Abantu Abaselula Bayabuza . . .

Ndinokuzonwabisa Njani?

“Ndicinga ukuba sizonwabisa gqitha. Ebandleni lethu senza unako nako ukuze sibe neembutho zokuzonwabisa. Sizonwabisa ngendlela efanelekileyo. Inkoliso yabantwana ehlabathini ayinakukuthetha oko.”—Jennifer.

UKUZIHLAZIYA—wonk’ umntu uyakufuna ngamaxesha athile. IThe World Book Encyclopedia ithi ukuzihlaziya kusenokude kube “negalelo elibalulekileyo engqondweni nasempilweni yokwenyama yomntu ngamnye.” Ewe, iBhayibhile ithi ‘kukho ixesha lokuhleka’ oko kukuthi, ixesha lokuzonwabisa!—INtshumayeli 3:1, 4.a

Igama elithi “recreation” lithatyathwe kwibinzana lesiLatini elithetha “ukuyila ngokutsha, ukubuyisela, ukuhlaziya.” (Webster’s New Collegiate Dictionary) Kulusizi ukuthi, izinto ezininzi abantu abaselula abazenzela “ukuzonwabisa”—njengamatheko angalawulekiyo okanye ukubandakanyeka kwiziyobisi nokusetyenziswa kakubi kotywala okanye isini esingekho mthethweni—azihlaziyi konke konke, kunoko ziyatshabalalisa. Ngoko ke ukufumana izinto zokuzihlaziya ezonwabisayo nezifanelekileyo kunokuba lucelomngeni ngokwenene. Kodwa njengoko uJennifer, ocatshulwe ekuqaleni, ebonisa, zinokufumaneka!

Ukwenza Izinto Kunye

Kutshanje uVukani! ukhe wadlan’ indlebe neqela labantu abaselula ngalo mbandela. Inkoliso yabo yathi iyakunandipha ukuba ndawonye nolunye ulutsha. Ngaba uvakalelwa ngendlela efanayo—kodwa ngokufuthi akumenywa? Ngoko kutheni ungathabath’ inyathelo lokuqala? Ngokomzekelo, enye, intombazana yaseMzantsi Afrika egama linguLeigh, ithi: “Ukuba ndilangazelela ukubukela umfanekiso oshukumayo othile, nditsalel’ umnxeba omnye wabahlobo bam, size sazise nabanye abahlobo bethu.” Ngokuqhelekileyo baya kumfanekiso oshukumayo oboniswa kwangethuba. Emva koko, abazali babo bayabaphuthuma baze baphume kunye baye kutya kwindawo yokutyela esekuhlaleni.

Imidlalo ikwanikela ithuba lokuqhelisela umthambo onik’ impilo nonxulumano olwakhayo. (1 Timoti 4:8) URoelien oselula uthi: “Ndiqala ndixubushe nentsapho yasekhaya ngendawo endifuna ukuya kuyo, size simeme iqela elincinane ukuba lihambe nathi.” Eneneni, ulutsha olungamaKristu lufumanise iindidi ezininzi zemidlalo efanelekileyo nebangel’ umdla olunokuyidlala nabanye: njengokutyibiliza, ukukhwela ibhayisekile, ukunkcunkca, nokudlala intenetya, ibaseball, ibhola ekhatywayo nevolleyball, ukukhankanya nje embalwa.

Eneneni, akuyomfuneko ukuba uchithe imali eninzi okanye ude uthenge izixhobo ezikumgangatho ophezulu ukuze wonwabe. “Mna nabazali nabahlobo bam siye sichithe iiyure ezininzi kumnandi sinyuka iintaba ezikufutshane nemimandla eyintlango,” itsho njalo enye intombazana engumKristu ekwishumi elivisayo. “Ukuphuma nje ubethwe ngumoya nabahlobo abalungileyo kuyolisa kakhulu!”

Iimbutho Zokuzonwabisa Ezakhayo

Noko ke, kulutsha oluninzi ukuzonwabisa kuthetha ukuya kwiimbutho zokuzonwabisa. UAveda oselula uthi: “Siyakunandipha ukuba nabahlobo size sitye kunye siphulaphule umculo.” Iimbutho zokuzonwabisa zinendawo yazo efanelekileyo kumaKristu. UYesu Kristu ngokwakhe wayebakho kwizidlo ezikhethekileyo, kwimisitho yemitshato nakwezinye iimbutho zokuzonwabisa. (Luka 5:27-29; Yohane 2:1-10) AmaKristu okuqala ngokufanayo ayezinandipha izihlandlo zokuba kunye kwizidlo nonxulumano olwakhayo.—Thelekisa uYuda 12.

Ukuba abazali bakho bayakuvumela ukuba ube nembutho yokuzonwabisa, yintoni onokuyenza ukuphepha iingxaki uze uqinisekise ukuba wonk’ umntu okhoyo wonwabile? Undoqo kukuceba ngobulumko. (IMizekeliso 21:5) Ukuzekelisa: Kusengqiqweni ukumema kuphela abahlobo onokukwazi ukubongamela kakuhle. Iimbutho ezincinane azidli ngokuphumela ekubeni “ziziyunguma” okanye “amatheko angalawulekiyo.”—AmaGalati 5:21; Byington.

AmaKristu enkulungwane yokuqala alunyukiswa ukuba akuphephe ukunxulumana nabo “bahamba ngokungalungelelananga.” (2 Tesalonika 3:11-15) Yaye ngokuqinisekileyo ukumema ulutsha oludume ngobunjubaqa nolungalawulekiyo kunokuyonakalisa imbutho. Ngoxa ufuna ukuba ngonobulumko ngabo ubamemayo, musa ukumema abantu abanye. ‘Phangalala,’ uze wazi nabanye, kuquka nabakhulileyo, ebandleni.—2 Korinte 6:13.

Ngaba uza kwenza iintwanantwana ezityiwayo? Ukuba kunjalo, akuyomfuneko ukuba ibe zizibiliboco okanye izinto ezixabiso likhulu khon’ ukuze iindwendwe zakho zibe nexesha elimyoli. (Luka 10:38-42) USanchia, intombazana yaseMzantsi Afrika uthi: “Maxa wambi sitya nje i-pizza ngaloo ngokuhlwa.” Iindwendwe zidla ngokuthanda ukuphatha nje izinto ezimbalwa.

Ziziphi ezinye izinto onokuzenza kwimbutho—ngaphandle nje kokubukela umabonwakude, ukuphulaphula umculo okanye ukuncokola? USanchia uthi: “Sidla ngokubuceba ubusuku kusengaphambili. Siye sidlale imidlalo okanye sibe nomnye odlala ipiyano, ngoko sibanako ukuvuma iingoma kunye.” Elinye igatyana eliNtsundu eligama linguMasene lithi: “Maxa wambi sidlala amakhasi, iindolotyi ne-chess.”

UJennifer, ocatshulwe ngaphambilana, waxelela ummeli kaVukani! oku: “Sinomdala ebandleni lethu oye asimemele ukudlala imidlalo yeBhayibhile. Umele ube nolwazi oluchanileyo ngeBhayibhile ukuze udlale kakuhle.” Intatheli kaVukani! yabuza olunye ulutsha oku: “Ngaba anicingi ukuba ukudlala imidlalo yeBhayibhile kushiywe lixesha?” Baphendula ngamxhelo mnye bekhwaza besithi, “Nakanye!”

Enye intombazana ekwishumi elivisayo yathi: “Kulucelomngeni.” Yaza enye yathi: “Kuyonwabisa!” Xa imidlalo yeBhayibhile idlalelwa ukuzonwabisa, yaye kubekw’ iliso kumoya wokhuphiswano, inokuba yeyolisayo nefundisayo!—Bona umxholo othi: “Ukwenza Ukuhlanganisana Kunandipheke Kuze Kube Yingenelo,” kwinkupho yeAwake! kaJuni 22, 1972.

Ukuzonwabisa Njengentsapho

Ngamaxesha okubhalwa kweBhayibhile kwakungeyonto engaqhelekanga ngeentsapho ukuba zihlanganisane ukuze zizihlaziye ngeendlela ezithile. (Luka 15:25) Noko ke, ababhali abaselula bencwadi ethi The Kids’ Book About Parents bathi “abazali nabantwana baxakeke gqitha kule mihla kangangokuba akukho nomnye onexesha lokuceba imisebenzi . . . Sicinga ukuba kubalulekile ngabazali nangabantwana ukuqinisekisa ukuba bachitha ixesha kunye veki nganye besenza imisebenzi elula yokuzonwabisa.”

Oselula oNtsundu ogama linguPaki uthi: “ULwesihlanu lusuku lwentsapho. Sidla ngokudlala imidlalo kunye.” Yaye asibalibali abantakwethu. UBronwyn oselula uthi: “Ndiyakunandipha ukuzoba nokwenza ezinye izinto zobugcisa nodade wethu omncinane.” Ngaba unokuthabatha inyathelo lokuqala uze ubonise umsebenzi wokuziyolisa onokuwenza nentsapho yakowenu?

Xa Uwedwa

Kuthekani ukuba uwedwa? Oko akuthethi kuthi ufanele ukruquke uze ube nesithukuthezi. Kukho iindlela ezininzi zokuwasebenzisa ngokunenzuzo nangendlela eyonwabisayo amaxesha alolo hlobo. Ngokomzekelo, imisetyenzana yokuzonwabisa. Ukususela kumaxesha okubhalwa kweBhayibhile amadoda namabhinqa akufumanisa ukufunda umculo kukhuthaza. (Genesis 4:21; 1 Samuweli 16:16, 18) URachel uthi: “Ndidlala ipiyano. Leyo yinto onokuyenza xa unesithukuthezi.” Ukuba akulonxila lomculo, usenokuthunga, usebenze esitiyeni, uqokelele izitampu, okanye ufunde ulwimi lwelinye ilizwe. Ukongezelela, usenokude ukhulise ubuchule obuthile obuya kukunceda kwiminyaka ezayo.

IBhayibhile isixelela ukuba amadoda okholo, anjengoIsake, ayewavuyela amathuba okuba odwa ukuze acamngce. (Genesis 24:63) UHans umfana waseOstriya uthi: “Ngamanye amaxesha, ndisuka nje ndiye kwindawo ezolileyo esitiyeni ndize ndihlale phantsi ndibukele ilanga xa litshona. Oku kundizisela uvuyo olungakumbi yaye kundenza ndizive ndisondele kuThixo wam, uYehova.”

“Ukuyoliswa” Yinkonzo KaYehova

IBhayibhile yaprofeta yathi uKristu wayeya “kuyoliswa” yinkonzo kaYehova uThixo. (Isaya 11:3, NW) Yaye ngoxa inkonzo engcwele kuThixo ingekokuzihlaziya ngokwenene, ingayehlaziyayo nevuyisayo.—Mateyu 11:28-30.

UHans, ocatshulwe ngaphambilana, ukhumbula amanye amava avuyisayo. Uthi: “Mna nabahlobo bam sithanda ukukhumbula ezo mpela-veki sasizichithela ekusebenzeni kwisiza sokwakha iHolo yeNdibano [yonqulo]. Safunda indlela yokusebenza kunye, yaye siye sazana ngakumbi. Xa sikhangela emva, siba nelunda kuba senze into ebalulekileyo neyonwabisayo.”

Obu bungqina bala maKristu aselula benza sicace isibakala esiphawulekayo sokuba: Akuyomfuneko ukuzibandeza ulonwabo. Landela imigaqo yeBhayibhile. Yiba ngocingisisayo! Thabatha amanyathelo afanelekileyo! Uya kufumanisa ukuba unako ukunandipha iindlela ezinokukwakha yaye zingakudilizi.

[Umbhalo osemazantsi]

[Amagama acatshulweyo akwiphepha 30]

“Ukuphuma nje ubethwe ngumoya nabahlobo abalungileyo kuyolisa kakhulu!”

[Umfanekiso okwiphepha 29]

Akuyomfuneko ukuba ude uchithe imali eninzi ukuze ube nexesha lokuzonwabisa nabahlobo