Imibono Echulumancisayo Eyomeleza Ukholo
Iimbalasane ZeSityhilelo
UMKHONZI kaYehova uYohane ukwisiqithi esincinane sePatmos, cebu kuhle kunxweme olukwintshona yeAsiya Mayina. Apho lo mpostile walupheleyo ubona izinto ezimangalisayo—ezifuziselayo, yaye ngokufuthi ezikhwankqisayo nezibalasele ngokwenene! Uzibona ekwimini yeNkosi, eqalisa ekubekweni kukaYesu etroneni ngowe-1914 kude kube sekupheleni koLawulo Lwakhe Lweminyaka Eliwaka. Nangona uYohane ebona iziganeko eziya kwenzeka ngelona xesha linzima loluntu, hayi indlela akubona ngokubalasele ngayo kwangaphambili oko kuya kwenzeka ebudeni boLawulo lukaKristu Lweminyaka Eliwaka! Ezinjani zona iintsikelelo eziya kunanditshwa luluntu oluthobelayo ngoko!
UYohane wayibhala le mibono kwincwadi yeBhayibhile yeSityhilelo. Ekubeni yabhalwa malunga nowama-96 C.E., inokulomeleza ukholo lwethu kuThixo wesiprofeto, uYehova, nakuNyana wakhe, uYesu Kristu.—Ukuze ufumane iinkcukacha, bona incwadi ethi ISityhilelo—Incopho Yaso Ezukileyo Isondele!, epapashwe yiWatchtower Bible and Tract Society of New York Inc.
UKristu Unikela Isiluleko Sothando
Kwasekuqaleni nje kwesityhilelo esivela kuThixo ngoKristu kukho iincwadi eziya kumabandla asixhenxe eendlalifa zoBukumkani ezikunye noYesu. (ISi 1:1–3:22) Xa zizonke, ezi ncwadi ziyancoma, zichaze ingxaki, zinikele isiluleko kunye okanye nokhuthazo, zize zichaze iintsikelelo ezizuzwa ngenxa yokuthobela ngokuthembeka. Nangona abase-Efese babenyamezele, babelushiyile uthando ababenalo kuqala. Ibandla elityebileyo ngokomoya laseSmirna likhuthazwa ukuba lihlale lithembekile phezu kwazo nje iimbandezelo. Ibandla lasePergamo liye layixhathisa intshutshiso, kodwa livumele ubukho bamahlelo. Phezu kwako nje ukusebenza ngenkuthalo kwamaKristu aseTiyatira, kukho impembelelo kaIzebhele apho. Ibandla laseSardesi kufuneka liphaphe ngokomoya, elaseFiladelfi libongozwa ukuba likubambe likuqinise oko linako, yaye abantu abadikidiki baseLawodike bafuna ukuphiliswa ngokomoya.
Anjani wona ukufaneleka amazwi okuqeqesha ookumkani basezulwini bexesha elizayo—enyanisweni, onke amaKristu! Ngokomzekelo, ngaba kukho nabaphi na kuthi abaye badikidiki? Ukuba kunjalo yenzani okuthile! Yibani ngabahlaziya njengekomityi yamanzi abandayo ngemini eshushu kodwa kwakhona qalisani ukubonakalisa inzondelelo efudumeleyo ngoYehova nangenkonzo yakhe.—Thelekisa uMateyu 11:28, 29; Yohane 2:17.
Imvana Ivula Incwadi Esongwayo
Ngokulandelayo uYehova ubonwa esetroneni yakhe esebuqaqawulini. (4:1–5:14) Ujikelezwe ngamadoda amakhulu angama-24 nazizinto ezine eziphilileyo. Esandleni sakhe uphethe incwadi esongwayo etywinwe ngamatywina asixhenxe. Ngubani onokuyivula le ncwadi isongwayo? IMvana, uYesu Kristu, ikufanelekele ukwenjenjalo!
Kwenzeka iziganeko ezihlab’ umxhelo njengoko iMvana ivula amatywina amathandathu. (6:1–7:17) Njengoko itywina lokuqala livulwa, uKristu ubonakala ekhwele ihashe elimhlophe, ufumana isithsaba (ngowe-1914), aze aphume eseyisa. Njengoko amatywina amathathu angakumbi evulwa, abanye abakhweli-mahashe bazisa imfazwe, indlala nokufa kuluntu. Xa kuvulwa elesihlanu itywina, abafeli-nkolo ababulewe ngenxa kaKristu bayakhala besithi makuphindezelwe igazi labo, yaye bonke ngabanye banikwa “iingubo ezinde ezimhlophe,” okubonisa ukuma kwabo kobulungisa okunxulumene nokuvuselwa kwabo ekubeni babe zizidalwa zomoya ezingenakufa nezinamalungelo asebukhosini. (Thelekisa ISityhilelo 3:5; 4:4.) Xa kuvulwa elesithandathu itywina, umhla wengqumbo kaThixo neyeMvana uqalisa ngenyikima. Kodwa “imimoya yomine yomhlaba,” efanekisela umgwebo wentshabalalo, iyabanjwa de abakhonzi bakaThixo abali-144 000 babe batywiniwe. Xa bethanjisiwe ngomoya kaThixo baze bamkelwe njengoonyana bakhe bokomoya, bafumana kwangaphambili umqondiso—itywina okanye uphawu—welifa labo lasezulwini. Kuphela kusemva kokuvavanywa okuya kuthi ukutywinwa kwabo kube kokusisigxina. (Roma 8:15-17; 2 Korinte 1:21, 22) Yaye hayi indlela amele ukuba umangaliswe ngayo uYohane kukubona “isihlwele esikhulu” esiphuma kuzo zonke iintlanga—abantu abaninzi abanethemba lobomi obungunaphakade kwiparadisi yasemhlabeni! Baphuma ‘kwimbandezelo enkulu,’ ixesha lembandezelo engathethekiyo kuluntu.
Ezinjani zona ukukhwankqisa iziganeko ezenzekayo njengoko itywina lesixhenxe livulwa! (8:1–11:14) Inzolo ethabatha isiqingatha seyure, okuvulel’ ithuba ukuphulwaphulwa kwemithandazo yabangcwele, ilandelwa kukuphoswa emhlabeni komlilo othatyathwe esibingelelweni. Zandula ke izithunywa zezulu ezisixhenxe zilungiselele ukuba zivuthele amaxilongo avakalisa izibetho zikaThixo kwiNgqobhoko. La maxilongo ahlokonyiswa ebudeni balo lonke ixesha lesiphelo de kube yimbandezelo enkulu. Amaxilongo amane avakalisa izibetho emhlabeni, elwandle, kwimithombo yamanzi naselangeni, enyangeni nasezinkwenkwezini. Ukuvuthelwa kwelesihlanu kukhupha iinkumbi ezifanekisela amaKristu athanjisiweyo awaphuma esiya edabini ukususela ngowe-1919 kuse phambili. Xa kuvuthelwa ixilongo lesithandathu, amahashe ayahlasela. Oku kuzaliseka xa abathanjisiweyo abaye bomelezwa ngakumbi ukususela ngowe-1935 ‘sisihlwele esikhulu,’ bevakalisa izigidimi zomgwebo ezithuthumbisayo kwiinkokeli zonqulo zeNgqobhoko.
Ngokulandelayo uYohane utya incwadana esongwayo, okubonisa ukuba abathanjiswa bayasamkela isabelo sabo yaye bazondla ngeLizwi likaThixo eliqulethe imigwebo kaThixo abayivakalisayo nxamnye neNgqobhoko. Lo mpostile uyalelwa ukuba alinganise ingcwele yetempile, okubonisa ukuba ngokuqinisekileyo iinjongo zikaYehova mayela nelungiselelo letempile ziya kuphunyezwa nokuba abo banxulumene nalo bamele bahlangabezane nemilinganiselo kaThixo. Ngokulandelayo ‘amangqina amabini’ athanjisiweyo kaThixo ayaprofeta embethe iingubo ezirhwexayo, ayabulawa, kodwa ayavuswa. Oku kwalatha kowe-1918-19, xa umsebenzi wawo wokushumayela wanqunyanyiswayo ziintshaba, kodwa abakhonzi bakaYehova bahlaziywa ngokungummangaliso ukuze baqhubeke nobulungiseleli babo.
Ukuzalwa KoBukumkani!
Ukuvuthelwa kwexilongo lesixhenxe kuvakalisa ukuzalwa koBukumkani. (11:15–12:17) Ezulwini umfazi wokomfuziselo (intlangano yasezulwini kaYehova uThixo) uzala umntwana oyinkwenkwe (uBukumkani bukaThixo obunoKumkani onguKristu), kodwa inamba (uSathana) ngokulilize izama ukumqwenga. Imfazwe eyaqala ezulwini emva kokuzalwa koBukumkani ngowe-1914, ifikelela kwincopho yayo xa uMikayeli owoyisileyo (uYesu Kristu) elahlela inamba nezithunywa zayo emhlabeni. Apho inamba iyaqhubeka isilwa nentsalela ethanjisiweyo yembewu yomfazi wasezulwini.
Ngokulandelayo uYohane ubona irhamncwa elenzelwa umfanekiso olisikizi. (13:1-18) Eli rhamncwa lobupolitika elineentloko ezisixhenxe neempondo ezilishumi liphuma “elwandle,” izihlwele zabantu abangazolanga oorhulumente babantu abaphuma kuzo. (Thelekisa uDaniyeli 7:2-8; 8:3-8, 20-25.) Esi sidalwa sokomfuziselo silifumana phi igunya laso? Kaloku, akukho ndawo yimbi ngaphandle koSathana, inamba! Yaye khawufane ucinge! Irhamncwa elineempondo ezimbini (iGunya Lehlabathi lamaNgesi namaMerika) libonwa lisenzela le ngxuba-kaxaka yezobupolitika “umfanekiselo,” ngoku owaziwa ngokuba ziZizwe Ezimanyeneyo. Abaninzi bakhukuliselwa ukuba balinqule irhamncwa baze bamkele ‘uphawu’ lwalo ngokwenza izinto ngendlela elenza ngayo nangokulivumela ukuba lilawule ubomi babo. Kodwa ngokungenakushukunyiswa amaNgqina kaYehova awalwamkeli uphawu lobudemoni lerhamncwa!
Abakhonzi BakaYehova Bathabatha Isenzo
Abakhonzi bakaThixo abaliqela babonwa besebenza njengoko iingqayi ezisixhenxe zengqumbo ziphalazwa. (14:1–16:21) Khawuphulaphule! Ezulwini kwiNtaba yaseZiyon, uYohane uva abali-144 000 bevuma ingoma engathi intsha. Isithunywa sezulu esiphaphazela esazulwini samazulu sineendaba ezilungileyo ukuba sizishumayele kwabo bemiyo phezu komhlaba. Kutyhila ntoni oku? Kutyhila ukuba amaNgqina kaYehova ancediswa zizithunywa zezulu ekuvakaliseni isigidimi soBukumkani.
UYohane umele ukuba ukhwankqisiwe kukubona umdiliya womhlaba uvunwa zize zonke iintlanga zityunyuzwe njengoko isixovulelo somsindo kaThixo sinyathelwa. (Thelekisa uIsaya 63:3-6; Yoweli 3:12-14.) Ngokuyalelwa nguYehova, ngokulandelayo izithunywa zezulu ezisixhenxe ziphalaza iingqayi ezisixhenxe zengqumbo kaThixo. Ukuphalazwa kweengqayi ezintandathu zokuqala kuchaphazela umhlaba, ulwandle, nemithombo yamanzi, kwanelanga, itrone yerhamncwa noMlambo umEfrati. Khawuthelekelele indlela anemincili ngayo uYohane njengoko ebona ukuba inkohliso yeedemon ihlanganisela oonyana babantu kwimfazwe kaThixo yeHar–Magedon. Yaye imiphumo iba yintlekele njengoko ingqayi yesixhenxe iphalazwa emoyeni.
Abafazi Ababini Bokomfuziselo
Ngokuqinisekileyo, uYohane uchulumancile kukubona ukupheliswa kweBhabhiloni Enkulu, ubukhosi behlabathi bonqulo lobuxoki, nokubona iziganeko ezichwayitisayo ezilandela intshabalaliso yayo. (17:1–19:10) Inxilile ligazi labangcwele, ibonwa ihleli phezu kwerhamncwa elimfusa elineentloko ezisixhenxe neempondo ezilishumi (uManyano Lwezizwe nelandela lalo, iZizwe Ezimanyeneyo). Kodwa okunjani kona ukuphanziswa okuyifikelayo njengoko iimpondo ezilishumi ziyijikela!
Kuvakala amazwi ezulwini edumisa uYa ngenxa yokutshatyalaliswa kweBhabhiloni Enkulu. Yaye enjani yona intswahla evakalayo yokudumisa njengoko kuqalisa umtshato weMvana nomtshakazi wayo, abathanjiswa abavusiweyo!
UKristu Uyoyisa Aze Alawule
Ngokulandelayo uYohane ubona uKumkani kakumkani njengoko ekhokela imikhosi yasezulwini ekutshatyalalisweni kwenkqubo kaSathana yezinto. (19:11-21) Ewe, uYesu, “uLizwi likaThixo,” ulwa neentlanga. Lo mpostile ubona irhamncwa (intlangano yezobupolitika kaSathana) nomprofeti wobuxoki (iGunya Lehlabathi lamaNgesi namaMerika) bephoswa “edikeni lomlilo,” okufuzisela intshabalalo epheleleyo nengunaphakade.
Kwenzeka ntoni ngokulandelayo? Kaloku, uYohane ubona ukuphoselwa enzonzobileni kukaSathana. Kulandele ke amavandlakanya oLawulo lukaKristu Lweminyaka Eliwaka, ebudeni balo aya kuthi uYesu nabalawuli abakunye naye abavusiweyo bagwebe uluntu, bebuyisela abathobelayo emfezekweni yobuntu! (20:1-10) Ngoku kulixesha lovavanyo lokugqibela. Ekhululwe enzonzobileni, uSathana uya kuzama ukulahlekisa uluntu olufezekileyo, kodwa intshabalalo iya kuphelisa imisebenzi yabo bonke abavukeli abanxamnye noThixo abaziidemon nabangabantu.
Xa ekhumbula okwenzeke ngaphambili, hayi indlela amele ukuba uchulumance ngayo uYohane kukubona bonke abo bafileyo, eHadesi (ingcwaba eliqhelekileyo loluntu), nabaselwandle bevuswa baze bagwetywe phambi koThixo, ohleli etroneni enkulu emhlophe! (20:11-15) Yaye okunjani kona ukuphumla abaya kukunandipha abathe tye xa ukufa neHadesi ziphoselwa edikeni lomlilo, ukuze zingabuye zisebenze kwakhona!
Njengoko imibono kaYohane ifikelela esiphelweni, ubona iYerusalem Entsha. (21:1–22:21) Eso sixeko saseburhulumenteni siyehla siphuma ezulwini size sizise ukukhanya ezintlangeni. Kukho “umlambo wamanzi obomi” ompompoza uphuma kwiYerusalem Entsha nofanekisela inyaniso engokweZibhalo nawo onke amanye amalungiselelo kaThixo asekelwe kwidini likaYesu okukhulula uluntu oluthobelayo kwisono nokufa nokulunika ubomi obungunaphakade. (Yohane 1:29; 17:3; 1 Yohane 2:1, 2) Kuwo omabini amacala alo mlambo, uYohane ubona imithi enamagqabi aphilisayo, efanekisela inxalenye yelungiselelo likaYehova lokunikela ubomi obungunaphakade kuluntu oluthobelayo. Izigidimi zokuqukumbela ezivela kuThixo noKristu zilandelwa sisimemo. Hayi indlela okumangalisa ngayo ukuva umoya nomtshakazi bemema wonke ubani onxaniweyo ukuba ‘eze awathabathe amanzi obomi ngesisa’! Yaye njengoko sifunda amazwi aqukumbelayo eSityhilelo, ngaphandle kwamathandabuzo sishukunyiselwa ukuba sidanduluke njengoYohane sisithi: “Amen. Ewe, yiza, Nkosi Yesu.”
[Ibhokisi/Umfanekiso okwiphepha 21]
Hlala Uphaphile: Kwindawo ekuthethwa kuyo ngesiprofeto semfazwe kaThixo yeHar–Magedon (Armagedon), kuthiwa: “Yabona, [mna Yesu Kristu] ndiza njengesela. Unoyolo lowo uphaphileyo, uzigcinayo iingubo zakhe, ukuze angahambi ze, balibone ihlazo lakhe.” (ISityhilelo 16:15) Oku kusenokuba kubhekisela kwimisebenzi yomveleli, okanye igosa, eyayisenziwa etempileni eyayiseYerusalem. Ebudeni bokulinda, wayejikeleza etempileni ukuze abone enoba abalindi abangabaLevi babehleli okanye babelele kusini na kwiindawo zabo zokulinda. Nawuphi na umlindi owayefunyanwa elele wayebethwa ngentonga, yaye iingubo zakhe zokwaleka zazinokutshiswa njengesohlwayo sokumhlazisa. Njengokuba iArmagedon isondele kangaka ngoku, intsalela ethanjisiweyo ‘yesibingeleli esibubukumkani,’ okanye “indlu eyiyeyomoya” izimisele ukuhlala iphaphile ngokomoya. Amele enjenjalo namaqabane ayo, “isihlwele esikhulu,” esinamathemba asemhlabeni, kuba naso sinikela inkonzo engcwele kuThixo etempileni. (1 Petros 2:5, 9; ISityhilelo 7:9-17) Ingakumbi abaveleli abangamaKristu bafanele bahlale belindile ukuba kungaveli iimeko ezimbi ebandleni. Ngenxa yokuba behlala bephaphile, bonke abanquli abanyanisekileyo etempileni yokomoya kaThixo bayazigcina “iingubo” zabo, okubonisa inkonzo yabo ezukileyo njengamaNgqina kaYehova.