Izinto Ezihombise—Isibhakabhaka SaseAfrika
Ngumbhaleli kaVukani! eKenya
IAFRIKA inamathafa omileyo nangumqwebedu, agqatswa yingqatsini yelanga leikhweyitha. Sasiphinyaphinyela phakathi kwemithi enga ngumqaqoba nomnga eyayilapho.
Ngequbuliso saye sema. Ingqalelo yethu yathinjwa kukuthi lenye kombala omhle. Kwisebe lomnga odubulayo kwathi ngcu intaka encinane enombala oqaqambe ngathi kuqhushekwe ilanga kwintsityana zayo. Le ntaka intle kangako ngokufanelekileyo ibizwa ngokuba yintaka yelanga (ingcungcu).
Izipili Ezikhazimlayo
Zingaphezu kwekhulu iintlobo zeengcungcu ezikhoyo. Inkoliso yazo ifumaneka kummandla weenjiko waseAfrika, kodwa zinokufunyanwa naseAsia, eOstreliya, nakwiziqithi zePasifiki. Njengoko zintle ngeendlela ezahlukahlukeneyo, elangeni iingcungcu zikhanya okwezipilana ezikhazimlayo, kutsho kuvele imibala eqaqambileyo yomnyama: imibala eqaqambileyo ebomvu, emthubi, ezuba neluhlaza kwakunye nekhangeleka okobhedu.
Iingcungcu ngokuqhelekileyo zifaniswa neehummingbirds zaseMerika. Njengeehummingbirds, zinemibala emihle yaye zitya incindi. Noko ke, zona zinkulu kuneehummingbirds yaye azikwazi ukubhabha njengoogxa bazo baseMntla-Merika.
Ngokuqhelekileyo, ingcungcu ifunxa incindi ngokucwanya phezu kwentyatyambo ize isebenzise umlomo wayo omde oquthu ukuze ifikelele ngaphakathi emazantsi entyatyambo. Kodwa ukuba intyatyambo ebumbhobho inde kakhulu ukuba ifikelele ezantsi, ingcungcu isenokuyichiza ize ifunxe oko kuxabisekileyo kungaphakathi. Zikwatya nezinambuzane ezizifumana kwiintyatyambo nakumagqabi akufuphi.
Iinkunzi zikwaziimvumi ezivunyiweyo. Ingcungcu zibalasele ngentsholo yazo eyahlukahlukeneyo esusela kwethi tssp ukusa kwemnandi ethi tsik-tsik-tsik-tsik-tsit tree-tree-turrrr eculwa yingcungcu enentshinga ebomvu yaseMpuma-Afrika imalachite. Ababukeli beentaka basoloko besiva ngengoma yazo xa zikho etyholweni. Noko ke, xa ziboniwe ziphawuleka lula kumathafa awomileyo nangumqwebedu aseAfrika.
Ikhuthele Kodwa Ayiqaqambanga
Ngoxa kusonwabisa ukuva nokubonela inkunzi yengcungcu, imazi yayo incinane yaye ayinambala uqaqambileyo. Ngenxa yoko, bayityeshela rhoqo ababukeli nabafoti beentaka. Enyanisweni, ngokuqhelekileyo iphawulwa kuphela xa ikunye nenkunzi. Kodwa ukungabi ntle kwemazi ngebala, ngokuqinisekileyo kuthethelelwa kukukhuthala kwayo.
Ngokuqhelekileyo yimazi eyakha indlwane ize yenze inkoliso yomsebenzi wokukhulisa amantshontsho. Ngoxa isebenza endlwaneni, inkunzi ihlala ilinde iintshaba zingezi endlwaneni.
Iindlwane Ezijingayo
Noko ke, indlwane yengcungcu ayintle kwaphela. Zisoloko zikhangeleka okwengqokelela yenkunkuma ehlanganiswe ngumoya yaza yagaxeleka emeveni omnga. Njengekawusi emilise okwethontsi lombethe, indlwane yengcungcu yenziwa ngemisonto ephothiweyo yezityalo okanye ziphothwe zize zidityaniswe ngenwebu yesigcawu. Umphandle wendlwane uhonjiswe ngobuchule ngamasetyana amancinane, amagqabi abunileyo, intwana yobulembu, yaye ngokufuthi nesingxobo esinye okanye ezibini ukukhusela nantoni na enokwenzeka.
Ngaphakathi, indlwane yandlalwa ngotyani, ingca ethambileyo, iintsiba, nezinye izinto ezithambileyo. Umnyango uba sisikroba esincinane esicalanye ngaphezulu. Ngokufuthi imazi ifukamela yodwa. Njengoko ihleli ngaphakathi kwindlwane yayo emile okwepere, umlomo wayo omde, oquthu ngokuqhelekileyo ubonwa uthe gqi esikrobeni sendlwane. Ibekela iqanda elinye okanye amabini, aya kuqanduselwa malunga neentsuku ezili-14. Xa amantshontsho eshiya indlwane, asoloko embatshe njengonina. Noko ke, njengoko aziinkunzi eqalisa ukuqola, avelisa iintsiba ezintle eziya kuwahlula njengeentaka zelanga ngenye imini.
Ingcungcu ngomnye nje wemizekelo yobubele obahlukahlukeneyo boMsunguli okrelekrele. Ubuhle bombala wazo nezinto ezizenzayo kusishukumisela ekubeni sibe noxabiso olukhulu ngoMdali wazo. Ngaloo ndlela iingcungcu ziphakathi kwezo zinto iBhayibhile iziyalela isithi: “Dumisani uYehova ehlabathini, . . . nina zinambuzane, nani zintaka zinamaphiko.” “Yonke into ephefumlayo mayimdumise uYehova.” (INdumiso 148:7, 10; 150:6) Ezi zinto zihombisa isibhakabhaka saseAfrika zifanele zisishukumisele ukuba sonke sidumise uMdali onothando owaziyilayo.