Ubomi Nobulungiseleli BukaYesu

Unyula Abapostile Bakhe

SEKUMALUNGA nonyaka onesiqingatha ukususela ekubeni uYohane uMbhaptizi wamazisa uYesu njengeMvana kaThixo yaye uYesu eqalise ubulungiseleli bakhe basesidlangalaleni. Ngelo xesha uAndreya, uSimon Petros, uYohane, yaye mhlawumbi noYakobi (umzalwana kaYohane), kunye noFilipu noNataniyeli (okwabizwa ngokuthi nguBartolomeyu), baba ngabafundi bakhe bokuqala. Ekuhambeni kwexesha, abanye abaninzi babathelela ekulandeleni uKristu.

Ngoku uYesu ulungele ukunyula abapostile bakhe. Aba baya kuba zizinxulumani zakhe ezisenyongweni eziya kuqeqeshwa ngokukhethekileyo. Kodwa ngaphambi kokuba abanyule, uYesu uya entabeni aze achithe ubusuku bonke ethandaza, ngokunokwenzeka ecela ubulumko nentsikelelo kaThixo. Kuthi ke kwakuba semini, abize abafundi bakhe aze phakathi kwabo anyule abali-12. Noko ke, ekubeni beqhubeka befundiswa nguYesu, basabizwa ngokuba ngabafundi.

Abapostile abathandathu uYesu abanyulayo, ababizwe ngamagama ngasentla, ngabo baba ngabafundi bakhe bokuqala. UMateyu, lowo uYesu wambiza kwindawo yakhe yokurhafisa, naye uyanyulwa. Abanye abahlanu abanyulwayo nguYuda (okwabizwa ngokuba nguTadeyu), uYuda Sikariyoti, uSimon umKanan, uTomas noYakobi unyana kaAlifeyu. Lo Yakobi ukwabizwa ngokuba nguYakobi Omnci, mhlawumbi kusenzelwa ukumahlula komnye uYakobi ongumpostile.

Ngeli xesha aba bali-12 bebenoYesu ithuba elithile, yaye ubazi kakuhle. Enyanisweni, abaninzi babo bazizalamane zakhe. Kuyabonakala ukuba uYakobi nomzalwana wakhe uYohane ngabaza bokuqala bakaYesu. Yaye kunokwenzeka ukuba uAlifeyu wayengumzalwana kaYosefu, uyise kaYesu ngokumkhulisa. Ngoko unyana kaAlifeyu, umpostile uYakobi, naye ubeya kuba ngumza kaYesu.

Kakade ke, uYesu akanangxaki ekukhumbuleni amagama abapostile bakhe. Kodwa ngaba unokubakhumbula? Kaloku, khumbula ukuba kukho ababini ababizwa ngokuthi Simon, ababini ababizwa ngokuthi Yakobi nababini ababizwa ngokuthi Yuda, nokuba uSimon unomzalwana wakhe uAndreya, nokuba uYakobi unomzalwana wakhe uYohane. Eso sisikhokelo sokukhumbula abapostile abasibhozo. Abanye abane baquka umqokeleli werhafu (uMateyu), omnye owathi kamva wamthandabuza (uTomas), omnye owabizwa phantsi komthi (uNataniyeli), nomhlobo wakhe uFilipu.

Abapostile abalishumi elinanye bavela eGalili, ummandla olikhaya likaYesu. UNataniyeli uvela eKana. UFilipu, uPetros noAndreya isinqe sabo siseBhetesayida. Noko ke, kamva uPetros noAndreya bafudukela eKapernahum ndawo leyo ekubonakala ukuba uMateyu wayehlala kuyo. UYakobi noYohane babengabalobi yaye kunokwenzeka ukuba nabo babehlala eKapernahum okanye kufuphi nakhona. Kubonakala ukuba uYuda Sikariyoti, owathi kamva wangcatsha uYesu, ukukuphela kompostile ovela kwaYuda. Marko 3:13-19; Luka 6:12-16.

◆ Ngabaphi abapostile ekusenokuba babezizalamane zikaYesu?

◆ Bangoobani abapostile bakaYesu, yaye unokuwakhumbula njani amagama abo?

◆ Abapostile babevela kuyiphi imimandla?

[Umfanekiso okwiphepha 9]

Ngaphambi kokuba akhethe abapostile bakhe abali-12, uYesu wachitha ubusuku bonke ethandaza kuYehova