Oonobangela Bokungabikho Kokusesikweni — IWatchtower LAYBRARI EKWI-INTANETHI

Oonobangela Bokungabikho Kokusesikweni

PHANTSE kwiminyaka engamawaka amabini eyadlulayo, iBhayibhile yayichaza kakuhle indlela ababeza kuziphatha ngayo abantu balo mhla wethu. Yathi: “Ngemihla yokugqibela kuya kufika amaxesha amanqam ekunzima ukujamelana nawo. Kuba abantu baya kuba ngabazithandayo, abathandi bemali, . . . abangenambulelo, abanganyanisekanga, abangenawo umsa wemvelo, abangayifuni kwaphela imvisiswano, . . . abangathandi kulunga, abangcatshi, abaneentloko ezilukhuni, abakhukhumele likratshi, abathandi beziyolo kunokuba bathande uThixo.”—2 Timoti 3:1-4.

Bambalwa abantu abanokuphika ukuba loo mikhwa mibi ixhaphakile namhlanje. Iboniswa ngeendlela ezininzi, kuquka ukubawa, umkhethe, ukungafuni kuhlala nabantu, urhwaphilizo nomahluko ongathethekiyo phakathi kwabo banemali nabangenayo. Khawucinge ngaba bantu.

UKUBAWA. Maxa wambi, sikhe sive amazwi athi, “Yinto entle ukubawa” nathi “Kulungile ukubawa.” Noko ke, bubuvuvu bonke obo. Ukubawa kubangela intlungu! Ngokomzekelo, ukubawa kudla ngokwenza abantu baqhathe abanye, bavule utyalo-mali ukuze batye imali yabantu kuquka ukuboleka nokubolekisa ngemali ngokungakhathali. Oku kukhokelela ekuweni kwezoqoqosho, into eye yabangela intlungu kwabaninzi. Yinyaniso ukuba abanye baba ngamaxhoba ngenxa yokuba nabo bebawa. Kodwa kuloo maxhoba abanye ngabantu abasebenza nzima, bambi bade baphulukane nemizi nemali yabo yomhlala-phantsi.

UMKHETHE. Abantu abanomkhethe bagweba abanye ngokungafanelekanga de babacalule ngenxa yohlanga abalulo, ibala labo, isini, umgangatho abakuwo okanye unqulo. Ngokomzekelo, ikomiti yeZizwe Ezimanyeneyo yafumanisa ukuba kwelinye lamazwe akuMzantsi Merika, ibhinqa elithile elalikhulelwe lafela esibhedlele kuba lacalulwa kwesinye isakhiwo ngenxa yobuhlanga nomgangatho wobomi balo. Xa sele uqatsele, umkhethe ude ukhokelele kwizenzo zokungekho sesikweni ezingathethekiyo zokubulawa kohlanga.

UKUNGAFUNI KUHLALA NABANTU. Ushwankathelo lweHandbook of Antisocial Behavior lwathi: “Nyaka ngamnye zifikelela kumawaka iintsapho ezahlukanayo, konakaliswe ubomi babantu abafikelela kumakhulu amawaka kuze kutshatyaliswe izindlu ezixabisa izigidi zeerandi ngenxa yomkhwa wokungafuni kuhlala nabantu. Kangangendlela oluxhaphake ngayo ugonyamelo nokuthand’ ukulwa namhlanje, mhlawumbi abantu abaya kubhala imbali yomhla wethu abayi kuthi ‘yayiliXesha Lokuya Esibhakabhakeni’ okanye ‘iXesha Lenkcazelo,’ kodwa baya kuwuchaza ngokuthi ‘liXesha Lokungafuni Bantu’—ixesha apho abantu babesilwa neziqu zabo.” Ukususela ekupapashweni kwaloo ncwadi ngowe-1997, akukhange kubekho nto ibhetele kwizimo zengqondo zokuziphatha kwabantu.

URHWAPHILIZO. Ingxelo yorhwaphilizo evela eMzantsi Afrika yathi kwisithuba seminyaka esixhenxe, kwimali engama-25.2 eebhiliyoni zeerandi enikwe isebe lezempilo lephondo, engaphezu kwama-81ekhulwini isetyenziswe kakubi. Iphephandaba iThe Public Manager lathi: Imali “ekwakumele kulungiswe ngayo izibhedlele, iikliniki namanye amaziko empilo akwelo phondo ayizange isetyenziswe.”

UMAHLUKO ONGATHETHEKIYO PHAKATHI KWABO BANEMALI NABANGENAYO Iphephancwadi iTime lanikela ingxelo yokuba ngowama-2005, phantse ama-30 ekhulwini kwimali yomvuzo wonyaka wabantu baseBritani “yaya kubantu aba-5 ekhulwini abangabona barhola gqitha.” Laphinda lathi, kwangaxeshanye ngaphesheya kweAtlantiki, imali engaphezu kwama-33 ekhulwini kumvuzo wabantu baseMerika yaya kubantu aba-5 ekhulwini abarhola kakhulu. Ehlabathini lonke, abantu abamalunga ne-1,4 bhiliyoni baphila ngeerandi ezisi-8 okanye ngaphantsi ngemini, ngoxa kusifa mihla le abantwana abangama-25 000 ngenxa yobuhlwempu.

Ngaba Sikho Isicombululo Sokungekho Sesikweni?

Ngowe-1987, owayesakuba yinkulumbuso yaseOstreliya wabeka usukelo lokuba ngowe-1990 kungabikho mntwana waseOstreliya uphila ebuhlwempini. Oko zange kwenzeke. Enyanisweni, kamva inkulumbuso yaseOstreliya yazisola ngoko.

Ewe, kungakhathaliseki ukuba lingakanani igunya, ubutyebi, okanye impembelelo anayo umntu, lo gama esengumntu akanakuze akuphelise okungekho sesikweni. Eneneni ke, kwanabo banegunya bayathwaxwa kokungekho sesikweni, baluphale baze bafe. Le nyaniso isikhumbuza ngala mazwi eBhayibhile:

“Asikokomntu ohambayo ukwalathisa inyathelo lakhe.”—Yeremiya 10:23.

‘Musani ukukholosa ngezidwangube, ezingenalo usindiso.’—INdumiso 146:3.

Ukuba siyakwamkela oko, asiyi kuphoxeka xa imigudu yabantu isilela ukuphelisa okusesikweni. Ngaba ke simele nje sisonge izandla? Nakanye! Njengokuba siza kubona kwinqaku lokugqibela lolu ngcelele, sele kumbovu ukuba siphile kwihlabathi eligquba okusesikweni. Noko ke, okwangoku ikho into esinokube siyenza. Simele sihlolisise iingcamango nezenzo zethu. Khawuzibuze oku: ‘Ngaba andinakuzabalazela ukubaphatha ngokusesikweni ngakumbi abanye? Ngaba zikho iinkalo endinokuphucula kuzo?’ Loo mibuzo iza kuxutyushwa kwinqaku elilandelayo.

[Imifanekiso ekwiphepha 4, 5]

A. Amapolisa eTshayina abamba umntu ngokuba nenxaxheba kugonyamelo lobuhlanga

B. Ukuphangwa nokonakaliswa kwempahla eLondon, eNgilani

C. Ubugxwayiba bobuhlwempu kwinkampu yeembacu eRwanda

[Inkcazelo]