Ingozi Kwiindawo Eziphakamileyo—Ukuhlangabezana Nesifo Esibuhlungu Sokoyika Iintaba

“EPeru kukho udederhu lweentaba ezinkulu ezibizwa ngokuba yiPariacaca . . . Ndathi xa ndinyuka kweyona ndawo iphakamileyo kwezo ntaba, ekuthiwa ziStaircases, ngemizuzwana nje engephi kwagevezela amadolo kwaba ngathi ndingaziphosa phantsi. . . . Emva koko ndaxuxuzelelwa ngamathumbu ndaza ndahlanza kangangokuba ndandicinga ukuba ndiza [kufa]. Ukuba oko kwakuqhubeke ixesha elide ndandiza kuqiniseka ukuba ndiyafa, kodwa oku kwenzeka iiyure ezintathu okanye ezine de sehlela ezantsi kwindawo engaphakamanga kakhulu.”—UJosé de Acosta, kwincwadi ethi Natural and Moral History of the Indies.

NGASEKUPHELENI kwenkulungwane ye-16, uJesuit José de Acosta waseSpeyin wagula ngendlela engathethekiyo njengoko kuchazwe ngasentla ngoxa wayenyuka iPariacaca esePeruvian Andes. Ngelo xesha, kwakucingwa ukuba oku kubangelwa ziigesi ezinetyhefu ezibangelwa zizinto ezikhula ezintabeni okanye kukubhodla koothixo abanentlonti. Ngendlela esazi ngayo ngoku, uAcosta wayeneempawu zesoroche—ukuguliswa kukunyuka iintaba.

Umntu usenokuba nesoroche xa engafumani ioksijini eyaneleyo kwiindawo eziphakamileyo. Kwezo ndawo umoya uyancipha aze angakwazi ukungenisa ioksijini eyaneleyo emiphungeni.a

Ngokufuthi iimpawu zesoroche zibonakala kwiiyure ezimalunga nezine emva kokuba umntu efike encotsheni yaye zinokubakho ukusa kwiintsuku ezine. Ebudeni beli xesha, ukungabikho kweoksijini eyaneleyo egazini kwenza umzimba uvelise iiseli ezibomvu, kuze ke emva kwexesha oku kubangele indlela igazi elihamba ngayo emzimbeni ikhuphe ioksijini engakumbi.

Kodwa, xa umntu enyukela kwindawo ephakamileyo ngesantya esiphezulu ngaphambi kokuba aqhelane naloo moya, ulwelo lunokutyhubela imiphunga okanye ingqondo. Ukuba akukho manyathelo athatyathwayo, usenokufa.

Indlela Yokukhusela Isoroche

Abakhenkethi nabantu abanyuka iintaba baye bazama iindlela ezininzi zokuthintela isoroche. Nazi ezinye zazo:

● Kuphephe ukunyukela kwiindawo eziphezulu ukuba unengxaki yokuphefumla okanye uneanemia.

● Kunconyelwa amayeza achamisayo, athomalalisa ukudumba okanye ezinye iintlobo zamayeza ukuze kunyangwe okanye kukhuselwe iimpawu zesoroche. Dibana nogqirha wakho.

● Elona yeza lincedayo lesoroche kukwehla kuloo ndawo iphezulu. Ukuba kunokwenzeka, zigcine ufudumele xa usehla uze ufike ezantsi uphumle.

Ezinye zezona ndawo zintle emhlabeni zikwiindawo eziphezulu nasezintabeni. (INdumiso 148:9, 13) Ukuba uyazinyamekela xa ukhenketha, uya kunandipha ubuhle bendalo usempilweni.

[Umbhalo osemazantsi]

[Amagama acatshulweyo akwiphepha 20]

Ngokufuthi iimpawu zesoroche zibonakala kwiiyure ezimalunga nezine emva kokuba umntu efike encotsheni yaye zinokubakho

[Amagama acatshulweyo akwiphepha 20]

ukusa kwiintsuku ezine Elona yeza lincedayo lesoroche kukwehla kuloo ndawo iphezulu