Abavakalisi BoBukumkani Bayabalisa
Ukholo Lwabo Lwavuzwa
UMPOSTILE uPawulos wayeyindoda enokholo olubalaseleyo, yaye wakhuthaza amanye amakholwa ukuba ngokufanayo ahlakulele ukholo. Wathi: “Lowo uzayo kuThixo umele akholwe ukuba ukho nokuba uba ngumvuzi wabo bamfuna ngokunyamekileyo.” (Hebhere 11:6) La mava alandelayo aseMozambique abonisa indlela uYehova abavuza ngayo abantu abanokholo oluqinileyo nendlela ayiphendula ngayo imithandazo yabo enyamekileyo.
• Omnye udade ongumhlolokazi kwiphondo elikumntla laseNiassa wayexhalabele indlela yena nabantwana bakhe abathandathu ababeza kuya ngayo kwiNdibano YeSithili ‘Yendlela KaThixo Yokuphila.’ Ukuze afumane imali yokuzixhasa wayethengisa izinto ezithile kwimarike yasekuhlaleni, kodwa njengoko umhla wendibano wawusondela, wayenemali yokuya apho ngololiwe kuphela yena nentsapho yakhe. Sekunjalo, wagqiba kwelokuba akholose ngoYehova ukuba uya kumlungiselela waza waqhubeka namalungiselelo ukuze abekho kwindibano.
Wakhwela kuloliwe nabantwana bakhe abathandathu. Ebudeni bohambo umnqomfi-matikiti weza kuye efuna itikiti. Ephawula ibheji yakhe, wambuza ukuba yeyantoni na. Lo dade wamxelela ukuba yeyokumphawula njengondwendwe kwindibano yesithili yamaNgqina kaYehova. Lo mnqomfi-matikiti wabuza: “Iza kuqhutyelwa phi le ndibano?” Emva kokufumanisa ukuba le ndibano yayikwiphondo eliselumelwaneni laseNampula, emalunga neekhilomitha ezingama-300, engalindelanga wamhlawulisa kuphela isiqingatha semali yetikiti! Kamva wamnika yena nentsapho yakhe amatikiti okubuya ngenxalenye yemali yakhe. Hayi indlela awavuya ngayo ngokukholosa ngoYehova!—INdumiso 121:1, 2.
• Kangangeminyaka enokuba ngama-25, ibhinqa elizinikele gqitha kunqulo lathandaza kuThixo ukuze alibonise indlela yokumnqula. Icawa elalisiya kuyo yayidibanisa imisitho yonqulo nezithethe ezenziwayo, yaye lalithandabuza ukuba olu hlobo lokunqula lalimkholisa uThixo.
Lithi: “Ndandisoloko ndikhumbula amazwi kaYesu akuMateyu 7:7 athi: ‘Qhubekani nicela, yaye niya kunikwa; qhubekani nifuna, ibe niya kufumana; qhubekani ninkqonkqoza, kwaye niya kuvulelwa.’ Ndicinga ngalo mbhalo engqondweni, ndandithandaza rhoqo kuThixo ukuba andikhokelele kwinyaniso. Ngenye imini umfundisi wecawa yethu wacela ukuba bonke abasebenza emarikeni yasekuhlaleni bazise kuye imali ethile kunye nezithile kwizinto abazithengisayo ukuze abasikelele. Esi sicelo ndandisigqala njengesingasekelwanga ezibhalweni, ngoko andizange ndize nanto. Xa lo mfundisi wabona ukuba andizisanga ‘mnikelo,’ waqalisa ukundithuka phakathi kwawo onke amalungu ecawa. Ngaloo mini ndaqonda ukuba le asiyiyo indlela uThixo afuna ukunqulwa ngayo, ngoko ndayishiya icawa. Ebudeni belo thuba, ndaqhubeka ndizingisa emthandazweni ukuze ndifumane inyaniso.
Ekugqibeleni, ndaba nenkalipho ndaza ndaqhagamshelana nesinye isalamane esiliNgqina likaYehova. Sandinika iphecana, yaye xa ndandilifunda kwangoko ndaqonda ukuba uThixo wayeyiphendula imithandazo yam. Ekuhambeni kwexesha, iqabane lam nalo laqalisa ukwamkela iinyaniso zeBhayibhile, yaye sawubhalisa ngokusemthethweni umtshato wethu. Noko ke, kamva umyeni wam wagula kakhulu. Kodwa wayendikhuthaza ukuba ndizingise enyanisweni ukuze sikwazi ukubonana kwakhona eParadesi de wafa.
“Ndinombulelo kakhulu kuYehova ngokuphendula imithandazo yam nokundibonisa indlela efanelekileyo yokumnqula. Imithandazo yam iye yaphendulwa kuba ndiye ndabona bonke abantwana bam abasibhozo besiba ngabakhonzi abazahluleleyo bakaYehova.”