Ileta Evela EUnited States

Ukutyelela Abantu Abasadla Ngendeb’ Endala

KHAWUTHELEKELELE indlela ekunokuba mnandi ngayo ukubona indlela ababephila ngayo ookhokho bakho. Mna nomfazi wam singatsho sithi sakha sayibona loo nto. Sasuka eSwitzerland saya eUnited States. Abantu abaninzi bacinga ukuba yonke into yaseUnited States yeyala maxesha, kodwa uhambo lwethu lwasibuyisela kumakhulu amabini eminyaka eyadlulayo. Makhe sikubalisele ngalo.

Ekubeni sithetha isiJamani saseSwitzerland sacelwa ukuba siye kuchitha iinyanga ezintathu kwiphondo laseIndiana. Sasifuna ukushumayela iindaba ezilungileyo zoBukumkani bukaThixo kuma-Amish asathetha ulwimi lookhokho bawo. Amakhulu ezi ntsapho ahlala eIndiana.

Ama-Amish aphuma kumnombo wama-Anabaptists enkulungwane ye-17. Athiywa ngegama lenkokeli yawo uJacob Amman owayehlala eSwitzerland. Abo bantu boyika uThixo bathi xa befunda iBhayibhile babona ukuba kwakuphosakele ukuphehlelela abantwana nokuya emkhosini. Loo nto yabenza batshutshiswa ngurhulumente. Abanye bada babulawa. Intshutshiso yaya iqinisa kangangokuba abanye babo kwanyanzeleka ukuba babhace baye kweminye imimandla yaseSwitzerland naseFransi. Kwathi kuba sembindini wenkulungwane ye-19 abe amawaka abo sele esabele eUnited States. Abazange bayilahle inkcubeko nolwimi lwabo.

Ukufika kwethu kwindawo abahlala kuyo, bothuka bakusiva sithetha ulwimi lwabo. Khawube nomfanekiso ngqondweni wabo besibuza le mibuzo ngolwimi lwabo:

“Nilwazela phi ulwimi lwethu?”

Saphendula sathi: “Kaloku sisuka eSwitzerland.”

Bemangalisiwe bathi: “Kodwa aningoma-Amish nje!”

Uninzi lwabo lwasamkela ngezandla ezishushu, yaye sabona ukuba babesadla ngendebe endala. Endaweni yezibane zombane banezeoli, abahambi ngemoto kodwa bakhwela amahashe neenqwelo zawo, amanzi bawakha emaquleni yaye abanaziiradio kodwa bacula ngokwabo.

Eyona nto yasichukumisayo kukuthobeka kwabo sasibatyelele. Ama-Amish amaninzi ayifunda yonke imihla iBhayibhile yaye ayakuthanda ukuncokola ngayo. Loo nto yasivulela ithuba lokuthetha nabo ngenjongo kaThixo ngabantu nomhlaba.

Akuzange kube kudala kwavakala ukuba kufike iindwendwe ezivela eSwitzerland. Abaninzi basicela ukuba siye nakwizalamane zabo. Sachulumanca gqitha xa sacelwa ukuba siye kwisikolo sabantwana babo. Sasikhangele phambili ekuboneni ukuba sasinjani eso sikolo.

Safika sankqonkqoza. Utitshala wavula waza wasingenisa ngaphakathi saza safika kukho abantwana abangama-76 ababesithe ntsho ngamehlo. Kweli gumbi linye kufundela iiklasi ezisibhozo, ezinabantwana abasusela kwiminyaka esixhenxe ukuya kweli-15 ubudala. Amantombazana anxiba iyunifom eblowu neekepusi ezimhlophe, amakhwenkwe wona anxiba iibhulukhwe ezimnyama neehempe eziblowu. Le klasi yayisilingiwe. Iindonga zayo zazipeyintwe ngombala oblowu, kuze kubekho nebhodi yokubhala exhonywe ngaphambili. Kwakukho imaphu yehlabathi kunye nesitovu samalahle ekoneni.

Abafundi basijonga ngomdla njengoko sasihlala phantsi ngaphambi kwabo. Iklasi nganye ibizelwa etafileni ngutitshala ize ibuzwe ngomsebenzi wesikolo ebekuthiwe iwenze ekhaya. Kwasimangalisa gqitha ukuva utitshala efundisa abantwana ngeentaba zaseSwitzerland. Noko ke, iincwadi abazisebenzisayo zindala kakhulu, kangangokuba utitshala wasibuza enoba iSwitzerland iyafana na naleyo echazwe kuzo. Ngokomzekelo wasibuza ukuba: Ngaba iinkomo zisakhatshelwa emadlelweni ehlotyeni nokuthi ngaba ikhephu lisawa ezintabeni? Wancuma xa sambonisa iifoto zethu ezibonisa ikhephu phezu kwezo ntaba, ezifana nezo zazikwincwadi yakhe.

Inkosikazi katitshala ekwalisekela lakhe yasibuza umbuzo ababesibuze wona abantu abaninzi, isithi: “Niyakwazi ukucula?” Sathi asikwazi. Noko ke, ekubeni siyazi indlela acula kamnandi ngayo ama-Amish sawacela ukuba asiculele. Avuma, yaye saphulaphula uncuthu lwengoma yabantu abangama-40. Emva koko abantwana bakhululwa baya kudlala.

Emva koko inkosikazi katitshala yacela ukuba nathi sikhe sibaculele. Savuma ukucula ekubeni ekho amaculo esiwaziyo abantu baseSwitzerland abathetha isiJamani. Abantwana besikolo beva ukuba sasicula yaye babuya bebaleka ukuza kusiphulaphula. Sema phambi kwaloo klasi saza sacula kangangoko sasinako.

Emva koko samenywa ukuba siye kudla isidlo sasemini nenye intsapho yama-Amish enamalungu ali-12. Kwabekwa etafileni iintlobo ngeentlobo zokutya, iitapile, inyama, umbona, isonka, imifuno nezinye izimuncumuncu. Ngaphambi kokuba sitye ngamnye wazenzela umthandazo wakhe entliziyweni. Njengoko sasisitya, sancokola ngeSwitzerland, ilizwe lookhokho babo, nabo basichazela ngobomi basefama. Abantwana babesebeza yaye bemane begigitheka njengoko sasisitya. Emva kokutya, kwenziwa omnye umthandazo, ukuze kukhululwe abantwana baye kuhlamba izitya.

Ngoxa abantwana behlamba izitya, abazali basibizela kwigumbi lokuphumla. Kwakungekho zisofa, ngoko sahlala kwizitulo zeplanga. Bakhupha iBhayibhile endala yesiJamani, yaye saba nencoko eshushu yeBhayibhile. Sasincokola ngemibuzo efana nale: Iyintoni injongo kaYehova uThixo ngomhlaba nabantu? Wayethetha ukuthini uYesu xa wayesithi abantu abalulamileyo baza kuwudla ilifa umhlaba? Ngaba uThixo uza kubathuthumbisa esihogweni abantu ngonaphakade? Ngobani abathobela umyalelo kaYesu wokushumayela iindaba ezilungileyo emhlabeni wonke? Kwasivuyisa gqitha ukuncokola ngezi zinto nezinye ezininzi nabantu abayithandayo iBhayibhile.

Kuthi nco ngaphakathi xa sicinga ngolo hambo. Sinethemba yaye sithandazela ukuba izinto esathetha ngazo nabantu balapho zazivula iintliziyo zabantu abaninzi balapho ukuze zamkele ulwazi oluchanileyo lwenyaniso efumaneka kwiLizwi likaThixo iBhayibhile.