Icandelo 1
Ngaba Ubomi Bunayo Injongo?
1. Yintoni ebuzwa ngokufuthi ngenjongo yobomi, yaye omnye umntu wagqabaza wathini ngayo?
Ngaxa lithile, phantse wonk’ ubani uyazibuza ukuba iyintoni na injongo yobomi. Ngaba kukusebenza nzima sizama ukuphucula iimeko esiphila phantsi kwazo, kukuxhasa iintsapho zethu, kukuba sife mhlawumbi emva kweminyaka engama-70 okanye engama-80, sandule ke sithi shwaka ngonaphakade? Omnye umntu oselula owayevakalelwa ngale ndlela wathi ayikho enye injongo ebomini ngaphandle kokuba “siphile, sibe nabantwana, sonwabe sandule ke sife.” Kodwa ngaba oko kuyinyaniso? Yaye ngaba ngokwenene ukufa kuthetha isiphelo sayo yonke into?
2, 3. Kutheni ukuziqwebela ubutyebi bezinto eziphathekayo kungeyonjongo yaneleyo yobomi?
2 Abaninzi kumazwe aseMpuma naseNtshona bavakalelwa kukuba injongo ephambili yokuphila kukuziqwebela ubutyebi bezinto eziphathekayo. Bakholelwa kwelokuba oku kunokukhokelela kubomi obonwabisayo, nobunenjongo. Kodwa kuthekani ngabantu abasele benabo ubutyebi bezinto eziphathekayo? Umbhali waseKhanada uHarry Bruce wathi: “Abantu abaninzi ngendlela eyothusayo abafumileyo bemi ngelithi abonwabanga.” Wongezelela wathi: “Uvavanyo-zimvo lubonisa ukuba abantu abaninzi baphelelwe lithemba kuMntla Merika . . . Ngaba ukho umntu owonwabileyo kweli hlabathi? Ukuba kunjalo, siyintoni isikhokelo?”
3 Owayesakuba ngumongameli waseUnited States uJimmy Carter wathi: “Sifumanise ukuba ukuba nezinto nokusebenzisa izinto akuwanelisi umnqweno wethu wokufuna injongo. . . . Ukufumba izinto eziphathekayo akunakukwanelisa ukungabi nanjongo kobomi obungenantembelo okanye njongo.” Yaye enye inkokeli yezobupolitika yathi: “Sekuyiminyaka eliqela ngoku ndiphanda ngokunzulu iinyaniso ngesiqu sam nangobomi bam; nabanye abantu abaninzi endibaziyo benza okufanayo. Abantu abaninzi kunanini na ngaphambili babuza ukuba, ‘Singoobani? Iyintoni injongo yethu?’”
Iimeko Ezinzima Ngakumbi
4. Kutheni abanye bekuthandabuza ukuba ubomi bunayo injongo?
4 Abaninzi bayakuthandabuza ukuba ubomi bunayo injongo xa bebona ukuba iimeko zokuphila zinzima ngakumbi. Ehlabathini lonke abantu abangaphezu kwewaka lesigidi bagula ngokungaginyisi mathe okanye abondlekanga kakuhle, nto leyo ephumela ekufeni kwabantwana abamalunga neshumi lesigidi nyaka ngamnye eAfrika kuphela. Abemi bomhlaba, abasondele kumawaka amathandathu ezigidi, bayaqhubeka besanda ngezigidi ezingama-90 ngonyaka, abangaphezu kwama-90 ekhulwini kwabo bakumazwe asakhasayo. Aba bemi bomhlaba baqhubeka besanda babangela ukuba ukutya, izindlu, nemizi-mveliso zifuneke ngakumbi, nto leyo ebangela ukonakaliswa ngakumbi komhlaba, amanzi nomoya, lungcoliso lwemizi-mveliso nezinye izinto.
5. Kwenzeka ntoni kuhlaza lomhlaba?
5 Impapasho ethi World Military and Social Expenditures 1991 inikela le ngxelo: “Nyaka ngamnye ummandla wamahlathi olingana nayo yonke [iGreat Britain] uyatshatyalaliswa. Ngokwesantya okuqhubeka ngaso ngoku oku (kugawulwa), ngonyaka wama-2000, siya kube sisuse ama-65 ekhulwini kumahlathi akwimimandla efudumeleyo ekweleenjiko.” Kuloo mimandla, ngokutsho kombutho weZizwe Ezimanyeneyo, ngomthi ngamnye otyalwayo kugawulwa eli-10; eAfrika ngomthi ngamnye kugawulwa engaphezu kwama-20. Ngoko imimandla eyintlango iyanda, yaye nyaka ngamnye ummandla olingana neBelgium awusakwazi kuphinda usetyenziselwe ezolimo.
6, 7. Ziziphi ezinye zeengxaki iinkokeli zabantu ezingakwaziyo ukuzicombulula, ngoko yiyiphi imibuzo ekufuneka iphendulwe?
6 Kwakhona, kule nkulungwane yama-20 abantu abaye bafa ezimfazweni babaphinda kane abo baye bafa ngendlela efanayo kwiinkulungwane ezine ezidlulileyo zidityanisiwe. Kuyo yonke indawo, ulwaphulo-mthetho, ingakumbi olunogonyamelo, luyanda. Ukuqhekeka kweentsapho, ukusetyenziswa kakubi kweziyobisi, uGawulayo, izifo ezidluliselwa ngesini, nabanye oothunywashe abangathandekiyo benza ubomi bube nzima ngakumbi. Yaye iinkokeli zehlabathi azikwazanga ukuzisa isicombululo kwiingxaki ezininzi ezithwaxa intsapho yabantu. Ngaloo ndlela, siyaqondakala isizathu sokuba abantu abaninzi babuze ukuba, Iyintoni injongo yobomi?
7 Abaphengululi neenkokeli zonqulo bawuphendule njani loo mbuzo? Emva kwazo zonke ezi nkulungwane zininzi zexesha, ngaba banikele impendulo eyanelisayo?
Oko Bakutshoyo
8, 9. (a) Wathini umphengululi womTshayina ngenjongo yobomi? (b) Wathini umntu owasinda kwinkampu yamaNazi ekwakubulawa abantu kuyo?
8 Umphengululi ongumConfucius uTu Wei-Ming wathi: “Eyona njongo yobomi ifumaneka kubomi obuqhelekileyo bobuntu esibuphilayo.” Ngokwale mbono, abantu baya kuqhubeka bezalwa, bazabalazele ukuphila, baze bafe. Imbono enjalo ayiniki themba kwaphela. Yaye ngaba iyinyaniso?
9 UElie Wiesel, owasinda kwiinkampu zamaNazi ekwakubulawa abantu kuzo ngeMfazwe Yehlabathi II, waphawula oku: “Umbuzo othi, ‘Siyintoni isizathu sokuba sibe lapha?’ ngowona ubalulekileyo umntu amele ajamelane nawo. . . . Ndikholelwa ukuba ubomi bunayo injongo phezu kwako nje ukufa okungenanjongo endikubonileyo.” Kodwa akazange akwazi ukuchaza ukuba iyintoni na injongo yobomi.
10, 11. (a) Omnye umhleli wabonisa njani ukuba abantu abanazo iimpendulo? (b) Kutheni imbono yesazinzulu esikholelwa kwindaleko inganelisi?
10 Umhleli uVermont Royster wathi: “Kuhlolisiso abantu abalwenze ngokwabo, . . . ngendawo yabo kwindalo iphela, sisekudana kunasekuqaliseni kwezinto. Sisajamelene nemibuzo yokuba singoobani nesizathu sokuba sikho nalapho sisinge khona.”
11 Isazinzulu esikholelwa kwindaleko uStephen Jay Gould saphawula: “Sisenokuba sifuna impendulo ‘ephakamileyo’—kodwa ayikho.” Kubantu abakholelwa kwindaleko njengaye, ubomi bungumzabalazo wokuphumelela kwesona sinamandla, konke kuphelela ekufeni. Naleyo imbono ayiniki themba. Yaye, kwakhona, ngaba iyinyaniso?
12, 13. Zithini iimbono zeenkokeli zecawa, yaye ngaba ziyanelisa kunezabakhi-mkhanya behlabathi?
12 Iinkokeli zonqulo ezininzi zithi injongo yobomi kukuphila ubomi obulungileyo ukuze xa umntu esifa umphefumlo wakhe uye ezulwini uze uhlale khona ngonaphakade. Zithi ke bona abantu abenza ububi baya kuthuthunjiswa esihogweni somlilo ngonaphakade. Ukanti, ngokwale nkolelo, apha emhlabeni abantu baya kuqhubeka bephila ubomi obunganelisiyo njengoko bekunjalo ukutyhubela imbali. Kodwa ukuba injongo kaThixo yayikukuba abantu baphile ezulwini njengezithunywa zezulu, kutheni engazange abadale ngolo hlobo zisuka nje, njengokuba wenzayo kwizithunywa zezulu?
13 Kwanabefundisi banobunzima ukuzichaza ezo mbono. UGqr. W. R. Inge, owayesakuba yintloko yabefundisi eSt. Paul’s Cathedral eLondon, wakha wathi: “Ubomi bam bonke bendizabalazela ukufumana injongo yokuphila. Bendizama ukucombulula iingxaki ezintathu ebezisoloko zibonakala zisisiseko: ingxaki yokuphila ngonaphakade; ingxaki yesimilo sabantu; nengxaki yobungendawo. Andiphumelelanga. Andicombululanga nokuba ibe nye kuzo.”
Umphumo
14, 15. Iimbono ezingqubanayo zinawuphi umphumo kubantu abaninzi?
14 Uyintoni umphumo weembono ezininzi kangaka ezahlukahlukeneyo zabaphengululi neenkokeli zonqulo kumbuzo ongenjongo yobomi? Abaninzi basabela njengokuba yenzayo enye indoda esele ikhulile eyathi: “Bendibuza isizathu sokuba ndilapha phantse bonke ubomi bam. Ukuba ikho injongo, andisenaxesha layo.”
15 Abaninzi xa bebona indlela ezininzi ngayo iimbono kwiinkonzo ezikhoyo ehlabathini bagqiba kwelokuba enyanisweni akubalulekanga ukuba umntu ukholelwa entwenini. Bakholelwa ukuba unqulo yindlela nje yokuphozisa ingqondo, into yokunika ubani uxolo lwengqondo nentuthuzelo ukuze akwazi ukuhlangabezana neengxaki zobomi. Abanye bavakalelwa kukuba unqulo luziinkolo nje kuphela. Bavakalelwa kukuba iinkulungwane zikaqashi-qashi wonqulo aziwuphendulanga umbuzo ongenjongo yobomi, yaye azibuphuculanga nobomi babantu abaqhelekileyo. Enyanisweni, imbali ibonisa ukuba iinkonzo ezikhoyo ehlabathini ngokufuthi ziye zalubambezela uluntu ekwenzeni inkqubela yaye ziye zaba ngunozala wentiyo neemfazwe.
16. Kunokubaluleka kangakanani ukufumana injongo yobomi?
16 Sekunjalo, ngaba kubalulekile ukufumanisa inyaniso ngenjongo yobomi? Ingcali ngezigulo zengqondo uViktor Frankl yaphendula: “Ukuzabalazela ukufumana injongo yobomi bukabani kungawona mandla anempembelelo emntwini. . . . Akukho nanye into kweli hlabathi, endinokuyithetha, enokuphumelela ukunceda ubani ahlangabezane nazo nezona meko zinzima, ngaphezu kolwazi lokuba ubomi bukabani bunayo injongo.”
17. Nguwuphi umbuzo ekufuneka siwubuze?
17 Ekubeni iintanda-bulumko zabantu nonqulo zingayichazanga ngokwanelisayo ukuba iyintoni injongo yobomi, sinokubhenela phi ukuze sifumanise ukuba iyintoni? Ngaba ukho umthombo wobulumko obuphakamileyo onokusixelela inyaniso ngalo mbandela?
Ngaphandle kokuba kuboniswe ngenye indlela, iZibhalo zicatshulwe kwiBhayibhile yesiXhosa. NW—New World Translation of the Holy Scriptures—With References, uHlelo lowe-1984.
[Umfanekiso okwiphepha 4]
“Nyaka ngamnye ummandla wamahlathi olingana nayo yonke [iGreat Britain] uyatshatyalaliswa”
[Umfanekiso okwiphepha 5]
“Bendibuza isizathu sokuba ndilapha phantse bonke ubomi bam”