IBhayibhile YaseBerleburg

UBUPIETIST yayiyintlangano yonqulo eyaqalisa kwiCawa yamaLuthere yaseJamani ngenkulungwane yowe-17 neyowe-18. Abanye babalandeli bale ntlangano babegculelwa okanye bade batshutshiswe ngenxa yokholo lwabo. Abaphengululi abaliqela abangamaPietist babalekela eBerleburg, kwiikhilomitha ezili-150 kumntla weFrankfurt am Main. Bamkelwa yindoda ehlonelwayo ekuhlaleni, uMhlekazi uCasimir von Wittgenstein Berleburg, owayeluxabisa gqitha unqulo. Ubukho baba befundisi nabaphengululi eBerleburg kwakhokelela ekubeni kubekho inguqulelo yeBhayibhile entsha, namhlanje eyaziwa ngokuba yiBhayibhile yaseBerleburg. Le nguqulelo yabakho njani?

Omnye wezi mbacu yayinguJohann Haug, owanyanzelwa ukuba ashiye ikhaya lakhe eStrasbourg ngenxa yokuba abefundisi basekuhlaleni babengazinyamezeli iimbono zakhe ezahlukileyo zonqulo. Lo kaHaug wayengumphengululi osisifundiswa yaye wayeyingcali yeelwimi. Waxelela abanye abaphengululi eBerleburg umnqweno wakhe onyanisekileyo “wokuvelisa inguqulelo yeBhayibhile engangxengwanga, ukulungisa inguqulelo kaLuther, ukuguqulela intsingiselo yeLizwi likaThixo ngokwendlela kanye elibhalwe ngayo.” (Die Geschichte der Berlenburger Bibel [Imbali YeBhayibhile YaseBerleburg]). Injongo yayikukuvelisa iBhayibhile enengcaciso, yaye yayifanele iqondwe ngabantu abaqhelekileyo. UHaug wacela inkxaso kubaphengululi abakwamanye amazwe aseYurophu, yaye wachitha iminyaka engama-20 kulo msebenzi. IBhayibhile yaseBerleburg yapapashwa ukususela ngowe-1726. Ngenxa yenkcazelo eninzi eyayinayo, kwafuneka ipapashwe kwimiqulu esibhozo.

Ngokuqinisekileyo iBhayibhile yaseBerleburg ineengongoma ezithile ezibangel’ umdla. Ngokomzekelo, iEksodus 6:2, 3 ifundeka ngale ndlela: “Waqhubeka uThixo ethetha kuMoses esithi kuye: NdiyiNKOSI! Yaye ndabonakala kuAbraham/kuIsake nakuYakobi/njengoThixo usomandla: kodwa abandazanga ngegama lam elinguYEHOVA.” Ingcaciso ithi: “Igama elithi YEHOVA . . . , igama elimahlulayo/okanye/azibiza ngalo.” Igama likaThixo, uYehova, livela kwingcaciso ye-Eksodus 3:15 neye-Eksodus 34:6.

Ngenxa yoko iBhayibhile yaseBerleburg yaba yenye yeeBhayibhile zaseJamani eziye zasebenzisa igama uYehova kwiindinyana zayo, kwimibhalo esemazantsi okanye kwingcaciso. Enye yeenguqulelo zakutshanje ebonakalisa intlonelo kwigama likaThixo yiNguqulelo Yehlabathi Elitsha YeZibhalo Ezingcwele, epapashwe ngamaNgqina kaYehova.