Ukuchaza Oko Ukuko Umoya Oyingcwele
NGABA ubusazi ukuba umoya oyingcwele uyabuchaphazela ubomi bethu sonke? Yaye ngaba ubuqonda ukuba unokubuphucula ngokuphawulekayo ubomi bakho? Oku kusenokukothusa. Enyanisweni, usenokubuza uthi: ‘Ungubani okanye uyintoni umoya oyingcwele?’
Ukuba ulilungu lenye yeecawa zeNgqobhoko, ngokunokwenzeka uye wamva umfundisi ephehlelela usana “egameni loYise, loNyana, loMoya oyiNgcwele.” (Mateyu 28:19) Xa icelwa ukuba ichaze umoya oyingcwele, inkoliso yabefundisi ikhawuleza iphendule ithi: ‘Umoya oyingcwele sisiqu sesithathu kuThixo onguBathathu Emnye, olingana ngazo zonke iindlela noThixo uYise neNkosi uYesu Kristu.’
Noko ke, le ngcamango yayingekho ebudeni beenkulungwane ezimbalwa zokuqala zeXesha lethu Eliqhelekileyo. Ngokomzekelo: Kwiinkulungwane ezinokuba ntathu emva kokufa kwabapostile bakaYesu Kristu, uGregory waseNazianzus wabhala oku: “Abanye bacinga ukuba [umoya oyingcwele] ungamandla (energeia), abanye bacinga ukuba usisidalwa, abanye bacinga ukuba unguThixo, abanye abakwazi kwenza sigqibo sokuba uyintoni na kwezi.”
Namhlanje, inkoliso yeecawa zeNgqobhoko yamkela ingcamango yomoya oyingcwele njengenxalenye kaBathathu Emnye. Kodwa ngaba oko koko kuxhaswa yiBhayibhile? Okanye ngaba kululuvo nje olusekelwe kwisithethe? Enyanisweni, iBhayibhile ayize ithethe ngomoya oyingcwele ngendlela ethetha ngayo ngoThixo okanye ngoYesu. Ngokomzekelo, eBhayibhileni, umoya oyingcwele awunagama lawo lobuqu.
Ngaba le yingongoma nje engabalulekanga? Akunjalo, amagama abalulekile eBhayibhileni. UThixo wagxininisa ukubaluleka kwegama lakhe xa wathi: “NdinguYehova, lilo elo igama lam; andiluniki omnye uzuko lwam, nendumiso yam andiyiniki imifanekiso eqingqiweyo.” (Isaya 42:8) Ukubaluleka kwegama likaYesu Kristu kwagxininiswa ngaphambi kokuzalwa kwakhe xa isithunywa sezulu saxelela uMariya oku: “Umthiye igama elinguYesu.” (Luka 1:31) Ukuba igama likaYise neloNyana libaluleke kangaka, kutheni wona umoya oyingcwele ungenagama lawo lobuqu? Ngokuqinisekileyo, le ngongoma iyodwa ifanele imenze umntu azibuze enoba ngokwenene umoya uyalingana kusini na noYise noNyana.
IZibhalo Nomoya Oyingcwele
KwiZibhalo zesiHebhere, okanye “iTestamente Endala,” kuthethwa ‘ngomoya oyingcwele’ ‘nangomoya [woThixo] wam.’ (INdumiso 51:11; Yoweli 2:28, 29) Sifunda ukuba umntu unokuzaliswa ngumoya oyingcwele, unokuthululwa phezu kwakhe, aze azaliswe nguwo. (Eksodus 31:3; ABagwebi 3:10; 6:34, NW) Inxalenye yomoya kaThixo oyingcwele inokuthatyathwa komnye umntu ize inikwe omnye. (Numeri 11:17, 25) Umoya oyingcwele unokusebenza komnye umntu, umenze akwazi ukwenza izenzo zamandla angaphaya kwawomntu.—ABagwebi 14:6; 1 Samuweli 10:6.
Sisiphi isigqibo esisengqiqweni ekunokufikelelwa kuso ngokuphuma kwiinkcazelo ezinjalo. Ngokuqinisekileyo asisisiso esokuba umoya oyingcwele ungumntu. Inxalenye yomntu inokuthatyathwa njani komnye umntu ize inikwe omnye? Ngaphezu koko, abukho ubungqina bokuba ngoxa uYesu wayesemhlabeni, amaYuda athembekileyo awujonga umoya oyingcwele njengomntu olingana noYise. Ngokuqinisekileyo ayengawunquli umoya oyingcwele. Kunoko, ayenqula uYehova kuphela, Lowo uYesu ngokwakhe wambiza ngokuthi “uBawo” nokuthi “uThixo wam.”—Yohane 20:17.
Njengoko kufane kubizwe ngokuba yiTestamente Endala, icandelo leBhayibhile elibizwa ngokuba ziZibhalo zamaKristu zesiGrike, okanye “iTestemente Entsha,” ithi umntu ‘unokuzaliswa’ ngumoya oyingcwele okanye ube “phezu” kwakhe. (IZenzo 2:4; Luka 2:25-27) Umoya oyingcwele ‘kwaphiswa ngawo,’ ‘wathululwa,’ waza ‘wabiwa.’ (Luka 11:13; IZenzo 10:45; Hebhere 2:4) NgePentekoste yowama-33 C.E., abafundi bamkele “omnye” womoya kaThixo. (IZenzo 2:17, NW) IZibhalo zikwathetha ngokubhaptizwa ngomoya oyingcwele nangokuthanjiswa ngawo.—Mateyu 3:11; IZenzo 1:5; 10:38.
Iinkcazelo ezinjalo zeBhayibhile zingqina ukuba umoya oyingcwele awungomntu. Esi sigqibo singxininiswa xa sibona ukuba umoya oyingcwele udweliswe nezinye izinto ezingengobantu. Ngokomzekelo, iBhayibhile ithi uStefano ‘wayezele lukholo nangumoya oyingcwele.’ (IZenzo 6:5) Yaye umpostile uPawulos wazibiza njengomlungiseleli kaThixo ‘onobunyulu, onokwazi, onokuzeka kade umsindo, onobubele, onomoya oyingcwele, onothando olungahanahanisiyo.’—2 Korinte 6:4-6.
Kuyinyaniso ukuba, ngamanye amaxesha iBhayibhile iyawumntwisa umoya oyingcwele. Ngokomzekelo, uIsaya wathi abavukeli abathile ‘bamenza buhlungu umoya kaThixo oyingcwele.’ (Isaya 63:10) UPawulos wathi ‘unokwenziwa buhlungu.’ (Efese 4:30) Yaye izibhalo eziliqela zithi umoya oyingcwele uyafundisa, uyakhokela, uyathetha, yaye unikela ubungqina. (Yohane 14:26; 16:13, 14; 1 Yohane 5:7, 8) Kodwa iBhayibhile ikwazimntwisa nezinye izinto ezingaphiliyo, ezinjengobulumko, ukufa nesono. (IMizekeliso 1:20; Roma 5:17, 21) Eneneni le yindlela ecacileyo ezithi iZibhalo ngamaxesha athile ziyibeke ngayo imibandela.
Namhlanje, sithetha ngeBhayibhile ngendlela efanayo xa sisithi ithetha okuthile okanye ifundisa imfundiso ethile esisiseko. Ekusebenziseni amabinzana anjalo, asithethi kuthi iBhayibhile ingumntu, akunjalo na? NeBhayibhile ayithethi kuthi umoya oyingcwele ungumntu xa isebenzisa amabinzana afana nalawo.
Ngoko, uyintoni umoya oyingcwele? Awungomntu. Kunoko, ungamandla kaThixo asebenzayo, asetyenziswa nguye ukuphumeza ukuthanda kwakhe. (Genesis 1:2) Kodwa ubomi bethu buchatshazelwa njani ngumoya oyingcwele? Yaye sinokungenelwa ngakumbi njani ngokobuqu kukusebenza kwawo?