuthiwa ‘wanele’ okanye ‘uyanelisa,’ ukuba imali abayamkelayo iyabavumela baphile ubomi obufanelekileyo baze sekunjalo basale benexesha namandla awaneleyo okufeza ubulungiseleli babo bobuKristu.”

Ngoko IMboniselo yathi: “Ngoko akumele kubekwe imithetho engqongqo ethethelela okanye echasa imfundo eyongezelelekileyo.”

[Ibhokisi ekwiphepha 23]

Ukunconywa Okufanelekileyo

Kunyaka ngaphambi kokuba agqibe esikolweni samabanga aphakamileyo, uMatthew wacinga nzulu ngendlela yokuzixhasa ngoxa ephumeza umsebenzi wakhe njengomlungiseleli wexesha elizeleyo wamaNgqina kaYehova. Emva kokucinga ngalo mbandela ngomthandazo, uMatthew nabazali bakhe bavakalelwa kukuba imfundo eyongezelelekileyo yayiya kuba yinzuzo gqitha ukuze afikelele usukelo lwakhe. Ngaloo ndlela, wafaka isicelo semali yokufunda. Umcebisi wesikolo awayefunda kuso uMatthew wongezelela incwadi yokuncomela, esithi:

“Ebudeni beminyaka emibini enesiqingatha edluleyo, bendikuvuyela gqitha ukuba ngumcebisi nomhlobo kaMatt. UMatt ngumntu ovuthiweyo . . . Unzulu kakhulu elukholweni yaye ubambelela ngamandla kwiinkolelo zakhe, nto leyo ebonakala kulwalamano lwakhe nakwizenzo zakhe.

“Eminyakeni le, uMatthew ebeziqeqeshela ukuba ngumlungiseleli. Umlungiseleli kunqulo lwakhe akafumani mbuyekezo yamali. Enyanisweni ngumsebenzi wothando. Umfana ozincamayo, uMatt uneengcinga ezintle nolwazelelelo. Le mali yemfundo inokuyinceda iyixhase le ndoda yokholo ukuqhubela phambili uqeqesho lwayo nomsebenzi wayo wokuzithandela.

“Ngokuphathelele umsebenzi wokuzithandela nenkonzo yokunceda uluntu, uMatt uye wachitha iiyure ezininzi eshumayela kwindlu ngendlu ngeempelaveki nasemva kokuphuma kwesikolo nasebudeni behlobo. Usebenza phakathi koluntu naphakathi kwabantu abahlukahlukene gqitha. UMatt uye wabonakalisa ubuchule anabo bokukhokela nobuchule ekuqhubeni izifundo zeBhayibhile nabantu abatsha ndawonye nabakhulileyo. . . . Uyakwazi ukukhuthaza abantu aze abancede ukuba babusebenzise ngokupheleleyo ubuchule abanabo. Kwigumbi lokufundela, abafundisi-ntsapho baye bathi ngamaxesha onke unempembelelo entle. Uba phambili kwiingxoxo zegumbi lokufundela yaye unobuchule bokuxoxa. . . .

“UMatt ngomnye wabona bafana endiye ndakuvuyela ukubacebisa. Uthandwa yaye uhlonelwa gqitha ngoogxa bakhe nangabafundisi-ntsapho. Ingqibelelo yakhe ikowona mgangatho uphakamileyo.”

[Imifanekiso ekwiphepha 24]

AmaNgqina kaYehova anomdla kwimfundo, ngokuyintloko ukuze abe ngabakhonzi bakaThixo abaphumelelayo