Bazalusa Ngentumekelelo Izimvu Ezincinane

KUZO zonke izilwanyana zasekhaya, azikho ezifana nemvu. Izilwanyana ezininzi zinawo amandla nethuku eliyimfuneko ukuze zifune ukutya nokuze zibaleke amarhamncwa aphila ngokutya zona, kodwa imvu yahlukile. Inokwenzakaliswa lula ngamarhamncwa afuna ukuyiqwenga, ekubeni ingenandlela yakuzikhusela. Xa kungekho malusi, imvu iyoyika yaye ayinakwazi kuzinceda. Xa ingekho emhlambini, kulula ukuba ilahleke. Ngoko ke izimvu ezilulamileyo zinezizathu ezivakalayo zokumthanda umalusi wazo. Ngaphandle kwakhe amathuba azo okusinda ambalwa gqitha. Ngenxa yezi mpawu, iBhayibhile isebenzisa izimvu ngendlela efuziselayo ukuchaza abantu abamsulwa, abaphethwe kakubi, okanye abangenakuzikhusela.

Ngokuqinisekileyo ke ngoko, umalusi uwufumana evile umvuzo wakhe. Ubomi bakhe abulula. Uchanabeka kubushushu nakwingqele, yaye ulala obungahliyo. Umele akhusele umhlambi kumarhamncwa ayingozi kuwo, ngokufuthi ezibeka engozini. Ekubeni umalusi emele awugcine ndawonye umhlambi, ixesha elininzi ulichitha efuna izimvu ezidukayo okanye ezilahlekayo. Umele anyange ezigulayo nezenzakeleyo. Amatakane abuthathaka nadiniweyo umele awathwale. Umele asoloko exhalabele ukufumana ukutya namanzi awaneleyo. Akunto ingaqhelekanga ukuba umalusi alale endle ubusuku bonke ukuze aqinisekise ukuba umhlambi ukhuselekile. Ngenxa yoko, ukwalusa kungumsebenzi onzima ofanele indoda ekhaliphileyo, ekhutheleyo nenamacebo. Ngaphezu kwako konke, imele ibe nako ukubonisa inkxalabo yokwenene ngomhlambi emele iwunyamekele.

Ukwalusa Umhlambi KaThixo

IBhayibhile ibachaza abantu bakaThixo njengezimvu ezilulamileyo yaye abo bamele bazinyamekele ibachaza njengabalusi. UYehova ‘unguMalusi noMveleli wemiphefumlo yethu.’ (1 Petros 2:25) UYesu Kristu, “umalusi olungileyo,” wavakalisa umnqweno wakhe wokuba izimvu zinyanyekelwe ngemfesane xa waxelela umpostile uPetros oku: ‘Dlisa amatakane am, yalusa izimvu zam, Dlisa izimvu zam.’ (Yohane 10:11; 21:15-17) Abaveleli abangamaKristu baphathiswe umsebenzi ondilekileyo ‘wokwalusa ibandla likaThixo.’ (IZenzo 20:28) Yaye umsebenzi wabo njengabalusi bokomoya ufuna babe neempawu zomalusi olungileyo wokoqobo—ukukhalipha, inkuthalo, amacebo, yaye, ngokuyintloko, inkxalabo esuk’ entliziyweni ngempilontle yomhlambi.

Ngemihla yomprofeti kaThixo uHezekile, inkoliso yabalusi abababelwe ukunyamekela iintswelo zabantu bakaYehova kwaSirayeli yasilela ukufeza imisebenzi yayo. Oku kwaba nemiphumo emibi kumhlambi kaThixo, inkoliso yawo yalushiya unqulo oluyinyaniso. (Hezekile 34:1-10) Namhlanje, abefundisi beNgqobhoko bathi bangabalusi boko kufane kuthiwe libandla lobuKristu, kodwa imeko yalo yokugula ngokomoya ingqina ukuba abefundisi bafana nabakhohlisi abangendawo ababatyeshelayo abantu xa uYesu wayesemhlabeni. Iinkokeli zonqulo zeNgqobhoko zifana ‘nomqeshwa ongazikhathalele izimvu.’ (Yohane 10:12, 13) Abakulungelanga, bengakwazi yaye bengakufanelekelanga nangayiphi na indlela ukwalusa umhlambi kaThixo.

Abalusi Abanenkathalo Ngokwenene

UYesu wabamisela umzekelo ogqibeleleyo bonke abo babeya kwalusa umhlambi kaYehova. Wayenothando, enobubele, enentumekelelo yaye eluncedo ngandlela zonke kubafundi bakhe. Wayethabatha inyathelo lokuqala lokufuna abo babeswele. Nangona uYesu wayexakeke gqitha yaye ngokufuthi ediniwe, wayesoloko ezipha ixesha lokuphulaphula iingxaki zabo nokubakhuthaza. Ukukulungela kwakhe ukuncama umphefumlo wakhe ngenxa yabo kwakuyeyona mbonakaliso ibalaseleyo yothando.—Yohane 15:13.

Namhlanje, bonke abadala bamabandla, kwanezicaka zolungiselelo ezimiselweyo, banale mbopheleleko kumhlambi. Ngenxa yoko, kwanezinto ezibonakala ngathi zingaziingenelo ngokwezinto eziphathekayo kwamanye amazwe aziyishukumiseli ukuba ifuduke inkoliso yala madoda anembopheleleko ize ngaloo ndlela ishiye amabandla engenaluncedo yaye engavelelwa ngokufanelekileyo. Ekubeni siphila ‘kumaxesha anomngcipheko ekunzima ukujamelana nawo,’ umhlambi kufuneka ukhuthazwe yaye ukhokelwe. (2 Timoti 3:1-5, NW) Kukho ingozi esoloko ikho yokuba abathile baya kuba ngamaxhoba kaSathana, ‘onjengengonyama egqumayo, efuna ubani engamginyayo.’ (1 Petros 5:8) Ngoku kunanini na ngaphambili, kubalulekile ukuba abalusi abangamaKristu ‘baluleke abanxaxhayo; bakhuze abamxhelo mncinane; basekele abathambileyo.’ (1 Tesalonika 5:14) Kufuneka bahlale bephaphile ukuba baza kubanceda abanxaxhayo bangalahleki kumhlambi.—1 Timoti 4:1.

Umalusi unokubona njani ukuba imvu ethile ifuna uncedo? Eminye yemiqondiso ecace kakuhle kukungabikho kwiintlanganiso zamaKristu, ukuxhiphulisa kubulungiseleli basentsimini, notyekelo lokukuphepha ukunxulumana ngokusondeleyo nabanye. Ubuthathaka bukwanokuphawulwa ngokusiphawula ngenyameko isimo sengqondo sezimvu notyekelo lweencoko zazo. Zisenokutyekela ekubagxekeni abanye, mhlawumbi zibonisa iimvakalelo zokungabathandi. Incoko yazo isenokuhlala kakhulu kusukelo lwezinto eziphathekayo kunakusukelo lokomoya. Ukungabi nahlombe, ukungaboni nto intle, nokuphelelwa luvuyo kusenokuthetha ukuba ukholo lwazo lubuthathaka. Ubuso obudakumbileyo bunokuba ngumqondiso wokuba zifumana ingcinezelo kwizalamane ezingakholwayo okanye kubahlobo behlabathi. Xa ephawula le miqondiso, umalusi usenokuzabalazela ukuqonda uhlobo loncedo olufunekayo.

Xa betyelela amanye amakholwa ngenjongo yokuwanceda, abalusi abangamaKristu kufuneka bahlale bekhumbula injongo yabo eyintloko. Asilotyelelo nje lobuhlobo lokuncokola izinto ezingenamsebenzi. Usukelo lukampostile uPawulos xa wayetyelela abazalwana bakhe lwalukukuze ‘ababele sibabalo sithile sisesomoya, ukuze bazimaseke; oko ke kukuze avuseleleke naye phakathi kwabo.’ (Roma 1:11, 12) Ukuze ufeze oku, kufuneka ukulungiselela kusengaphambili.

Okokuqala, mqwalasele kakuhle loo mntu, uze uzame ukuqonda ukuba iyintoni imeko yakhe yokomoya. Xa sele ukufumanisile oko, cinga ngolwalathiso, ukhuthazo, okanye isiluleko esiya kuba sesona siyingenelo. ILizwi likaThixo, iBhayibhile, lifanele libe ngowona mthombo uyintloko wenkcazelo ngenxa yokuba ‘liyasebenza.’ (Hebhere 4:12) Kunokuhlolwa iphephancwadi IMboniselo noVukani! ukuze kufunyanwe amanqaku ahlobene neentswelo ezikhethekileyo zezimvu ezijamelene neengxaki ezikhethekileyo. Amava akhuthazayo nahlaziyayo anokufunyanwa kwiYearbook of Jehovah’s Witnesses. Usukelo lukukudlulisela okuthile okukhuthazayo kokomoya okuya kulungela ‘ukwakha umntu lowo.’—Roma 15:2.

Ukwalusa Okwakhayo

Umalusi womhlambi wezimvu zokoqobo uyazi ukuba zixhomekeke kuye ukuba azikhusele yaye azinyamekele. Ezona ngozi ziqhelekileyo zibangelwa kukuduka, ukugula, ukudinwa, ukwenzakala namarhamncwa anokuziqwenga. Ngokufanayo umalusi wokomoya umele aziqonde aze ahlangabezane neengozi ezifanayo ezisongela intlalo-ntle yomhlambi. Ezi zilandelayo zezinye zeengxaki eziqhelekileyo namacebiso ambalwa oko kunokuthethwa ukuze kunikelwe inkcazelo eyakhayo ngokomoya.

(1) Njengezimvu ezingaphaphanga, amaKristu athile asenokulahleka kumhlambi kaThixo ngenxa yokuba erhwetyeshwa zizinto ezinomtsalane ezibonakala zimsulwa yaye ziluyolo. Asenokuphazanyiswa yaye asenokude akhukuliseke ngenxa yokusukela izinto ezinxulumene nokuthanda izinto eziphathekayo, ukuzihlaziya, okanye ukuzonwabisa. (Hebhere 2:1) Abantu abanjalo banokukhunjuzwa ngokungxamiseka kwamaxesha esiphila kuwo, ngemfuneko yokusoloko besondelelene nentlangano kaYehova, nangokubaluleka kokubeka izilangazelelo zoBukumkani kuqala ebomini. (Mateyu 6:25-33; Luka 21:34-36; 1 Timoti 6:8-10) Iziluleko eziluncedo zifumaneka kwinqaku elithi “Unokukugcina Njani Ukulungelelana Kwakho?” kuVukani! kaMatshi 8, 1985, iphepha 28-31.

(2) Umalusi kufuneka azinyange izimvu xa kusenzeka zigule. Ngokufanayo, abalusi bokomoya bamele bawancede amaKristu agulayo ngokomoya ngenxa yezinto ezidimazayo kubomi bawo. (Yakobi 5:14, 15) Kusenokwenzeka ukuba awaqeshwanga, asenokuba aneengxaki ezinzulu zempilo, okanye asenokuba aneengxaki kubomi bawo bentsapho. Abantu abanjalo kusenokwenzeka ukuba abanamdla kangako kukudla kokomoya okanye kunxulumano nabantu bakaThixo. Oku kusenokuphumela ekuzahluleni okanye ekudimazekeni. Kufuneka baqinisekiswe ukuba uYehova ubakhathalele yaye uya kubomeleza kumaxesha anzima. (INdumiso 55:22; Mateyu 18:12-14; 2 Korinte 4:16-18; 1 Petros 1:6, 7; 5:6, 7) Kwakhona kusenokuba luncedo ukuhlolisisa inqaku elithi “Khangela Phambili NjengomKristu,” elikwiMboniselo kaDisemba 1, 1980, iphepha 8-12.

(3) Umalusi umele ahlale ejonge izimvu ezidinwayo. Bambi baye banyamezela ngokuthembeka enkonzweni kaYehova iminyaka emininzi. Baye banyamezela iimvavanyo nezilingo ezininzi. Ngoku babonakala bedinwa bengasaqhubi kakuhle yaye basenokude bavakalise namathandabuzo ngemfuneko yomsebenzi wokushumayela owenziwa ngamandla. Kufuneka umoya wabo uvuselelwe, uxabiso lwabo ngovuyo neentsikelelo ezibangelwa kukukhonza uThixo ngentliziyo iphela bexelisa uYesu Kristu luhlaziywe. (Galati 6:9, 10; Hebhere 12:1-3) Mhlawumbi banokuncedwa babone ukuba uYehova uyayixabisa inkonzo yabo yokunyaniseka yaye unokubomeleza ukuze bamkhonze nakwixesha elizayo ukuze adunyiswe. (Isaya 40:29, 30; Hebhere 6:10-12) Kusenokuba luncedo ukwabelana nabo ngeengongoma ezikwinqaku elithi “Musa Ukwetha Amandla Ekwenzeni Okulungileyo,” elikwiMboniselo kaJulayi 15, 1988, iphepha 9-14.

(4) Njengezimvu ezenzakalayo, wambi amaKristu aye enzakaliswa koko akubona ngathi yihambo ekhubekisayo. Sekunjalo, ukuba siyabaxolela abanye, uBawo wethu osemazulwini uya kusixolela nathi. (Kolose 3:12-14; 1 Petros 4:8) Bambi abazalwana kusenokwenzeka ukuba baye bafumana iziluleko okanye uqeqesho abaye bavakalelwa kukuba alubafanelanga. Noko ke, sonke sinokungenelwa kwiziluleko noqeqesho lokomoya, yaye kuyathuthuzela ukwazi ukuba uYehova uyabaqeqesha abo abathandayo. (Hebhere 12:4-11) Ngenxa yokuba bengafumananga amalungelo enkonzo abavakalelwa kukuba bayawafanelekela, abanye baye bavumela ukucaphuka kwavula umsantsa phakathi kwabo nebandla. Kodwa ukuba siza kuzinxwema kwintlangano kaYehova, ayikho enye indawo esinokuya kuyo ukuze sifumane usindiso novuyo lokwenene. (Thelekisa uYohane 6:66-69.) Inkcazelo eluncedo kule nkalo inokufunyanwa kwinqaku elithi “Ukulondoloza Umanyano Lwethu LobuKristu,” elikwiMboniselo ka-Agasti 15, 1988, iphepha 28-30.

(5) Izimvu zifanele zikhuselwe kumarhamncwa anokuzenzakalisa. Ngendlela efanayo, abanye basenokuba bayachaswa yaye bayoyikiswa zizalamane ezingakholwayo okanye abo basebenza nabo. Ingqibelelo yabo isenokuba iyahlaselwa xa becinezelwa ukuba bayinqumamise inkonzo yabo kuThixo okanye bayeke ukuba nesabelo kubulungiseleli bamaKristu. Noko ke, bayomelezwa xa bencedwa baqonde ukuba inkcaso imele ilindelwe yaye enyanisweni ibobunye ubungqina bokuba singabafundi bakaYesu Kristu bokwenene. (Mateyu 5:11, 12; 10:32-39; 24:9; 2 Timoti 3:12) Kusenokuba luncedo ukubabonisa ukuba ukuba bathembekile, uYehova akayi kuze abashiye yaye uya kubavuza ngenxa yonyamezelo lwabo. (2 Korinte 4:7-9; Yakobi 1:2-4, 12; 1 Petros 5:8-10) Inqaku elinomxholo othi “Ukunyamezela Ngovuyo Phezu Kwayo Nje Intshutshiso” kwiMboniselo kaOktobha 1, 1982, iphepha 19-26, linikela ukhuthazo olubhekele phaya.

Balusi—Zalisani Iimbopheleleko Zenu

Iintswelo zomhlambi kaThixo zininzi, yaye ukuzilinda ngendlela efanelekileyo kungumsebenzi onzima. Ngoko ke abalusi abangamaKristu bamele babe nentumekelelo, babe nenkxalabo ngokwenene, yaye babe nomdla wokuba luncedo. Umonde nokuqonda kubalulekile. Ngoxa abantu abathile besenokufuna ukululekwa nokuyalwa, abanye bangenelwa ngakumbi kukhuthazo. Maxa wambi ukubatyelela ngokobuqu izihlandlo ezimbalwa kusenokuba luncedo, ngoxa kwezinye iimeko kusenokufuneka isifundo seBhayibhile esithe rhoqo. Kuzo zonke ezi meko usukelo oluyintloko kukunikela ukhokelo lokomoya olwakhayo okanye isiluleko sothando esiya kumkhuthaza loo mntu ukuba abe nemikhwa emihle yofundisiso, abekho rhoqo kwiintlanganiso zebandla okanye aqhubeke esenjenjalo, yaye abe nenxaxheba ngenkuthalo kubulungiseleli bamaKristu. Ezi ziindlela eziphambili zokunceda amanye amakholwa nokuwanceda avule indlela yokuwufumana ngokukhululekileyo umoya oyingcwele kaYehova.

Abalusi abanikela inkxaso enjalo bafeza eyona nkonzo ixabisekileyo ngenxa yomhlambi kaThixo. (Bona IMboniselo kaNovemba 15, 1985, iphepha 23-7.) Oko abalusi bokomoya bakwenzayo kuxatyiswa kakhulu ngumhlambi. Emva kokufumana uncedo olunjalo, enye intloko-ntsapho yathi: ‘Emva kokuba besisenyanisweni iminyaka engama-22, satsalelwa ehlabathini zizinto eziphathekayo. Ngokufuthi sasifuna ukuya kwiintlanganiso, kodwa sasingade sikwazi. Sasingenandawo ngokwenene kwinkqubo kaSathana, ngoko sasingangenanga ngokupheleleyo, singamakheswa. Oku kwasishiya sinxunguphele yaye sidandathekile. Sasifuna ukukhuthazwa. Xa umdala wasityelelayo, salamkela ngovuyo ilungiselelo lesifundo seBhayibhile ekhayeni lethu. Ngoku sonke sibuyele entlanganweni kaYehova enqabisekileyo. Andinamazwi okuluchaza ulonwabo endinalo!’

Kukho isizathu sokuvuya gqitha xa abazalwana noodade wethu abatyekayo okanye abadimazekileyo behlaziywa ngokomoya baze bavuselelwe. (Luka 15:4-7) Injongo kaYehova ngabantu bakhe iyafezwa xa bemanyene “njengomhlambi ophakathi kwedlelo lawo.” (Mika 2:12) Kule ndawo inqabisekileyo, ‘bayifumanela ukuphumla imiphefumlo yabo’ ngoncedo loMalusi Olungileyo, uYesu Kristu. (Mateyu 11:28-30) Umhlambi omanyeneyo womhlaba wonke ufumana ukhokelo, ukuthuthuzelwa, nokukhuselwa kunye nentabalala yokutya kokomoya.

Namhlanje, ngalo msebenzi wokwalusa, uYehova ubangela ukuba kwenziwe umsebenzi wothando ovisisana nedinga lakhe lakudala: “Ndiya kuwukhathalela umhlambi wam, ndiwuvelele. . . . Ndiwuhlangule ezindaweni zonke, owaba lusali kuzo . . . Ndiya kuwalusela ebutyanini obulungileyo, . . . Ezilahlekileyo ndiya kuzifuna, . . . ndibophe ezaphukileyo, ndizomeleze ezifayo.” (Hezekile 34:11-16) Hayi indlela okuthuthuzela ngayo ukwazi ukuba uYehova nguMalusi wethu!—INdumiso 23:1-4.

Ngenxa yelungiselelo likaThixo lokwalusa umhlambi wakhe, njengabakhonzi bakaYehova sinokuba nesabelo kumazwi kaDavide, owathi: “Ndiya kulala phantsi, ndilale ubuthongo kwangoku, ndixolile, ngokuba wena, Yehova, undihlalisa ndikholosile, noko ndindedwa.” (INdumiso 4:8) Ewe, abantu bakaYehova baziva benqabisekile kwinkathalo yakhe enothando yaye banombulelo kuba abadala bamaKristu bezalusa ngentumekelelo izimvu ezincinane.

[Inkcazelo Ngomfanekiso okwiphepha 20]

Potter’s Complete Bible Encyclopedia