Ukunikela Ingqalelo Kwasindisa Ubomi Babo

UYESU KRISTU walumkisa kusengaphambili ngesiphelo senkqubo yezinto yamaYuda eyayikwitempile yaseYerusalem. Akazange awuchaze umhla esasiza kufika ngawo. Kodwa wathetha ngeziganeko ezaziza kukhokelela kuloo ntshabalalo. Wabongoza abafundi bakhe ukuba bahlale belindile baze bawushiye ummandla oyingozi.

UYesu waprofeta: “Xa niyibona iYerusalem ingqongwe yimikhosi emise iintente, yazini ke ukuba kusondele ukuphanziswa kwayo.” Waphinda wathi: “Xa nibona into elizothe ebangela isiphanziso, . . . imi kwindawo engcwele, . . . mabandule abo bakwelakwaYuda basabele ezintabeni.” UYesu wabongoza abafundi bakhe ukuba bangabuyeli emva ukuze basindise izinto zabo eziphathekayo. Kwakungxamisekile ukuba babaleke ukuze basindise ubomi babo.—Luka 21:20, 21; Mateyu 24:15, 16.

Ukuze aphelise imvukelo ekwakukudala ikho, uCestius Gallus wakhokela imikhosi yamaRoma nxamnye neYerusalem ngowama-66 C.E. Wangena kweso sixeko waza wangqinga itempile. Kwabakho isaqunge kweso sixeko. Abo bahlala belindile babona ukuba intlekele isondele. Kodwa ngaba kwakulula ukubaleka? Ngokungalindelekanga, uCestius Gallus warhoxa namajoni akhe. Abavukeli abangamaYuda bawasukela. Elo yayilixesha lokubaleka eYerusalem nakulo lonke elakwaYuda!

Ngonyaka olandelayo, imikhosi yamaRoma yabuya sele ikhokelwa nguVespasian nonyana wakhe uTitus. Kwakugquba imfazwe kulo lonke elo lizwe. Ebutsheni bowama-70 C.E., amaRoma arhangqa iYerusalem ngezibonda ezibaziweyo. Kwakungekho mntu unokubaleka. (Luka 19:43, 44) Abantu babulalana kweso sixeko. Abaseleyo babulawa ngamaRoma abanye bathinjwa. Eso sixeko netempile yaso zatshatyalaliswa ngokupheleleyo. Ngokutsho kombhali-mbali ongumYuda wenkulungwane yokuqala uJosephus, ngamaYuda angaphezu kwesigidi awabandezelekayo aza afa. Loo tempile ayizange iphinde yakhiwe.

Ukuba amaKristu ayeseseYerusalem ngowama-70 C.E., ngewayebulewe okanye enziwe amakhoboka njengabanye abantu balapho. Kodwa ke, ababhali-mbali bamandulo banikela ingxelo yokuba amaKristu asithobela isilumkiso sikaThixo, abaleka eYerusalem nakulo lonke elakwaYuda aza aya kwiintaba ezikwimpuma yoMlambo iYordan. Amanye aya kuhlala ePella, ekwiphondo lasePereya. Alishiya elakwaYuda yaye akazange aphinde abuyele kulo. Ukuthobela isilumkiso sikaYesu kwasindisa ubomi bawo.

Ngaba Uyazithobela Izilumkiso Ezivela Kwimithombo Enokuthenjwa?

Emva kokuva ngezilumkiso ezahlukahlukeneyo ezingqineke zingeyonyaniso, abantu abaninzi baye bazithabathe lula zonke ezinye izilumkiso. Noko ke, ukuzithobela izilumkiso kunokusindisa ubomi bakho.

Ngowe-1975 kwakhutshwa izilumkiso zokuba kuza kuhlasela inyikima kwelaseTshayina. Amagosa aseburhulumenteni athabatha amanyathelo. Abantu basabela. Kwasinda amawakawaka abantu.

NgoAprili 1991 abo bahlala kumazantsi eNtaba iPinatubo ekwiiPhilippines, bachaza ukuba loo ntaba ilephuza umsi nothuthu. Emva kokuhlolisisa le meko kangangeenyanga ezimbini, i-Institute of Volcanology and Seismology yakwiiPhilippines yalumkisa ngentlekele eyayiza kwehla. Ngokukhawuleza, amashumi amawaka abantu akhutshwa kuloo ndawo. Ekuseni ngoJuni 15, kwabakho ugqabhuko-dubulo olukhulu lwaza udaka lwatsibela phezulu esibhakabhakeni, luwugubungela wonke loo mmandla. Ukunikela ingqalelo kwasindisa amawakawaka abantu.

IBhayibhile ilumkisa ngesiphelo sale nkqubo ikhoyo yezinto. Ngoku siphila kwimihla yokugqibela. Ngaba uhlala ulindile njengoko isiphelo sisondela? Ngaba wenza unako nako wokuwushiya ummandla oyingozi? Ngaba ngongxamiseko ulumkisa abanye ukuba benze ngendlela efanayo?

[Umfanekiso okwiphepha 20]

Ukunikela ingqalelo kwisilumkiso kwasindisa abantu abaninzi xa iNtaba iPinatubo yagqabhukayo

[Umfanekiso okwiphepha 21]

AmaKristu awasithobelayo isilumkiso sikaYesu asinda ekutshatyalalisweni kweYerusalem ngowama-70 C.E.