Abavakalisi BoBukumkani Bayabalisa
Bafumana Isizathu Sokuguquka
NGABA amalungu amaqela emvukelo nabantu abanemvukelo banokwenza inguqulelo kwihambo yabo? Yintoni enokubanceda ukuba benjenjalo? Ukwenza iinguqulelo ezimangalisayo kwihambo kunokwenzeka njengoko kubonwa kwimeko kaSawule waseTarso, owayetshutshisa amaKristu waza waguqukela ekubeni ngumKristu. Emva koko waziwa njengompostile uPawulos. (Galati 1:13, 14; 1 Timoti 1:13) EKenya kunikelwa ingxelo yeenguqulelo ezikwanjalo ukuba zezimangalisayo.
◻ Omnye umfana wayelilungu leqela lemvukelo kummandla waseNairobi waza wathunywa entshona yeKenya ukuba aye kukhangela ukuba akukho ndlela zithile ekwakunokuqhekezwa ngazo iibhanki zalapho. Lo mfana wafumana indawo yokuhlala kwenye indoda esele ikhulile waza wafumana intaphane yamaphephancwadi amadala kaVukani! Lo mfana waba nomdla gqitha ekufundeni la maphephancwadi kangangokuba walibala kwaphela ngamacebo akhe okuqhekeza iibhanki. Emva kokuba efunde yonke into, wacela angakumbi, yaye le ndoda eyayisel’ ikhulile yamxelela ukuba kuya kufika libe linye ngeposi ngazo zonke iiveki ezimbini. Ukususela ngoko lo mfana wambongoza umninimzi ukuba suku ngalunye aye eposini ukuya kukhangela amaphephancwadi angakumbi. Ebudeni beli xesha, wenza isigqibo sokwahlukana neendlela zakhe ezingalunganga, ukuze alandele oko wayekufunde kula maphephancwadi, aze abe liNgqina likaYehova. Wade waqalisa nokuxelela abamelwane ukuba wayengomnye wamaNgqina kaYehova. Kamva, uvulindlela okhethekileyo wasebenza loo mmandla yaye wamangaliswa gqitha kukufumana lo mfana ezibiza ngokuba uliNgqina. Kwaqaliswa isifundo seBhayibhile kunye naye, wakhula ngokomoya, yaye namhlanje unguvulindlela othe ngxi. Ulwazi oluchanileyo lweBhayibhile lwamnika isizathu sokubuguqula ubomi bakhe.
◻ Kwakhona enye indoda yaseArgentina yafumana isizathu sokwenza inguqulelo kubomi bayo bogonyamelo. Kangangeminyaka engama-20, yayimphethe kakubi ngokugqithiseleyo umfazi wayo, owayeliNgqina. Kuthiwa yada yemba umngxuma ebaleni lomzi wayo yaza yagxumeka umnqamlezo emantla awo, ngenjongo yokubulala umntu owayesiba iinkuku zayo ize imngcwabe kuwo. Ngenxa yesi simo sale ndoda singathandekiyo, bonke abamelwane bayikwaya.
Umveleli wesiphaluka wayityelela. Ngoxa wayelapho, umveleli wesiphaluka wazinikela ukuba ayiqhubele isifundo seBhayibhile le ndoda yaye wamangaliswa xa yathi yayinokukuvuyela ukufundisisa iBhayibhile. Lo mzalwana wafunda incwadana enemifanekiso ethi Bunandiphe Ubomi Emhlabeni Ngonaphakade! kunye nayo. Le ndoda yenza inkqubela ekwazini iBhayibhile nasekuqondeni izinto zokomoya. Ngoku iya kuzo zonke iintlanganiso. Izithanda gqitha iintlanganiso nokunxulumana nabazalwana kangangokuba yada yathi, “Kulapha ke apho ndifuna ukuhlala khona.”
Inguqulelo yale ndoda yaba yephawuleka ngokokude abamelwane babuze umfazi wayo ukuba nguwuphi na ugqirha owayeyinyanga. Xa wacacisayo ukuba le nguqulelo yenzeke ngenxa yokuba yayifundisisa iBhayibhile namaNgqina kaYehova, omnye ummelwane wachukumiseka kangangokuba wafuna ukufumana iBhayibhile. Omnye ummelwane warhumela elinye lamaphephancwadi ethu.
Ulwazi oluchanileyo lweBhayibhile lwawanika la madoda isizathu sokwenza inguqulelo kubomi bawo, yaye lunokunceda nabani na onqwenela ubomi obunentsingiselo engakumbi ngoku nethemba lobomi obungunaphakade kwihlabathi elitsha likaThixo lolonwabo.—Yohane 17:3.