“Ukholo Ndilugcinile”

NGOKUBALISWA NGABAHLOBO BAKABRUNELLA INCONDITI

“YAYIYIMINI yangoMgqibelo ende nesithukuthezi. Ndandinkolonkoloza ndedwa egumbini, ndiziva ndingenathemba. Kwakungathi ndandihamba epasejini. Izinto zihamba ngokutyibilikayo kwaza kwasuka ngesiquphe, umntu othile wambakraza ucango, andakwazi ukuphuma apho, ndazama ndancama.”

Olo dano lungathethekiyo lwayenza buhlungu intliziyo kaBrunella Inconditi owaneminyaka eli-15 ubudala. Olona suku lubalulekileyo kubomi bakhe bobuntwana lwalusiya ekupheleni. Ebutsheni baloo nyaka uthando lwakhe olukhulayo ngoYehova nangeBhayibhile lwamshukumisela ukuba ahlulele ubomi bakhe kuye. NgoJulayi 1990 wayemele abhaptizwe kwiNdibano Yesithili YamaNgqina KaYehova “Yentetho Enyulu” eMontreal, eKhanada. Endaweni yoko, uBrunella wayeza kujamelana novavanyo lokholo lwakhe olwaluya kuhlala ubomi bakhe bonke.

Kwiintsuku ezimbini ngaphambi kokufuzisela uzahlulelo lwakhe ngobhaptizo lwasemanzini, uBrunella wafumanisa ukuba uneleukemia. Oogqirha kwisibhedlele sabantwana sasekuhlaleni bafuna ukuqalisa ukumnyanga ngokukhawuleza, ngoko ke waba uBrunella uhlala esibhedlele.

Amazwi Akhe Achukumisa Oogqirha

UBrunella wayesazi ukuba igazi lingcwele kuYehova uThixo. (Levitikus 17:11) Abazali bakhe, uEdmondo noNicoletta, babeyibethelele into yokuba xa kunyangwa intombi yabo lungasetyenziswa utofelo-gazi. Uyise ukhumbula oku: “UBrunella wayefuna ukuba oogqirha bayive iphuma nakowakhe umlomo loo nto, nangona wayesengumntwana. Wabaxelela engahleki ukuba akalufuni unyango oluza kwaphula umthetho weBhayibhile wokuba ‘sizinxweme kulo igazi.’”—IZenzo 15:20.

NgoJulayi 10, 1990, oogqirha abathathu nonontlalo-ntle baya kuthetha nabazali bakaBrunella nabalungiseleli ababini bebandla lasekuhlaleni lamaNgqina kaYehova. Uhlolisiso lwaqinisekisa ukuba uBrunella wayenelymphoblastic leukemia. Oogqirha bachaza indlela ababeceba ukusilwa ngayo eso sifo. Bachaza ngobuchule ukuba akuyondlwan’ iyanetha ukusinyanga. Omnye wabadala bebandla ukhumbula oku: “Isimilo nokuzimisela kukaBrunella ukuthobela uThixo kwabachukumisa aba gqirha nonontlalo-ntle. Bachukunyiswa luthando lwabazali bakhe nayinkxaso yabahlobo abakwibandla lamaKristu. Kwakhona bayixabisa indlela esasisiqonda nesasisihlonela ngayo isikhundla sabo.”

Oogqirha babefuna ukungalusebenzisi utofelo-gazi. UBrunella wayeza kufumana unyango lwemichiza kangangexesha elide, kodwa lwalungazi kuba buhlungu njengesiqhelo. Oku kwakuya kuwunciphisa umonakalo kwiiseli zakhe zegazi obangelwe lunyango. UNicoletta ucacisa esithi: “Oogqirha bazihlonela iintswelo zikaBrunella zokwenyama, zokweemvakalelo nezokomoya. Xa sabacela badibane nengcali enamava okunyanga i-leukemia yabantwana ngaphandle kokusebenzisa igazi, bavuma.” UBrunella nabasebenzi basesibhedlele babethandana ngokwenene.

Usukelo Lokomoya

Nangona unyango lwakhe lokuqala lwaba nemiphumo emihle, yayisengamaqalela ovavanyo lukaBrunella. NgoNovemba 1990 isifo sakhe samnika isiqabu, ngoko engaphozisanga maseko wabhaptizwa. Xa wayecinga ngeenyanga ezidluleyo ezimbalwa, uBrunella wavuma esithi: “Bekungelula kwaphela. Kufuneka ube namandla kakhulu, yaye kufuneka ucinge izinto ezikhuthazayo. . . . Ukholo lwam beluvavanywa, kodwa ndaqina, ibe ndisaceba ukuba nguvulindlela othe ngxi [umlungiseleli wexesha elizeleyo].”

Ebutsheni bowe-1991, isigulo sikaBrunella saqala phantsi. Waphantse wafa ngoxa wayefumana unyango lwemichiza, kodwa isimanga sezimanga, wachacha. NgoAgasti wayebhetele ukuba loo nyanga angayichithela kubulungiseleli basesidlangalaleni njengovulindlela ongumncedani. Isigulo sakhe saya sithath’ unyawo kwakhona, ibe ngoNovemba 1991 umzimba wakhe wawunomhlaza kwiindawo ezahlukeneyo. Elinye iqela loogqirha kwesinye isibhedlele laqalisa ukumnyanga ngonyango lwemitha.

Naphantsi kwezo meko zinzima ngolo hlobo, uBrunella wahlala omelele ezibekele usukelo lokomoya. Xa kwakuqala ukufunyaniswa ukuba uneleukemia, waxelelwa ukuba usenokuphila iinyanga ezintandathu kuphela. Ngoku, kwithuba eliphantse libe ngunyaka onesiqingatha, uBrunella wayesaqhubeka ecebela ikamva. Omnye umdala webandla lakhe wagqabaza ngelithi: “Wayengayeki ixesha limke namanzi xa kufuneka afikelele usukelo lwakhe. Ukholo lukaBrunella kwiParadisi kaThixo ethenjisiweyo lwamomeleza kuvavanyo lwakhe. Wakhulela ekubeni ngumKristu oqolileyo ngoxa eselula ngeminyaka. Isimilo nesimo sakhe sengqondo saba nempembelelo ebandleni ibe sabanceda abo babemazi, kuquka nabasebenzi basesibhedlele.” Unina ukhumbula oku: “Wayengaze akhalaze. Xa ubani embuza ukuba uziva njani, ubedla ngokuphendula athi, ‘Ndiyaphila’ okanye, ‘Akukubi kangako, unjani wena?’”

Ikamva Elinqabisekileyo

UBrunella waceba ukubakho kwiNdibano Yesithili YamaNgqina KaYehova “Yabathwali Bokukhanya” ngoJulayi 1992. Noko ke, ngexesha lendibano, uBrunella wayelaliswe esibhedlele, ibe wayesele esekhukweni lokufa. Noxa kunjalo, wabakho endibanweni ehamba ngesitulo esiqhutywayo, enqwenela ukubona umdlalo othi Ukwenza Okuthe Tye Emehlweni KaYehova.

Wabuyela kwintsapho yakowabo kwiintsuku ezimbalwa zokugqibela zobomi bakhe. UNicoletta uthi: “De kwasa ekupheleni, wayexhalabele abanye ngaphezu kwesiqu sakhe. Wayedla ngokubakhuthaza bafundisise iBhayibhile, ebaxelela ukuba, ‘Siya kuba kunye eParadisi.’”

UBrunella wafa ngoJulayi 27, 1992, omelele kwithemba lakhe lokuvukela kubomi kwiParadisi esemhlabeni. Wanela nje ukuqalisa ukufikelela usukelo lwakhe, kodwa wayeceba ukuqhubeka nozahlulelo lwakhe emva kovuko. Kwiintsuku nje ezimbalwa ngaphambi kokufa kwakhe, uBrunella wabhala le leta ilandelayo, eyafundwa kwinkonzo yomngcwabo wakhe.

“Bahlobo Abathandekayo:

“Ndiyanibulela ngobukho benu. Ubukho benu buthetha lukhulu kwintsapho yasekhaya.

“Kubantu ebesisondelelene—sityhubele okuninzi kakhulu. Sibe namahla ndinyuka amaninzi, kodwa ebekho nabehlekisa. Ibingumlo onzima nothabathe ithuba elide, kodwa andiziva ndoyisakele. Njengokuba iZibhalo zisitsho, ‘Umzamo omhle ndiwuzamile, ugqatso ndilufezile, ukholo ndilugcinile.’—2 Timoti 4:7.

“Kuninzi nendikufundileyo, ibe ndikhule ngokukhawuleza, yaye abahlobo nabo bebekunye nam bayibonile loo nguqulelo. Ndibulela bonke abantu abebendixhasa.

“Nina bakholelwa kwinkqubo entsha nakuYehova niyazi ukuba kuza kubakho uvuko, kanye njengokuba uYohane 5:28, 29 esitsho. Ngoko qhubekani nomelele enyanisweni, yaye siya kukwazi ukuphinda sibonane kwakhona.

“Ndiyababulela abantu abayaziyo imeko ebendikuyo. Salani kakuhle. Ndinithanda nonke.”

UBrunella akazange avumele ubutsha bakhe okanye ukugula kwakhe kutshintshe uzahlulelo lwakhe kuThixo. Umzekelo wokholo nozimiselo lwakhe ukhuthaza abaselula nabakhulu ukuba nabo balahle nayiphi na into enokubathintela ekubalekeni ugqatso lobomi.—Hebhere 12:1.