Ihlabathi Elitsha Ngokwesithembiso Sikathixo

IBHAYIBHILE, eliLizwi likaThixo elibhaliweyo, isinika ithemba xa isithi: “Thina ke silindele amazulu amatsha nomhlaba omtsha, ngokwesithembiso sakhe, apho kumi ubulungisa.”—2 Petros 3:13.

Ayintoni “amazulu amatsha”? IBhayibhile inxulumanisa izulu nolawulo. (IZenzo 7:49) “Amazulu amatsha” ngurhulumente omtsha oya kulawula emhlabeni. Mtsha ngenxa yokuba uya kuthabathela indawo inkqubo ekhoyo yolawulo; kwakhona ulinyathelo elitsha lokufezwa kwenjongo kaThixo. BuBukumkani uYesu awasifundisa ukuba sibuthandazele. (Mateyu 6:10) Ekubeni uMnini wabo inguThixo yaye ehlala ezulwini, bubizwa ngokuba ‘bubukumkani bamazulu.’—Mateyu 7:21.

Uyintoni ‘umhlaba omtsha’? Ayisosijikelezi-langa sitsha ekubeni iBhayibhile iyenza icace into yokuba umhlaba uya kumiwa ngonaphakade. ‘Umhlaba omtsha’ ulibutho elitsha labantu. Uya kuba mtsha ngenxa yokuba abangendawo baya kunqunyulwa. (IMizekeliso 2:21, 22) Bonke abaya kuphila baya kuzukisa baze bahlonele uMdali yaye baya kuphila ngokuvisisana nemilinganiselo yakhe. (INdumiso 22:27) Abantu bazo zonke iintlanga bayamenywa ukuba bafunde loo milinganiselo baze baphile ngokuvisisana nayo ngoku. Ngaba wena uyakwenza oko?

Kwihlabathi elitsha likaThixo, wonke umntu uya kuluhlonela ulawulo Lwakhe. Ngaba uthando onalo ngoThixo lukushukumisela ukuba umthobele? (1 Yohane 5:3) Ngaba oku kuyabonakala ekhayeni lakho? emsebenzini okanye esikolweni? kwindlela ophila ngayo?

Kwelo hlabathi litsha ibutho labantu liya kumanyana kunqulo loThixo oyinyaniso. Ngaba unqula uMdali wezulu nomhlaba? Ngaba ngokwenene unqulo lwakho lukumanyanisa nabo ukhonza nabo nabavela kuzo zonke iintlanga, izizwe neelwimi?—INdumiso 86:9, 10; Isaya 2:2-4; Zefaniya 3:9.

[Ibhokisi ekwiphepha 17]

UThixo Othembisa Ezi Zinto

UnguMdali wamazulu okoqobo nesijikelezi-langa esinguMhlaba. Ungulowo wachazwa nguYesu Kristu ‘njengokuphela koThixo oyinyaniso.’—Yohane 17:3.

Abantu abaninzi banqula oothixo ababenze ngokwabo. Izigidi ngezigidi ziqubuda kwimifanekiso engaphiliyo. Abanye bazukisa amaziko abantu, izinto eziphathekayo, okanye iminqweno yabo. Kwanabo bathi bayayisebenzisa iBhayibhile abalizukisi igama lalowo imchaza ‘njengoThixo oyinyaniso.’—Duteronomi 4:35.

UMdali uthi xa ezichaza: “NdinguYehova. Lilo elo igama lam.” (Isaya 42:5, 8) Eli gama livela ngaphezu kwezihlandlo ezingama-7 000 kwiilwimi zantlandlolo zeBhayibhile. UYesu Kristu wafundisa abalandeli bakhe ukuba bathandaze bathi: “Bawo wethu osemazulwini, malingcwaliswe igama lakho.”—Mateyu 6:9.

UThixo oyinyaniso uluhlobo olunjani lomntu? Uzichaza ‘njengonenceba nobabalo, ozeka kade umsindo, onobubele bothando obuninzi nenyaniso’ nongabenzi msulwa abafanelwe sisohlwayo nabayaphula ngabom imiyalelo yakhe. (Eksodus 34:6, 7) Imbali ephathelele indlela abeqhubana ngayo noluntu ingqina ubunyaniso boko.

Yena negama lakhe bafanele bangcwaliswe. NjengoMdali noMongami Wendalo Iphela sifanele simthobele size simnqule. Ngaba wena uyakwenza oko?

[Ibhokisi/Umfanekiso okwiphepha 18]

Luluphi Utshintsho Oluya Kuziswa ‘Ngamazulu Amatsha Nomhlaba Omtsha’?

Umhlaba uba yiParadesi Luka 23:43

Umsebenzi owanelisayo, ukutya okuninzi Isaya 25:6; 65:17, 21-23

[Ibhokisi/Imifanekiso ekwiphepha 19]

Ngaba Uya Kungenelwa?

UThixo akanakuxoka!—Tito 1:2.

UYehova uthi: “Ilizwi lam . . . aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.”—Isaya 55:11.

UYehova sele edala ‘amazulu amatsha nomhlaba omtsha.’ Urhulumente wasezulwini sele elawula. Sele sibekiwe isiseko ‘sehlabathi elitsha.’

Emva kokuchaza ezinye izinto ezimangalisayo eziya kuziswa ‘lizulu elitsha nomhlaba omtsha’ kuluntu, iSityhilelo sicaphula uThixo onguMongami Wendalo Iphela, esithi: “Khangela! Zonke izinto ndizenza ntsha.” Aphinde athi: “Bhala, kuba la mazwi athembekile yaye ayinyaniso.”—ISityhilelo 21:1, 5.

Umbuzo obalulekileyo nanku, Ngaba senza uhlengahlengiso olufunekayo ukuze sikufanelekele ukuba phakathi kwabo bayinxalenye ‘yomhlaba omtsha’ phantsi ‘kwamazulu amatsha’?