Imbono YeBhayibhile
Iyintoni Intsingiselo Yobomi?
“ABALANDELI BAKADARWIN BEMI NGELITHI UKHETHO LWENDALO LUNIKELA INGCACISO EYANELEYO YOBOMI BEZINTO EZIPHILAYO. KANTI KUBONAKALA KUSENGQIQWENI UKUBA, UKUBA INTO EPHILAYO IKHULELA EKUBENI YINTO ENTSONKOTHILEYO ESEZINGQONDWENI NEKRELEKRELE NGAKUMBI, NGOKO KUNGENXA YOKUBA EZO MPAWU ZIYAFUNEKA.”—DYLAN THOMAS (UMBHALI NEMBONGI YASEWALES, 1914-53).
UKUFUNA intsingiselo yobomi akunto intsha. Bekukade kusezingqondweni zabantu abanxanelwe ulwazi kangangeenkulungwane. Uhlolisiso lwakutshanje lubonisa ukuba oku kusezingqondweni zabemi baseNew Zealand, ngakumbi namhlanje kunokuba kwakunjalo kwiminyaka elishumi edluleyo. Ama-49 ekhulwini abemi, abande ukususela kuma-32 ekhulwini xa kwakusenziwa uhlolisiso olufanayo ngowe-1985 abaneminyaka eli-15 ubudala nangaphezulu, ngokutsho kwengxelo epapashwe kwiListener, “ngokufuthi bebecinga ngentsingiselo yobomi.”
Abemi baseNew Zealand babonakala bevakalisa iimvakalelo ezifana nezabantu bezinye iintlanga. IListener ihlabela mgama isithi: “Utyekelo olwandayo lokubuza intsingiselo yobukho bethu lubonisa ukuba sixhalabe gqitha ngoku kunokuba sasinjalo ngeminyaka yee-1980, asiqinisekanga ncam ngekhondo emasilithabathe.”
Kuyabonakala ukuba, iimpendulo ebezinikelwa ngabakholelwa kwindaleko kumbuzo ongundoqo othi, Kutheni silapha nje? azanelisi kwinani elandayo labantu. Ngaba iBhayibhile inokunikela ulwalathiso oluyimfuneko ukuze ubani afumane intsingiselo kubomi bakhe?
“Amandla Abalulekileyo Ayintshukumisa”
Kuzo zonke izidalwa ezisemhlabeni, ngumntu kuphela ocingisisayo ngenjongo yobomi. Ngaba uyasazi isizathu soko? IBhayibhile isinika esinye isizathu kwiNtshumayeli 3:11. Ngokuphathelele uMdali, ithi: “Ubanikile abantu imvakalelo yexesha elidlulileyo nelizayo.” (The New English Bible) Nangona zonke izinto eziphilileyo zidla ngokubuxabisa ubomi, umntu ubonakala ahlukile kuzo ngokucinga ngexesha—elidluleyo, elangoku, nelizayo. Umntu unokucamngca ngexesha elidluleyo aze ajonge phambili kwixesha elizayo, eceba, ewe, ade abe nomnqweno onamandla wokuba angakho kwelo xesha. Ibe usenokudana xa engakwazi ukuwazalisekisa amaphupha akhe exesha elizayo ngenxa yobufutshane bobomi bakhe.
Ngaloo ndlela, ngumntu yedwa ozibuza le mibuzo, Kutheni ndilapha nje? Ndisingise phi? Ugqirha wezigulo zengqondo uViktor Frankl wabhala: “Ukuzabalazela ukufumana intsingiselo yobomi bukabani kungamandla abalulekileyo ayintshukumisa emntwini. . . . Ndingathi, ayikho into ehlabathini eluncedo ngokusebenzisekayo ukuze ubani aphumelele nakwezona meko zinzima, njengokwazi ukuba kukho intsingiselo kubomi bukabani.”
Okwafunyaniswa NguSolomon Kwaqinisekiswa NguYesu
Ukufuna ukufumana intsingiselo yobomi kwakungumnqweno wabantu bamandulo. Makhe siqwalasele ezinye zeziganeko ezenzeka embalini kwiminyaka engamawaka amathathu eyadlulayo kubukumkani bakwaSirayeli obabuphantsi kolawulo lukaSolomon. UKumkanikazi waseShebha wathi ngaye: “Libe liyinene ilizwi endaliva, ezweni lam, lezinto zakho nobulumko bakho. Andikholwanga ngamazwi lawo, ndada ndeza, abona amehlo am; uyabona, bendingaxelelwanga nesiqingatha esi. Ulugqithile ngobulumko nangokulunga udaba ebendiluvile.”—1 Kumkani 10:6, 7.
Xa wayebhala incwadi yeBhayibhile yeNtshumayeli, uKumkani uSolomon wachazela abalesi ngemiphumo yolingelo awalwenzayo ukukhanyisa injongo yobomi. Yayilulingelo lwamathuba okunandipha ubomi obufanele oyena kumkani kwiMpuma yamandulo. Kwisahluko 2, indinyana 1-10, wabuchaza ngokucacileyo ubomi bolonwabo ekunzima nokubuthelekelela namhlanje. Wazama yonke into enikelwa bubomi ngokuphathelele ubutyebi bezinto eziphathekayo noyolo lokwenyama. Wathi ingakanani intsingiselo yolo sukelo? Impendulo yakhe ifanele ibothuse abo bazithembe ngokugqithiseleyo.
Xa wayeqwalasela okuphunyezwe zizo zonke ezi zinto, ngokufuthi uluvo lwakhe lwaluchasene nazo. Zazingamampunge, nenkcitha xesha. Wabhala wathi: “Ndabheka mna ezenzweni zam zonke, ezazenzayo izandla zam, nasemigudwini yam endaphuka yiyo ukuyenza; ndayibona ukuba yonke loo nto ingamampunge nokusukelana nomoya; akukho lungelo phantsi kwelanga.”—INtshumayeli 2:11.
Waqukumbela ngelithi, phantsi kweemeko ezivumayo, iziyunguma zasemhlabeni zizisa ulonwabo lwexeshana. Kwanobulumko babantu abunakumhlangula umntu kwintlungu nakwiinkxwaleko zobomi.
UYesu Kristu waqukumbela ngokufanayo xa, esabela kukuxhalaba ngokungeyomfuneko kwendoda ethile ngelifa lezinto eziphathekayo, wathi kwisihlwele esasimphulaphule: “Lumkani, nizilinde ngasekubaweni; ngokuba ubomi bomntu abumi ngabuninzi bempahla yakhe.”—Luka 12:15.
NguYehova uThixo kuphela onokuboyisa ngokupheleleyo ubuthathaka babantu kubomi bemihla ngemihla aze amnike umntu injongo yobulumko kwizenzo zakhe. Ngaloo ndlela, ubomi ngaphandle kukaThixo bulilize. USolomon wacacisa njengoko kubhalwe kwiNtshumayeli 12:13, esithi: “Ukuhlanganiswa kwentetho, yakuba ivakele into yonke, nanku: Yoyika uThixo, ugcine imithetho yakhe; ngokuba indawo leyo iyimfanelo yoluntu lonke.”
Ukufumana Intsingiselo Yobomi
Isigqibo sikaSolomon sokuba intsingiselo yobomi ayinakwahlulwa kukumoyika ngokufanelekileyo uThixo saqinisekiswa ngokuphindaphindiweyo nguYesu Kristu. Ecaphula iLizwi likaThixo, uYesu wathi: “Kubhaliwe kwathiwa, Akaphili ngasonka sodwa umntu, uphila ngamazwi onke aphuma emlonyeni kaThixo.” (Mateyu 4:4; Duteronomi 8:3) Ewe, ukuze ubomi bukabani bube bobanelisayo, icala elingokomoya alimele lityeshelwe. UYesu walek’ umsundulo esithi ngaye: “Okwam ukudla kukuba ndenze ukuthanda kowandithumayo, ndiwufeze umsebenzi wakhe.” (Yohane 4:34) Ukumkhonza ngentobelo uYise wasemazulwini kwakungumthombo wovuyo nolwaneliseko. Kwakumxhasa. Kwabunika injongo ubomi bakhe.
Ngoko ke, ngaba ubomi bunokufikelela kwelona nqanaba lihle lokugqibela ngaphandle kukaThixo? Unotshe! Okubangela umdla kukuba umbhali-mbali uArnold Toynbee wakha wabhala wenjenje: “Injongo yokwenyaniso yonqulo oluphakamileyo kukusasaza iziluleko zokomoya neenyaniso ezisisiseko zalo kwimiphefumlo emininzi kangangoko kunokwenzeka, ukuze ngaloo ndlela ngamnye wale miphefumlo enziwe akwazi ukuzalisekisa injongo yokwenyaniso yoMntu. Injongo yokwenyaniso yoMntu kukuzukisa uThixo nokuyoliswa nguYe ngonaphakade.” Umprofeti uMalaki wavakalisa imbono kaThixo esithi: “Nobuya ke niwubone umahluko phakathi kwelungisa nongendawo, phakathi komkhonzayo uThixo nongamkhonziyo.”—Malaki 3:18.
[Umfanekiso okwiphepha 29]
“The Thinker,” nguRodin
[Inkcazelo]
Scala/Art Resource, N.Y.