Ngaba Unako Ukusondela KuThixo Ongabonakaliyo?
‘Ndinokulwakha njani ulwalamano olusondeleyo nomntu endingenakumbona?’ usenokubuza utsho. Loo mbuzo usenokubonakala usengqiqweni. Kodwa khawucinge:
KUBALULEKE kangakanani ukumbona umntu xa usakha ulwalamano lothando noluhlala luhleli? Ngaba iimpawu ezingenakubonwa kuye azibalulekanga ngokulinganayo, okanye nangaphezulu? Kunjalo kanye! Ngenxa yoko abanye abantu baye bakha ulwalamano olusondeleyo nabanye ngokubabhalela rhoqo—iileta zabo zizichaza ngokunyaniseka izinto abazithandayo, abangazithandiyo, usukelo, imigaqo, uburharha nezinye izinto abatyekele kuzo okanye abanomdla kuzo.
Nabantu abaziimfama bayabonisa ukuba ukubona akuyonto ibalulekileyo ukuze ubani akhe ulwalamano olusondeleyo nomnye umntu. Masenze umzekelo ngoEdward noGwen, isibini esitshatileyo esiziimfama.a UEdward wadibana noGwen kwisikolo seemfama, apho babengabafundi abakhulileyo kunye. Wazithanda iimpawu zikaGwen, ngokukodwa ukunyaniseka kwakhe kwindlela athetha ngayo nakwihambo yakhe, nesimo sengqondo sakhe esihle ngokuphathelele umsebenzi. Naye uGwen watsaleleka kuEdward kuba, ngokutsho kwakhe, “wayenazo zonke iimpawu endakhula ndichazelwa ukuba zibalulekile.” Baqalisa ukuthandana baza batshata emva kweminyaka emithathu.
UEdward uthi: “Xa nikunye, ukuba yimfama akwenzi mahluko ekwakheni ulwalamano nomnye umntu. Ewe nisenokungabonani, kodwa ke iimvakalelo zona azivalekanga.” Ngoku kudlule iminyaka engama-57, ibe basathandana okuyaa. Bachaza besithi imfihlelo yolwalamano lwabo oluhle ibandakanya ubuncinane izinto ezine: (1) ukuphawula iimpawu zomnye umntu, (2) ukucinga nokutsaleleka kwezo mpawu, (3) ukugcina unxibelelwano oluhle, kunye (4) nokwenza izinto kunye.
Ezi ngongoma zine zibalulekile kulo naluphi na ulwalamano oluhle, enoba lolwabahlobo, amaqabane omtshato okanye, okona kubalulekileyo, olwabantu noThixo. Kwinqaku elilandelayo, siza kubona indlela ukusebenzisa ezi ngongoma okunokusinceda ngayo sakhe ulwalamano olusondeleyo noThixo, nangona singenakumbona.b
[Imibhalo esemazantsi]
a Amagama atshintshiwe.
b Ngokungafaniyo nolwalamano oluphakathi kwabantu, ulwalamano noThixo lusekelwe ekukholelweni ukuba ukho. (Hebhere 11:6) Ukuze ufumane ingxubusho ecokisayo ephathelele ukwakha ukholo olomeleleyo kuThixo, nceda ubone incwadi ethi Is There a Creator Who Cares About You?, epapashwe yiWatchtower Bible and Tract Society of New York, Inc.