Ixilongo Elide—Lokhuni

KANGANGEENKULUNGWANE, abanye abantu bemimandla yeeNtaba zaseSwitzerland bebesebenzisa ixilongo elide lokhuni ukuze banxibelelane. Xa ulijongile, akunakutsho ukuba eli xilongo liluncedo—kaloku amanye awo made ngendlela ebaxiweyo. Sekunjalo, eli xilongo likhaphukhaphu. Amanye ayakhululeka abe zizijungqu eziliqela ezinokufakwa etyesini. Xa ukummandla weentaba zaseSwitzerland, isandi seli xilongo unokusiva naxa ukumgama weekhilomitha ezilishumi ukusuka kwindawo elikhaliswa kuyo.

Indlela Elenziwa Ngayo

Eli xilongo lokhuni elidla ngokwenziwa ngohlobo oluthile lomthi wompayina wasezintabeni lixhaphakile kummandla weeNtaba zaseSwitzerland. Imozulu kunye nendawo ekhula kuyo le mithi yenza izikhondo zayo zibe zikhulu.

Emva kokukhetha umthi, umntu owenza eli xilongo uyawugawula, awunqumle kubini aze akrolonqe umphakathi wawo. Lo msebenzi nje uwodwa unokuthatha iiyure ezingama-80! Emva koko, ulungisa umphakathi wawo ukuze ugude aze adibanise amacala awo amabini ngeglu. Kwakhona wenza uluthi olufutshane lokuxhasa eli xilongo xa livuthelwa. Emva kokulifakela umlomo aze alihombise, ixilongo lakhe uliqaba ngesikhazimlisi esilinceda lingangenwa ngamanzi.

Indlela Ebelisoloko Lisetyenziswa Ngayo

Ukutyhubela izizukulwana, abelusi babevuthela eli xilongo xa besemadlelweni ukuze baqinisekise iintsapho zabo ukuba yonke into isahamba kakuhle. Kodwa ke ngokuyintloko babelivuthela ukuze babize iimazi zeenkomo xa ziza kusengwa. Abafuyi beenkomo zobisi baseSwitzerland bebesoloko bekholelwa ukuba isandi esimyoli seli xilongo senza ezi mazi zingabi ndlongo-ndlongo xa zisengwa.

Ngexesha lasebusika xa iinkomo zingakhatshelelwa emadlelweni, abelusi abaninzi babedla ngokuya edolophini ukuze bakhalise amaxilongo abo ukuze bafumane imali. Eli xilongo likhe lasetyenziswa naxa kuqokelelw’ amadoda emfazwe.

Likhaliswa Njani?

Xa uqala ukulibona, ungacinga ukuba kulula ukukhalisa eli xilongo. Kakade ke alinabugocigoci. Kodwa ke ingxaki kukulivuthela ukuze likhale ngendlela oyithandayo.

La maxilongo akwazi ukukhupha izandi ezahlukahlukeneyo ezili-12 nje kuphela. Nangona kukho iingoma ongenakukwazi ukuzidlala ngeli xilongo, zikho ezikhala kamnandi xa uzidlala kulo yaye kukho iincutshe ezikwaziyo ukudlala uncuthu lweengoma ezahlukahlukeneyo.

Abaqambi beengoma abadumileyo bakhe balidlala eli xilongo kwiingoma zabo zeokhestra. Ngokomzekelo, uLeopold Mozart—uyise kaWolfgang Amadeus Mozart—waqamba “iSinfonia Pastorella” yeokhestra necorno pastoritio—uhlobo oluthile lweli xilongo. UBrahms wakha walinganisa indlela elikhala ngayo eli xilongo esebenzisa ifleyiti nophondo, ukanti noBeethoven wakwenza oko xa wayecula ngobomi basemadlelweni kwiPastoral symphony yakhe.

Eli xilongo lavela okokuqala kwiincwadi zaseSwitzerland ngowe-1527, kwincwadi yezimali yendlu yoonongendi baseSt. Urban. Namhlanje, nangona sele kudlule iminyaka emalunga nama-500, ingoma emyoli ephuma kweli xilongo isavakala kumathafa athi ndijonge kweliya laseSwitzerland.

[Umfanekiso okwiphepha 15]

Eli xilongo linokukhululwa lize lifakwe etyesini