Iingenelo Zokubafundela Ngokuvakalayo Abantwana
NGUMBHALI KAVUKANI! EPOLAND
Abaququzeleli bephulo elenziwa minyaka le elithi “Bonke Abantu BasePoland Bayabafundela Abantwana Babo” bathi: “Ukufunda kuyamnceda umntwana abe nolwazi yaye abe krelekrele. . . . Kumenza akwazi ukucinga nzulu aze abe nolwazi olungakumbi.” Ukuba oko kuyinyaniso, kutheni abantu abakhulileyo nabantwana abaninzi bekugqala njengento engemyoli?
Abaseki beli phulo bathi: “Ukuze umntwana athande ukufunda iincwadi umele aqheliswe eselula.” Xa bethetha nabazali bathi: “Ukuba ufuna abantwana bakho babe zizilumko baze baphumelele esikolweni, bafundele ngokuvakalayo yonke imihla kangangemizuzu engama-20.”
Kwakhona abazali bakhuthazwa ukuba bangakubekeli amangomso ukufundela abantwana babo kodwa “baqalise ngokukhawuleza.” Nini? Abazali bayabongozwa, “Mfundele eselusana umntwana, umfunqule, umjonge ngothando, uze uvuselele umdla wakhe ngokuncokola naye. Oku kuya kubangela ukuba abantwana bazive benqabisekile, bonwabile yaye besondelelene nabazali. Ukongezelela, oko kuya kuba negalelo ekwakhekeni kwengqondo yakhe.”
Abaququzeleli beli phulo bagxininisa ukuba “ukufundela abantwana kubaluleke gqitha ngoku kunangaphambili,” yaye bachaza nezinye iingenelo. Ukubafundela ngokuvakalayo abantwana kubafundisa ukuba bacinge, “kubanceda babaqonde abanye abantu, ihlabathi, neziqu zabo, . . kubenza babe nomdla kwizinto ezithile, bakwazi ukuba neemvakalelo, bahlakulele ukuba novelwano, kubafundisa indlela yokuziphatha, . . . kubenza bakwazi ukuzithemba.” Alithandabuzeki elokuba, “kusisicombululo kuzo zonke iimpembelelo ezingakhiyo . . . ezisongela iingqondo neentliziyo zabantwana,” baqukumbela ngelitshoyo abaphathi beli phulo.
Ukuze ukufunda kubangel’ umdla kufanele kusetyenziswe iimpapasho ezikhuthaza abantu abaselula ukuba basondele kuMdali wabo osezulwini. IBhayibhile yeyona ncwadi inokusinceda sonke sisondele kuThixo. IBhayibhile ithi uTimoti wafundiswa “imibhalo engcwele” eselusana. (2 Timoti 3:15) Kucwangciso lokufundela abantwana babo ngokuvakalayo abazali banokuquka iincwadi ezisekelwe eBhayibhileni njengethi Incwadi Yam Yamabali EBhayibhile nethi Funda KuMfundisi Omkhulu, ezibhalelwe abantu abaselula ngokukhethekileyo nezipapashwe ngamaNgqina kaYehova.