Okwenzeka Ehlabathini

“Iyamangalisa into yokuba nyaka ngamnye iBhayibhile ibe yeyona ncwadi ithengiswayo eMerika—nakuba ingama-90 ekhulwini amakhaya asele enayo. . . . Kuthengiswa malunga nezigidi ezingama-25 zeekopi zayo nyaka ngamnye.”—ITHE WALL STREET JOURNAL, EUNITED STATES.

“Nyaka ngamnye ehlabathini lonke ubomi babantu abazizigidi ezi-4,5 buyatshintsha ngenxa yokutyiwa ziinyoka, kuqikelelwa ukuba bamalunga ne-100 000 ababulawa kukutyiwa ziinyoka yaye abanye abangama-250 000 bakhubazekile.”—IUNIVERSITY OF MELBOURNE, EOSTRELIYA.

Zimalunga “neebhiliyoni ezingama-210 -iiemail eziye zathunyelwa suku ngalunye ngowama-2008.”—INEW SCIENTIST, EBRITANI.

Ingxolo Ekuhola Wendlela Iyayichaphazela Inkumbulo

“Abantu abanegumbi lokulala elikufutshane nohola wendlela, nesiporo okanye nesikhululo seenqwelo-moya bakufumanisa kunzima ukukhumbula izinto zakudala nokufunda izinto ezintsha nakubeni bekwazi ukulala kukho ingxolo.” Utsho njalo uYsbrand van der Werf weNetherlands Institute for Neuroscience. Iphephandaba laseNetherlands ide Volkskrant lithi, ukukhumbula izinto nokufunda kuyachaphazeleka xa umntu engalali ngokwaneleyo kodwa kwenzeka okufanayo naxa umntu “ephazamiseka xa elele . . . nakuba engavuki.” Ukuze ihippocampus, icala elibalulekileyo lenkumbulo engqondweni, isebenze kakuhle kufuneka ulale ungaphazanyiswa zizinto ezifana “nengxolo nesibane.”

Iifireworks Nenkqubo Yokuphefumla

Iifireworks zinokuba ntle kodwa ukuqhushumbiswa kwazo kunokuba yingozi empilweni yakho. Ukuze zikwazi ukuba nemibalabala iifireworks ziba neemetal salts—ngokomzekelo enombala obomvu inestrontium ize yona enombala oluhlaza ibe nebarium. Abaphengululi baseOstriya abaye bahlola ikhephu eliwileyo ngaphambi nasemva koNyaka Omtsha baye bafumanisa ukuba ibarium ekweli khephu iye yaphindaphindeka kangangama-500. Ngenxa yokuba ityhefu yebarium ibangela ukuba imiphunga iminxeke, abaphengululi bathi ukusezela umsi weefireworks kunokubangela ube neengxaki zokuphefumla ezifana nesifuba.

Oomatshini Abanamaphiko Asebenza Ngomoya Babulala Amalulwane

Iphephancwadi iScientific American lithi, eAlberta, eKhanada amalulwane abonwa sele efile emazantsi oomatshini abanamaphiko asebenza ngomoya. Loo nto ishiya abaphengululi bebhidekile kuba besazi ukuba amalulwane ayakwazi ukuqikelela umgama yaye anobuchule bokubhabha. Noko ke, abaphengululi baye bafumanisa ukuba phakathi kwamalulwane abaye bawahlola, angama-92 ekhulwini aye ophela ngaphakathi, nto leyo ebenze baqonda ukuba inkqubo yokuphefumla yamalulwane ayikwazi ukumelana nokuhla ngokukhawuleza koxinezeleko lomoya okubangelwa ngamaphiko alo matshini. Isantya sala maphiko sinokuntinga siye kutsho kwiikhilomitha ezingama-200 ngeyure. Amalulwane afudukayo atya izinambuzane ayachaphazeleka kakhulu yaye kuthiwa aba matshini banokuziphazamisa ezinye izidalwa eziphilayo ezikufutshane nabo.