Kubaluleke Kangakanani—Ukulala?

● Uhlolisiso lwakutshanje lubonisa ukuba abantu bakuMntla Merika balala iiyure ezisixhenxe ukuya kwezisixhenxe nesiqingatha. Kubaluleke kangakanani ukulala? Xa ulele kubakho ixesha lokuphupha elifika qho emva kwemizuzu engama-60 ukuya kwengama-90. Ebudeni beli xesha, ingqondo isebenza kakhulu yaye abaphengululi bathi iyazihlaziya. Ezinye iingcali zithi xa uye waphuthelwa, indlela osebenza ngayo umzimba iyaphazamiseka. Loo nto ichaphazela ingqondo ize iyenze ingasebenzi kakuhle ize ibangele nezinye iingxaki emzimbeni.

Izinto ezifana necaffeine zinokukwenza ungalali. Nakuba kunjalo, ingqondo yethu iyakwazi ukukunyanzela ukuba ulale xa ungakhange ulale ngokwaneleyo. Iphephandaba iThe Toronto Star lithi, “enoba wenza ntoni na, xa ungakhange ulale ingqondo yakho iba namaxesha ekhe ilale ngawo, imizuzwana elishumi ukuya kumzuzu sihlandlo ngasinye.” Yiba nomfanekiso ngqondweni wakho uqhuba imoto ngesantya esingangeekhilomitha ezingama-48 ngeyure uze ulale imizuzwana elishumi usaqhuba. Ngelo xesha ungahamba umgama ongaphezu kobude bebala lebhola. Kwakhona ukungalali ngokwaneleyo kuyenza buthathaka inkqubo yomzimba yokulwa nezifo kuba umzimba uvelisa iiseli zokulwa nezifo xa ulele. Kwakhona, xa ulele umzimba uvelisa idlala elikwenza ufune ukutya. Eneneni umzimba ufuna ukulala ngokwaneleyo kanye njengokuba ufuna umthambo nokutya okunesondlo.

Ngaba awulali ngenxa yokuba usebenza ngokugqithiseleyo? Kuthekani ngamaxhala obomi kunye nokuxhalabela ikamva? UKumkani uSolomon owayesisilumko wakha wathi: “Bumnandi ubuthongo bokhonzayo, enoba udla kancinane okanye kakhulu; kodwa indyebo yesityebi ayisivumeli ukuba silale.”—INtshumayeli 5:12.