Thetha Intetho Enyulu Uze Uphile Ngonaphakade!
“Funani uYehova...Funani ubulungisa, funani ululamo, mhlawumbi nositheliswa ngemini yomsindo kaYehova.”—ZEFANIYA 2:3.
1. (a) Ziziphi iindlela abafundi abazisebenzisayo ukufunda intetho yasemzini? (b) Kutheni simele sithethe intetho enyulu?
ABAFUNDI basenokufunda ulwimi olutsha ngokusebenzisa indlela yomgaqo-ntetho okanye indlela oluthethwa ngayo. Ngomgaqo-ntetho, ngokuqhelekileyo basebenzisa iincwadi zesikhokelo baze bafunde imithetho yomgaqo-ntetho. Xa befunda indlela oluthethwa ngayo, balinganisa izandi kwanamagama asetyenziswa ngulowo ubafundisayo. Kusetyenziswa ezi ndlela zombini ekufundeni “intetho enyulu.” Yaye kubalulekile ukuba siyithethe le ntetho ukuba sithemba ‘ukusitheliswa ngemini yomsindo kaYehova.’—Zefaniya 2:1-3; 3:8, 9.
2. Sinokukufunda njani oko kunokubizwa ngokuba yimithetho yomgaqo-ntetho yentetho enyulu?
2 Eyona ncwadi yesikhokelo isetyenziswayo ekufundeni intetho enyulu yiBhayibhile. Ukuyifundisisa ngenkuthalo yona neempapasho zamaKristu ezisekelwe eBhayibhileni kukufundisa oko kunokubizwa ngokuba yimithetho yomgaqo-ntetho yentetho enyulu. Isifundo seBhayibhile sekhaya esiqhutywa ngomnye wamaNgqina kaYehova sisiqalo esihle. Kwabo sele bezahlulele kuThixo, kubalulekile ukuzifundisisa rhoqo nangenkuthalo iZibhalo. Kodwa ngaba kukho iindlela ezinempumelelo ngokukhethekileyo zokufunda intetho enyulu? Kwaye ziyintoni iingenelo zokuyithetha?
Indlela Yokufunda Intetho Enyulu
3. Yiyiphi enye indlela yokufunda intetho enyulu?
3 Enye indlela yokufunda intetho enyulu kukunxulumanisa iinyaniso ozifundayo neengongoma osele uzazi kakade, njengoko nalowo ufunda ulwimi oluthile esenokuthi ngokwenza inkqubela athelekise imithetho yomgaqo-ntetho eyahlukahlukeneyo. Ngokomzekelo, ngaphambili usenokuba wawusazi ukuba uYesu Kristu unguNyana kaThixo, kodwa wawungazi kangako ngemisebenzi yakhe. Ukususela ngoko, ukufundisisa iBhayibhile kusenokuba kukufundise ukuba uKristu uyalawula ngoku njengoKumkani wasezulwini nokuba ebudeni boLawulo lwakhe Lweminyaka Eliwaka, uluntu oluthobelayo luya kubuyiselwa emfezekweni. (ISityhilelo 20:5, 6) Ewe, ukunxulumanisa iingcamango ezintsha nezo sele uzazi kuya kuphucula ukuyiqonda kwakho intetho enyulu.
4. (a) Yiyiphi enye indlela yokufunda ‘imithetho yomgaqo-ntetho’ yentetho enyulu, kwaye yiyiphi ingxelo yeBhayibhile esetyenzisiweyo ukucacisa oku? (b) Kwenzeka ntoni njengoko uGidiyon namadoda akhe angamakhulu amathathu babethabatha isenzo? (c) Ingxelo engoGidiyon ifundisa siphi isifundo?
4 Enye indlela yokufunda ‘imithetho yomgaqo-ntetho’ yentetho enyulu kukuba nomfanekiso-ngqondweni weziganeko ezibhalwe eBhayibhileni. Ngokomzekelo: Khawuzame ‘ukubona uze uve’ ingxelo ebhalwe kuBagwebi 7:15-23. Khangela! Umgwebi wakwaSirayeli uGidiyon uye wahlulahlula imikhosi yakhe yangamaqela amathathu abunjwe ngamadoda alikhulu lilinye. Ebumnyameni, ayachwechwa ehlisa iNtaba yaseGilibhowa aze arhangqe inkampu yamaMidiyan aleleyo. Ngaba ayexhobe ef’ amacala la madoda angamakhulu amathathu? Ngokwezomkhosi, kwakungenjalo. Kaloku, ayeya kuba azenza isigculelo esiyintlekisa kuloo magorha ayenekratshi! Ndoda nganye yayiphethe kuphela isigodlo, umphanda omkhulu wamanzi nesibane esiphakathi kuloo mphanda. Kodwa phulaphula! Kwakuba kunikelwe umqondiso, amadoda alikhulu anoGidiyon avuthela izigodlo zawo aze ayiqhekeze imiphanda yawo yamanzi. Aze enjenjalo namanye angamakhulu omabini. Njengoko onke ephakamisela phezulu izibane zawo ezivuthayo, uyaweva edanduluka esithi: “Ikrele likaYehova, likaGidiyon!” Hayi indlela oku okuwatyhwatyhwisa ngayo amaMidiyan! Ayagxadazela ephuma ezintenteni zawo, amehlo awo azele bubuthongo avulwe nje ndwanya ngenxa yokoyika amadangatye adanyazayo enza kubonakale imithinzana engacacanga aze abangele uloyiko lwezinto zasebusuku. Njengoko amaMidiyan eqalisa ukusaba, imikhosi kaGidiyon iyaqhubeka ivuthela izigodlo zayo yaye uThixo ubangela ukuba iintshaba zilwe zodwa. Esinjani sona ukuba namandla isifundo sentetho enyulu! UThixo unokubahlangula abakhonzi bakhe ngaphandle kokusebenzisa imikhosi engabantu. Ngaphezu koko, “uYehova akayi kubashiya abantu bakhe, ngenxa yegama lakhe elikhulu.”—1 Samuweli 12:22.
5. Iintlanganiso zamaKristu zinokunceda njani ekuphuculeni intetho yethu?
5 Xa abafundi befundiswa ulwimi lwasemzini ngendlela yokuthetha intetho esetyenziswayo, baye bazame ukulinganisa izandi namagama asetyenziswa ngumfundisi-ntsapho. Ibe anjani wona ukuba mahle amathuba okuthetha intetho enyulu akhoyo kwiintlanganiso zamaKristu! Apho siva abanye beyithetha loo ntetho yenyaniso yeZibhalo, ibe ke nathi sisenokuba nelungelo lokugqabaza. Ngaba soyika ukuba sisenokuthetha okuthile okuphosakeleyo? Masingazixhalabisi ngaloo nto, kuba impazamo elungiswe ngobubele ngumdala owongamela loo ntlanganiso njengeSifundo seeveki ngeeveki seMboniselo inokuyiphucula indlela esithetha ngayo. Ngoko ke, yibakho rhoqo kwiintlanganiso zamaKristu uze ube nenxaxheba.—Hebhere 10:24, 25.
Ukungenelela Kokungcola
6. Kutheni kukho ukungafani phakathi kwamaNgqina kaYehova neentlangano zonqulo zeNgqobhoko?
6 Abo bavakalisa injongo kaYehova noBukumkani bakhe basezulwini bathetha intetho enyulu njengamaNgqina akhe. Bazisa igama lakhe yaye bamkhonza “ngaxhatha linye,” okanye ngokungqinelanayo. (Zefaniya 3:9) Nangona iinkonzo zeNgqobhoko zineBhayibhile, azithethi ntetho inyulu yaye azinquli igama likaThixo zinokholo. (Yoweli 2:32) Azinaso isigidimi esivisisanayo esisekelwe kwizibhalo. Kutheni? Kungenxa yokuba zixabise izithethe zonqulo, iintanda-bulumko zehlabathi nokunyaniseka kwezobupolitika ngaphezu kweLizwi likaThixo. Injongo zazo, amathemba azo neendlela zazo zonke zizezeli hlabathi lingendawo.
7. Nguwuphi umahluko okhoyo phakathi kwamaNgqina kaYehova nonqulo lobuxoki oboniswe kweyoku-1 kaYohane 4:4-6?
7 INgqobhoko—enyanisweni, bonke ubukhosi behlabathi bonqulo lobuxoki—ayithethi intetho efanayo naleyo ithethwa ngamaNgqina kaYehova. Okubangela umdla kukuba, kwabo bathetha intetho enyulu, umpostile uYohane wabhala oku: “Nina ningabakaThixo, . . . nibeyisile bona; ngokuba lowo ukuni ngoyena mkhulu kunalowo usehlabathini. Bona ngabehlabathi; ngenxa yoko bathetha okwehlabathi, ihlabathi liyabeva ke. Thina singabakaThixo, lowo umaziyo uThixo uyasiva thina; ongengokaThixo akasiva.” (1 Yohane 4:4-6) Abakhonzi bakaYehova baboyisile abafundisi bobuxoki ngenxa yokuba uThixo, onabantu bakhe, “mkhulu kunalowo [uMtyholi] usehlabathini,” ibutho labantu abangemalungisa. Ekubeni abawexuki ‘bengabehlabathi’ yaye benomoya walo ongendawo, “bathetha okwehlabathi, ihlabathi liyabeva ke.” Kodwa abantu ababumvu bayabaphulaphula abo bangabakaThixo, beqonda ukuba abantu bakaYehova bathetha intetho enyulu yenyaniso yeBhayibhile enikelwa ngentlangano yakhe.
8. Uyintoni umchasi-mthetho?
8 Uwexuko olukhulu lwaxelwa kusengaphambili, yaye “imfihlelo yokuchasana nomthetho” yayisele isebenza kakade kwinkulungwane yokuqala yeXesha Eliqhelekileyo. Ekuhambeni kwexesha, amadoda awamkela—okanye awaxhakamfula—imbopheleleko yokufundisa ebandleni afundisa iimfundiso ezisisiseko ezininzi zobuxoki. Intetho yawo yayingenyulu konke konke. Ngenxa yoko kwavela “umchasi-mthetho” oyintlanganisela, abefundisi beNgqobhoko, abanamathela kwizithethe zonqulo lobuxoki, intanda-bulumko yehlabathi neemfundiso ezingasekelwanga kwizibhalo.—2 Tesalonika 2:3, 7, NW.
Intetho Enyulu Eviwa Ehlabathini Lonke
9. Ziziphi iinguqulelo kwezonqulo ezazikho ebudeni benkulungwane ye-19?
9 Yimbinana engephi kuphela yabantu aboyika uThixo ‘eyazabalazayo isilwela ukholo olo lwanikezwa kwakanye abangcwele.’ (Yuda 3, NW) Ayenokufunyanwa phi amakholwa anjalo? Kangangeenkulungwane, unqulo lobuxoki luye lwagcina abantu abaninzi besebumnyameni ngokomoya, yaye uThixo wayelazi elo qaqobana lalinenkoliseko yakhe. (2 Timoti 2:19) Kwandula ke, phakathi kweenguqulelo zezoshishino, zezorhwebo nezentlalo zenkulungwane ye-19, kwavakala amazwi awathi ahluka kwisidubedube esiqhelekileyo sesiphithiphithi sonqulo. Amaqela amancinane azama ukufunda imiqondiso yamaxesha aze axele kwangaphambili ukuza kwesibini kukaYesu, kodwa asingawo onke awayethetha intetho enyulu.
10. Liliphi iqela elalivakalisa ‘ukubuya kwesibini’ uThixo awalikhethayo ukuba lithethe intetho enyulu, yaye kutheni kubonakala ukuba isandla sikaYehova besinalo?
10 Noko ke, ngowe-1879, lacaca elona lizwi elavakalisa ‘ukubuya kwesibini’ elalikhethwe nguYehova ukuba lithethe intetho enyulu njengamaNgqina akhe. Ngelo xesha iqela elincinane elalifundisisa iBhayibhile nelalikhokelwa nguCharles Taze Russell lalihlanganisana ePittsburgh, ePennsylvania, eUnited States. Laliqinisekile ukuba ukuza kwesibini kukaYesu kwakuya kuqalisa ngobukho bakhe obungabonakaliyo, laliqinisekile ukuba ixesha lokucinezeleka kwehlabathi lalingaphambili, nokuba lona laliya kulandelwa “luLawulo lukaKristu Lweminyaka Eliwaka olwaluza kubuyisela iParadisi emhlabeni, nobomi obungunaphakade kubantu abathobelayo. NgoJulayi 1879 aba Bafundi beBhayibhile baqalisa ukupapasha iphephancwadi ngoku elaziwa njengeMboniselo. Kwinkupho yayo yokuqala kwasasazwa imibhalo engama-6 000 kuphela. Kodwa “isandla seNkosi” sasinaloo maNgqina, kuba ngoku lo lindixesha upapashwa ngeelwimi ezili-111 ngomlinganiselo wokushicilelwa ongaphezu kwezi-15 000 000 kwinkupho nganye.—Thelekisa IZenzo 11:19-21.
11, 12. Ziziphi ezinye zeenyaniso zeBhayibhile eziqondwayo ngabo bathetha intetho enyulu?
11 NgeBhayibhile nangeempapasho zamaNgqina kaYehova, ibe ngokukodwa nangokuvakalisa kwala maKristu anenzondelelo iindaba ezilungileyo, intetho enyulu iye yavakaliswa kuwo wonke umhlaba. Ibe ezinjani zona ukuzuka iingenelo ezinanditshwa ngabo bayithethayo! Kunokuba bathi ‘uThixo unguThixo, uKristu unguThixo noMoya oyiNgcwele unguThixo’ ngolwimi oluyimfihlelo lwabo baxhasa imfundiso kaBathathu Emnye, bavumelana neBhayibhile ethi uYehova ungOsenyangweni, uYesu Kristu njengomncinane unguNyana Wakhe, nokuba umoya oyingcwele ungamandla kaThixo amangalisayo nasebenzayo. (Genesis 1:2; INdumiso 83:18; Mateyu 3:16, 17) Abo bathetha intetho enyulu bayazi ukuba umntu akazange avele kuhlobo oluthile oluphantsi lobomi kodwa wadalwa nguThixo onothando. (Genesis 1:27; 2:7) Bayaqonda ukuba umphefumlo uyayeka ukuphila ekufeni—isibakala esiphelisa ukoyika abafileyo. (INtshumayeli 9:5, 10; Hezekile 18:4) Isihogo siqondwa njengengcwaba eliqhelekileyo loluntu; kungekhona indawo yokuthuthumbisa ngomlilo eyenziwe nguthixo okhohlakeleyo. (Yobhi 14:13) Kwakhona bayazi ukuba uvuko lulithemba elinikelwe nguThixo ngabafileyo.—Yohane 5:28, 29; 11:25; IZenzo 24:15.
12 Abo bathetha intetho enyulu babonisa intlonelo ngegazi nobomi. (Genesis 9:3, 4; IZenzo 15:28, 29) Bayaqonda ukuba ubomi basemhlabeni bukaKristu bulixabiso lentlawulelo elahlawulela uluntu oluthobelayo. (Mateyu 20:28; 1 Yohane 2:1, 2) Abaze bathandaze “kwiingcwele,” ekubeni besazi ukuba imithandazo yabo imele ibhekiswe kuYehova uThixo ngoYesu Kristu. (Yohane 14:6, 13, 14) Ekubeni iLizwi likaThixo lilugatya unqulo-zithixo, imifanekiso eqingqiweyo ayisetyenziswa kunqulo lwabo. (Eksodus 20:4-6; 1 Korinte 10:14) Yaye bayaziphepha iingozi ezibangelwa bubudemon ngenxa yokuba bayalugatya unqulo lwemimoya, olugwetywayo nayiBhayibhile.—Duteronomi 18:10-12; Galati 5:19-21.
13. Kutheni abo bathetha intetho enyulu bengadidekanga?
13 Abakhonzi bakaYehova, abathetha intetho enyulu, abadidekanga ngokuba bami phi kumsinga wexesha. UYehova ubafundisile ukuba ‘bakwixesha lokuphela,’ uYesu ekho njengomoya ozukileyo ongabonakaliyo. (Daniyeli 12:4; Mateyu 24:3-14; 2 Timoti 3:1-5; 1 Petros 3:18) Ekhokela imikhosi yasezulwini enamandla, uKristu sele eza kuqalisa idabi ukuze aphumeze umgwebo kaThixo nxamnye nale nkqubo yezinto. (Daniyeli 2:44; ISityhilelo 16:14, 16; 18:1-8; 19:11-21) Ewe, nabo bathetha intetho enyulu baxakekile bevakalisa iindaba ezilungileyo zokuba uBukumkani bukaThixo obulawulwa nguKristu buya kuthi kungekudala buzise iintsikelelo ezizukileyo kulo lonke uluntu oluthobelayo kumhlaba oyiparadisi. (Isaya 9:6, 7; Daniyeli 7:13, 14; Mateyu 6:9, 10; 24:14; Luka 23:43) Siphela nje apho, ibe siye sabetha nje phezulu! Ngokuqinisekileyo, intetho enyulu lolona lwimi lutyebileyo noluxabiseke kakhulu emhlabeni!
14. Ziziphi ezinye iingenelo ezinanditshwa ngabo bathetha intetho enyulu?
14 Iingenelo ezinanditshwa ngabo bathetha intetho enyulu ziquka “uxolo lukaThixo” olugcina iintliziyo namandla engqondo. (Filipi 4:6, 7) Bathobela imithetho yeBhayibhile, ekhuthaza impilo, ulonwabo nolwaneliseko olufumaneka ekukholiseni uYehova. (1 Korinte 6:9, 10) Ewe, abo bathetha intetho enyulu banethemba lobomi obungunaphakade kwihlabathi elitsha athembise ngalo uThixo.—2 Petros 3:13.
Yisebenzise Okanye Uphulukane Nayo
15. Uya kungenelwa njani kukuyazi kakuhle intetho enyulu?
15 Ukuba uza kuthetha intetho enyulu kwihlabathi elitsha, umele uyazi ngokokude ibe yintetho ocinga ngayo. Xa umntu efunda intetho, kuqala ucinga ngolwimi lwakhe lomthonyama aze aguqulele iingcinga zakhe kolo lutsha. Kodwa njengoko esenza inkqubela kulwimi olutsha, uqalisa ukucinga ngalo kungekho mfuneko yokuba aguqulele iingcinga zakhe. Ngokufanayo, ngokufundisisa ngenkuthalo, unokuyiqonda kakuhle intetho enyulu kangangokuba uya kukwazi ukusebenzisa imithetho nemigaqo yeBhayibhile ekucombululeni iingxaki uze uhlale ‘kumendo wobomi.’—INdumiso 16:11.
16. Kunokwenzeka ntoni ukuba akuyisebenzisi rhoqo intetho enyulu?
16 Umele uyisebenzise rhoqo intetho enyulu, kungenjalo akuyi kukwazi ukuyithetha kakuhle. Ngokomzekelo: Kwiminyaka eyadlulayo, bambi kuthi bafunda ulwimi lwasemzini. Sisenokuwakhumbula amagama athile olo lwimi kodwa ngokunokwenzeka asisakwazi ukuluthetha kakuhle ngenxa yokuba besingalusebenzisi ngamaxesha onke. Kunokwenzeka okufanayo ngentetho enyulu. Ukuba asiyisebenzisi rhoqo, sisenokuphulukana nayo, yaye oko kuya kuba nemiphumo eyintlekele ngokomoya. Ngoko ke masiyithethe rhoqo kwiintlanganiso nakubulungiseleli bamaKristu. Le misebenzi, xa idibene nofundisiso lobuqu, iya kusenza sikwazi ukuyithetha ngokuchanileyo intetho enyulu. Yaye hayi indlela okubaluleke ngayo oko!
17. Yintoni ebonisa ukuba intetho ingangumcimbi wokufa nokuphila?
17 Intetho inokuba ngumcimbi wokufa nokuphila. Oku kwaboniswa ebudeni bongquzulwano olwaluphakathi kohlanga lwakwaSirayeli uEfrayim noMgwebi uYifeta waseGiliyadi. Ukuze kufaniswe amaEfrayim awayezama ukusabela ngaphesheya koMlambo iYordan, amaGiliyadi asebenzisa igama elithi “Shibholete,” elinesandi sika-“sh.” Amadoda akwaEfrayim azibhenca kumadoda aseGiliyadi kumazibuko aseYordan ngokuthi “Sibholete,” kunokuthi “Shibholete” esibiza ngokungachananga isandi sokuqala selo gama. Ngenxa yoko, amaEfrayim angama-42 000 abulawa! (ABagwebi 12:5, 6) Ngokufanayo, oko kufundiswa yiNgqobhoko kusenokuvakala kufana nentetho enyulu kwabo bangaqhelananga nenyaniso yeBhayibhile. Kodwa ukuthetha ngendlela yonqulo engachananga kuya kungqineka kuyintlekele ngemini yomsindo kaYehova.
Sihlala Simanyene
18, 19. Iyintoni intsingiselo kaZefaniya 3:1-5?
18 Kubhekiselwa kwiYerusalem eyayingathembekanga yamandulo noko yakufanekiselayo namhlanje, iNgqobhoko, kuZefaniya 3:1-5 kuthiwa: “Yeha, umzi oneenkani, ongcolileyo, oxinzelela phantsi! Awuphulaphulanga lizwi; awamkelanga ngqeqesho; awukholosanga ngoYehova, awusondelanga kuThixo wawo. Abathetheli bawo phakathi kwawo baziingonyama ezibharhulayo; abagwebi bawo baziingcuka zangokuhlwa, ezingabeki nto ukuze ziyigunuze kwakusa. Abaprofeti bawo bayaxhaphazela, ngamadoda anginizayo; ababingeleli bawo bayayihlambela ingcwele, bagonyamela umyalelo. UYehova ulilungisa esazulwini sawo; akenzi ngabugqwetha; imiso ngemiso ukumisa emhlotsheni okusesikweni kwakhe, angasileli; ke yena onobugqwetha akakwazi ukudana.” Iyintoni intsingiselo yaloo mazwi?
19 IYerusalem yamandulo neNgqobhoko yanamhla ziye zamvukela uYehova zaza zazingcolisa ngonqulo lobuxoki. Isono seenkokeli zazo siye saphumela kwingcinezelo. Phezu kwazo nje izilumkiso zikaThixo eziphindaphindiweyo, aziphulaphulanga zize zibuyele kuye. Iinkosana zazo ziye zanjengeengonyama ezineengcwangu nezibharhulayo, ziphenjelelwa likratshi ziye zakutyeshela okusebulungiseni. Njengeengcuka ezibawayo, abagwebi bazo baye bakugunuza okusesikweni. Abefundisi bazo ‘baye bakuhlambela oko kungcwele baza bawugonyamela umthetho’ kaThixo. Ngoko uYehova uza ‘kuhlanganisa iintlanga aze abuthe izikumkani, ukuze ayiphalaze ingqumbo yakhe phezu kwazo, konke ukuvutha komsindo wakhe.’—Zefaniya 3:8.
20. (a) Yintoni emele yenziwe ukuze ubani asinde ngemini yomsindo kaYehova? (b) Unokuba nalo njani ithemba lokunandipha iintsikelelo ezingunaphakade ezivela kuThixo?
20 Imini yomsindo kaYehova isondela ngokukhawuleza. Ngoko ke, ukuze usindele kwihlabathi elitsha likaThixo, funda uze uthethe intetho enyulu ngoku. Kuphela kungokwenza oko onokuthi ufumane ukukhuseleka kwintlekele engokomoya yangoku nakwintlekele yomhlaba wonke esondela ngokukhawuleza. AmaNgqina kaYehova avakalisa imini yomsindo kaThixo nesigidimi esifudumez’ intliziyo soBukumkani bakhe. Hayi indlela akuvuyela ngayo ukuthetha ngozuko lobukumkani bakhe! (INdumiso 145:10-13) Zimanyanise kunye nawo, yaye unokuba nethemba lokunandipha ubomi obungunaphakade nezinye iintsikelelo ezivela kuMsunguli wentetho enyulu, iNkosi enguMongami uYehova.
Ubuya Kuphendula Uthini?
◻ Ziziphi ezinye zeendlela zokufunda intetho enyulu?
◻ Kutheni kuyingenelo ukuthetha intetho enyulu?
◻ Yintoni esenokwenzeka ukuba akuyisebenzisi rhoqo intetho enyulu?
◻ Umntu unokusinda njani kwimini yomsindo kaYehova aze anandiphe iintsikelelo ezingunaphakade?
[Umfanekiso okwiphepha 16]
UGidiyon namadoda akhe bavuthela izigodlo zabo baze baphakamise izibane zabo
[Umfanekiso okwiphepha 18]
Ukususela ngowe-1879 ukusa phambili kwakucaca ukuba uCharles Taze Russell namaqabane akhe babesetyenziswa nguThixo ukuhambisela phambili intetho enyulu
[Imifanekiso ekwiphepha 20]
Ngaba umanyene namaNgqina kaYehova ekuthetheni intetho enyulu?