Okwenzeka Ehlabathini

◼ “Ngenkulungwane yama-20 abantu abali-100 lezigidi baye babulawa licuba.”—IWORLD HEALTH ORGANIZATION, ESWITZERLAND.

◼ “Kubaguli abaphantse babe ngama-9000 abenziwa utyando lwentliziyo [eUnited Kingdom] phakathi kowe-1996 nowama-2003, abo batofelwa igazi babesengozini yokufa phantse ngokuphindwe kathathu kunyaka olandelayo okanye ngokuphindwe izihlandlo ezintandathu kwintsuku ezingama-30 emva kotyando xa bethelekiswa nabo babengatofelwanga gazi.”—INEW SCIENTIST, EBRITANI

Ngaba Lixesha Loxolo?

Iphephancwadi iVi Föräldrar laseSweden labazali lithi, “iKrismesi ngowona mbhiyozo uthandwayo,” kodwa “ikwalixesha leengxabano.” Enyanisweni ngexesha leKrismesi, iintsapho “zilwa ngaphezu kokuba ziqhele ukwenjenjalo ngamanye amaxesha.” Eli phephancwadi labuza abazali abangaphezu kwe-1 100 abanabantwana abancinane ngoko kuqhele ukwenzeka ngeli xesha. Ama-88 ekhulwini aba bazali athi iintsapho zixabana “ngendawo nendlela oluza kubhiyozelwa ngayo olu suku.” Abaninzi kubo bayacaphuka kuba ootatomkhulu noomakhulu batefisa abazukulwana babo ngokubanika iilekese kunye nezipho ezingeyomfuneko.

Kuluyolo Ukupha

Umxholo okwiphephandaba iThe Globe and Mail laseKhanada uthi “imali ikwenza wonwabe—ingakumbi xa uphisa ngayo.” Eli phephandaba lithi abaninzi bathi eyona nto imnandi kukuyitya ngokwakho imali yakho, kodwa abo basebenzisa imali yabo ukunceda abanye—enoba ingakanani na—kuthiwa ngabona bonwabileyo. Lihlabela mgama lithi: “Uhlolisiso luye lwabonisa ukuba ubutyebi abubangeli ukuba umntu onwabe. Xa abantu benemali eyaneleyo yokwanelisa iimfuno zabo, akuyomfuneko ukuba bafumane engakumbi ukuze bonwabe.”

Unokuzifumana Kwi-Internet!

Iphephancwadi iNew Scientist lithi, amagosa aseburhulumenteni eUnited States ahlolisisa enoba iintshaba zawo “zinokufumana izixhobo zasemkhosini nge-Internet kusini na.” Eli phephancwadi lithi: “La magosa akhwankqiswa kukubona indlela ekulula ngayo.” Afumanisa ukuba kulula ukuthenga “impahla enxitywa ngamajoni aseUnited States, isinxibo sokuzikhusela kwizixhobo zenyukliya,” izixhobo zeenqwelo-moya zokulwa, nezinye “izixhobo eziyingozi.” Eli phephancwadi lithi, akwaziwa ukuba aba bathengi bazifumana njani ezo zixhobo, kodwa abaliqela kubo “bajongene namatyala olwaphulo-mthetho.”

Isinamatheliso Samandulo

Amagqabi omlowureli esilivere ayenanyathiselwa kwisigcina-ntloko segosa lomRoma kusetyenziswa isinamatheliso. UFrank Willer, owayeqokelel’ izinto zakudala eRhineland Museum eBonn, eJamani, wakufumanisa ngephanyazo oko. Esebenzisa isarha encinane, wasusa amagcuntswana esinyithi kwisigcina-ntloko sentsimbi senkulungwane yokuqala ngaphambi kweXesha lethu Eliqhelekileyo, esasikuMlambo iRhine kangangeminyaka enokuba li-1 500. Uthi: “Ubushushu balo sarha babangela amagqabi esilivere omlowureli ancothuka, kwaza kwashiyeka isinamatheliso.” Abaphengululi bathi eso sinamatheliso senziwa ngebhitumene, ixolo lomthi ibarkpitch kunye namafutha enkomo.