Imbono YeBhayibhile

Isinxibo Sakho Nendlela Ozilungisa Ngayo—Ngaba Zibalulekile KuThixo?

“Njengokuba isalathiso sibonisa oko kuqulethwe yincwadi, . . . kukwanjalo nangenkangeleko yangaphandle nesinxibo, kwindoda okanye kwibhinqa, zisibonisa isimo sengqondo.”—Umbhali wemidlalo yeqonga yesiNgesi uPhilip Massinger.

KWINKULUNGWANE yesithathu kwiXesha lethu Eliqhelekileyo, umbhali wezinto zecawa uTitus Clemens wabhala uthotho lwemithetho elawula isinxibo nendlela yokuzilungisa. Izihombo namalaphu anexabiso eliphezulu okanye abhontebhonte ayengavumelekanga. Amabhinqa ayengafanele ajike umbala weenwele zawo okanye “athambise ubuso bawo ngezinto zokuthambisa eziqhathayo,” oku kukuthi “ukupeyinta ubuso.” Amadoda ayeyalelwa ukuba achebe iinwele zawo kuba “intloko echetyiweyo . . . ibonisa ukuba indoda inesidima,” kodwa iintshebe zazingamelwe zichukunyiswe, kuba “zazisenza ubuso bube nesidima negunya njengobawo.”a

Kwiinkulungwane kamva inkokeli yamaProtestanti uJohn Calvin yamisa imithetho echaza umbala nohlobo lwempahla abalandeli bakhe abasenokuyinxiba. Amatye anqabileyo neleyisi zazingavumelekanga, yaye ibhinqa lalinokuvalelwa entolongweni ukuba lalizilungisa iinwele zalo “zide zibe nde ngendlela embi.”

Iimbono ezinjalo ezibaxiweyo, ezeza neenkokeli zonqulo kangangeminyaka, ziye zabangela abantu abanyanisekileyo abaninzi ukuba bazibuze, Ngaba kubalulekile kuThixo oko ndikunxibayo? Ngaba kukho uhlobo oluthile lwefashoni alwamkelayo okanye lokusebenzisa izithambiso angalwamkeliyo? Ifundisa ntoni iBhayibhile?

Umbandela Wobuqu

Okubangela umdla kukuba, njengokuba kubhaliwe kuYohane 8:31, 32, uYesu wathi kubafundi bakhe: “Ukuba nithe nahlala kulo izwi lam, . . . niya kuyazi inyaniso, ibe inyaniso iya kunikhulula.” Ewe, iinyaniso ezazifundiswa nguYesu zazilungiselelwe ukukhulula abantu kwimithwalo ecinezelayo eyayithiwe zinzi kubo sisithethe naziimfundiso zobuxoki. Zazenzelwe ukuhlaziya abo ‘baxhamlekayo nabasindwa ngumthwalo.’ (Mateyu 11:28) UYesu noYise, uYehova uThixo, abanamqweno wakulawula ubomi babantu ukusa kwinqanaba lokuba bangakwazi ukwenza nantoni na ngokwabo baze bangakwazi ukusebenzisa ingqiqo yabo kwimibandela yobuqu. UYehova ufuna babe ngabantu abaqolileyo abo “bathe ngokuwasebenzisa amandla abo okuqonda bawaqeqeshela ukubalula kokubini okulungileyo nokubi.”—Hebhere 5:14.

Ngaloo ndlela, iBhayibhile ayinikeli mithetho eneenkcukacha elawula isinxibo nendlela yokuzilungisa okanye ukusebenzisa izinto zokuzithambisa, ngaphandle kwemithetho ethile yokunxiba eyamiselwa amaYuda nguMthetho kaMoses eyayenzelwe ukuwanceda azigcine ahlukile kwiintlanga ezaziwangqongile kwanakwimpembelelo yokuziphatha okubi. (Numeri 15:38-41; Duteronomi 22:5) Kwilungiselelo lamaKristu, isinxibo nendlela yokuzilungisa ngokusisiseko lukhetho lobuqu.

Noko ke, oku akubonisi ukuba uThixo akakukhathalelanga oko sikunxibayo okanye ‘wamkela nayiphi na into.’ Ngokwahlukileyo koko, iBhayibhile iqulethe ukhokelo olusengqiqweni olubonisa imbono kaThixo ngesinxibo nangendlela yokuzilungisa.

“Ngokuthozama Nangengqondo Ephilileyo”

Umpostile uPawulos wabhala ukuba abafazi abangamaKristu bafanele “bazihombise ngesinxibo esilungiswe kakuhle, ngokuthozama nangengqondo ephilileyo, kungekhona ngezimbo zokulukwa kweenwele negolide okanye iiperile okanye isambatho seendleko ezinkulu.” Ngokufanayo, uPetros waluleka nxamnye ‘nokulukwa kwangaphandle kweenwele nokokufakwa kwezihombo zegolide.’—1 Timoti 2:9; 1 Petros 3:3.

Ngaba uPetros noPawulos babonisa ukuba abafazi namadoda angamaKristu afanele angayikhathaleli inkangeleko yawo? Akunjalo konke konke! Enyanisweni, iBhayibhile ikhankanya amadoda namabhinqa athembekileyo asebenzisa amatye anqabileyo namafutha okuzithambisa neziqholo. Phambi kwabaphulaphuli bakhe enoKumkani uAhaswerosi, uEstere wenziwa mhle ngokuthanjiswa ngamafutha aqholiweyo kwanezinto zokuzihombisa. Yaye uYosefu wambathiswa izambatho zelinen ecikizekileyo nomxokelelwane wegolide.—Genesis 41:42; Eksodus 32:2, 3; Estere 2:7, 12, 15.

Ibinzana elithi “ingqondo ephilileyo,” njengokuba lisetyenziswe nguPawulos, lisinceda siwuqonde lo myalelo. Igama lesiGrike elisuka kulo lithetha ukuba nobungcathu nokuzeyisa. Lithetha ukuzicingela njengothobekileyo, kungekhona ukucel’ injezu. Ezinye iinguqulelo zeBhayibhile ziguqulele eli gama ngokuthi “ngobulumko,” “ngokusengqiqweni,” “ngokusulungekileyo,” okanye “ngokuzibamba.” Olu phawu luyimfuneko ebalulekileyo kubadala abangamaKristu.—1 Timoti 3:2.

Ngoko, xa zisixelela ukuba isinxibo sethu nendlela yethu yokuzilungisa ifanele ibonakalise ukuthozama ize ibe yelungeleleneyo, iZibhalo zisikhuthaza ukuba siphephe nasiphi na isimbo esigqith’ emgceni esinokukhubekisa abanye size sonakalise igama lethu elihle kwanebandla lamaKristu. Kunokuba banikele ingqalelo kwinkangeleko yabo ngokuhomba kwasemzimbeni, abo bathi bayamhlonela uThixo bafanele babonakalise ingqondo ephilileyo yaye banikele ingqalelo ‘kumntu ofihlakeleyo wentliziyo kwisivatho esingenakonakala somoya ozolileyo nowobulali.’ UPetros uqukumbela ngokuthi, oku ‘kulixabiso elikhulu emehlweni kaThixo.’—1 Petros 3:4.

AmaKristu ‘angumboniso wokubonelwa lihlabathi.’ Afanele ayilumkele ingcamango ayidluliselayo kwabanye, ngokukhethekileyo ecinga ngothumo lwawo lokushumayela iindaba ezilungileyo. (1 Korinte 4:9; Mateyu 24:14) Ngoko akayi kuvumela nantoni na, kuquka inkangeleko yawo, iphazamise abanye ekuphulaphuleni isigidimi esibalulekileyo.—2 Korinte 4:2.

Nangona iindawo ngeendawo zineendlela ezahluke gqitha zesinxibo, iBhayibhile inikela kumntu ngamnye ukhokelo olucacileyo nolusengqiqweni olumenza akwazi ukukhetha ngobulumko. Logama nje abantu bebambelela kule migaqo, uThixo ngokukhululekileyo nangothando uvumela bonke benze ukhetho lobuqu kwisinxibo nakwindlela yokuzilungisa.

[Umbhalo osemazantsi]