Igama LikaThixo Liyaziswa!
● Xa uhamba phakathi kweSiqithi saseOrleans esihle nesikufutshane nesiXeko saseQuebec, eKhanada ubona ngezakhiwo zalapho ukuba abantu ababehlala apho babeluthanda unqulo. Iicawa zamandulo ezisecaleni kwendlela zisikhumbuza ixesha eladlulayo yaye zisabonakala kwindlela engqonge esi siqithi yaye lali nganye inecawa yayo.
Kwidolophu yaseSaint-Pierre kukho eyona cawa indala kwilali yaseQuebec, eyakhiwa ngo-1717. Ngoku sele iyindawo yokubonisa imizobo yaye inento engaqhelekanga. Ngasentla kwesibingelelo kukho iTetragrammaton—oonobumba abane besiHebhere abachaza igama loThixo weBhayibhile, uYehova.
Namhlanje inqabile into yokuva igama likaThixo libizwa kwicawa yamaKatolika, singasathethi ke ngokulibona libhaliwe. Uxwebhu olwakhutshwa yiVatican ngowama-2008 lwachaza ukuba upopu uyalele ukuba igama likaThixo “lingasetyenziswa okanye libizwe” xa kuqhutywa inkonzo yecawa yamaKatolika naxa kuculwa okanye kuthandazwa. Sekunjalo, iBhayibhile yenza icace into yokuba uYehova uThixo ufuna ukuba igama lakhe ‘livakaliswe emhlabeni wonke.’—Eksodus 9:16.
AmaNgqina kaYehova avakalelwa kukuba ukuze sikholise uThixo kufuneka senze okungakumbi kunokubeka nje igama lakhe ngaphakathi kwisakhiwo esithile. Nyaka ngamnye ehlabathini lonke achitha iiyure ezingaphezu kwebhiliyoni ezili-1,5 efundisa abantu ngegama likaThixo nangeenjongo zakhe. Ade alibuyisela kwindawo yalo efanelekileyo igama likaThixo, uYehova. IBhayibhile ayipapashayo—INguqulelo Yehlabathi Elitsha YeZibhalo Ezingcwele—iye yanamathela kwimibhalo yantlandlolo apho igama elithi Yehova livela kangangezihlandlo ezingama-7 000. Sele kushicilelwe iikopi ezingaphezu kwe-165 000 000 zeNguqulelo Yehlabathi Elitsha ezipheleleyo okanye eziinxalenye ngeelwimi ezingama-83. Eneneni, xa kuthethwa ngegama likaThixo, uYehova asizibuzi ukuba Kutheni silisebenzisa kodwa sizibuza ukuba Kutheni singalisebenzisi?
[Umfanekiso okwiphepha 21]
INguqulelo Yehlabathi Elitsha epheleleyo apho igama elithi Yehova livela kangangezihlandlo ezingama-7 000 ishicilelwe ngeelwimi ezingama-83.