Ukuvula Amehlo Kwiindaba Ezilungileyo

IQHALO laseDenmark lithi: “Isibhakabhaka asibonakali singeluhlaza kangako kuba indoda eyimfama ingasiboni.” Kodwa kubomi bethu bemihla ngemihla obuxakekileyo, ngaba siyasiphawula isibhakabhaka ukuba siluhlaza, ngokungathi kunjalo? Ngaba sikhangela kwikamva sinentembelo? Ngaba sizikholelwa ngokwenene iindaba ezilungileyo esizifumana kwiLizwi likaThixo, iBhayibhile?

Kwinqaku elandulelayo, sihlolisise iinkalo zobumfama bokoqobo. Ngoku makhe sihlole uhlobo lokubona olubaluleke ngakumbi. Lubandakanya ulonwabo lwethu lukanaphakade kuquka namathemba abantu bethu esibathandayo.

Ngokungathandabuzekiyo, sijamelene ‘namaxesha anomngcipheko.’ (2 Timoti 3:1) Yintoni eyenzekayo njengoko abantu bezama ukuzixhasa, benyamezela ukungabi nampilo neengxaki zentsapho, baze bahlangabezane nentswela-bulungisa kwezentlalo nokungabikho kothando? Okulusizi kukuba, abaninzi bafumanisa ukuba intembelo yabo kwabanye abantu, kunqulo, nakurhulumente iyaphela. Bephelelwe ngamatyholo, bambi bagqiba kwelokuba iingxaki zabo azisayi kuze ziconjululwe ngendlela efanelekileyo. Kwiphephandaba laseBrazil iJornal da Tarde, uJacob Pinheiro Goldberg uthi: “Xa abantu bejamelene neemeko eziqatha ngokwenene, iimpazamo ziyabacaphukisa kangangokuba bangaqiqi ngokufanelekileyo, baze bakholose ngezithethe ezibuntsomirha.” Ukanti, kwanaxa izinto zingalungi, sifuna ukusebenzisa ingqiqo efanelekileyo, akunjalo na?

Okomzuzwana khawube nomfanekiso-ngqondweni ufunela intsapho yakho ikhaya, yaye imali asiyongxaki kuwe. Mhlawumbi ukhangela uze uye kwizindlu ezahlukahlukeneyo kwimimandla eyahlukahlukeneyo. Nangona abathengisi bezindlu bezama ukwanelisa iminqweno yakho, akulifumani ikhaya elisengqondweni yakho. Ukanti, ekubeni kubandakanyeke ulwaneliseko nentlalo-ntle yentsapho yakho, akuncami, akunjalo na? Ngoku khawube nombono wovuyo oba nalo xa ekugqibeleni uyifumana indlu obuyifuna.

Kanye njengokuba ubuya kuchitha ixesha ufuna ikhaya elitsha, kutheni ungahlolisisi iBhayibhile ukuze ufumane isicombululo kwiingxaki zakho? Kanye njengokuba sifanele sicinge ngezibakala xa sisenza izigqibo ngekhaya, ngoko sifanele sicinge nzulu ngoko sikufunda kwiLizwi likaThixo. Yaye okuyingenelo ngakumbi kunokufumana ikhaya kukubona nokwamkela kwethu inyaniso ngoYehova uThixo noYesu Kristu. UYesu wathi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.”—Yohane 17:3.

Kodwa ukuba isigidimi seBhayibhile sixabiseke kangako, kutheni bebaninzi kangaka abantu abamfanyekisiweyo kwiindaba zayo ezilungileyo? Phakathi kwezinye izinto, yaye oku kunokubothusa abaninzi, “ihlabathi liphela lilele kongendawo.” (1 Yohane 5:19) Ngokomphumo, uSathana uMtyholi ‘uzimfamekisile ngaphakathi kwabo iingqiqo zabangakholwayo, ukuze singabengezeli kubo isikhanyiso seendaba ezilungileyo zobuqaqawuli bukaKristu, ongumfanekiselo kaThixo.’ (2 Korinte 4:4) Nangona sibona ngamehlo ethu, yingqondo ekucacisayo ukukhanya okungena ngeliso. Ngenxa yoko, ukuba yimfama kukwacaciswa ‘njengokungakwazi okanye ukungafuni ukuqiqa okanye ukugweba.’ Oku kusikhumbuza ngeqhalo elidumileyo elithi: “Akukho bani uyimfama ngaphezu kwalowo ungafuni ukubona.”

Umntu oyimfama akanakukubona oko kuphambi kwakhe, ngoko usenokuba sengozini yokwenzakala. Ubumfama bokoqobo kubantu abaninzi abunakunyangwa ngoku, ukanti akukho bani unyanzelekileyo ukuba ahlale eyimfama ngokomoya.

Ukoyisa Ubumfama Bokomoya

Kanye njengokuba iimeko ezingacocekanga kakuhle zinokumenza ubani angaboni kakuhle, imeko-bume ethob’ isidima inokuba negalelo kubumfama bokuziphatha. Ngaphezu koko, uYesu Kristu walumkisa nxamnye neemfundiso nezithethe eziyilwe ngabantu. Walenza lacaca elokuba iinkokeli zonqulo zasemva phayaa zaziyilahlekisa imihlambi yazo: “Ngabakhokeli beemfama abakwaziimfama; ke kaloku, xa sukuba imfama ikhokela imfama, zombini ziya kweyela emhadini.”—Mateyu 15:14.

Kunokuba balahlekiswe ziinkokeli eziziimfama, hayi indlela abavuya ngayo abo bawavulayo amehlo abo kwiindaba ezilungileyo ezingoBukumkani bukaThixo! UYesu wavakalisa: “Mna ndizele ugwebo kweli hlabathi, ukuze abangaboniyo babone.” (Yohane 9:39) Noko ke, banokukwazi njani ukubona abaziimfama ngokomoya? Masihlabele mgama nohlolisiso lwethu ngobumfama bokoqobo.

Amalungiselelo ahlukahlukeneyo ayafumaneka ngoku kwabo bangaboni kakuhle. Oku kwakungasoloko kunjalo. Akuzange kwenziwe mizamo inyaniseke ngokwenene ukunceda abaziimfama ngaphambi kokuba uValentin Haüy avule isikolo esikhethekileyo sabaziimfama ngowe-1784. Kamva, uLouis Braille wayila Iincwadi Zabangaboniyo; wenjenjalo ukuze ancede abantu abaziimfama bakwazi ukufunda.

Kuthekani ngabaziimfama ngokomoya? Kwiminyaka yakutshanje kuye kwenziwa imigudu enyanisekileyo yokuvakalisa iindaba ezilungileyo kwanakweyona mimandla ikude emhlabeni. (Mateyu 24:14) AmaNgqina kaYehova ayakuvuyela ukunikela ithemba kwabaziimfama zokomfuziselo nabazizo ngokoqobo.

Ibhinqa laseBrazil labhala: “Phezu kwaso nje isiphene somzimba endinaso ndifuna ukuthi, ndiyabona—ngokomoya. Onjani ukumangalisa uThixo! Siyavuya ukwazi ukuba ‘uYehova uya kuzihluthisa [azanelise] zonke izinto eziphilileyo.’” (INdumiso 145:16) Yaye uJorge, oyimfama ngokoqobo, ukhumbula oku: “Ubomi bam bunokwahlulwa bube ziinxalenye ezimbini: ngaphambi nasemva kokudibana namaNgqina. . . . Ngoncedo lwawo, ndaqalisa ukulibona ihlabathi ngokucacileyo nangokuqaqambileyo. Ndiyaluvuyela unxulumano oluhle nabo bonke abasebandleni.” Nakuba oko kuvuyisa kakhulu, iBhayibhile iyasiqinisekisa ukuba kungekudala akukho bani oya kuba yimfama emhlabeni—ngokoqobo okanye ngokomoya. Kuya kwenzeka njani oko? Kuya kungqineka kuyinyaniso njani emhlabeni wonke ukuba ‘uYehova uvula amehlo eemfama’?—INdumiso 146:8.

Ekuphela Konyango Olusisigxina—UBukumkani BukaThixo

Phezu kwako nje ukwanda kolwazi lwezamayeza, izifo ezininzi ziyaqhubeka zibangela ubumfama, iintlungu, nokufa. Ngoko, yintoni efunekayo ukuze kupheliswe ukungondleki, iimeko zokungacoceki, nokuxinezeleka okubangela ukungaboni nokuphelisa uyolo lobomi? Ukuphilisa kukaYesu abaziimfama nabanye kwakungumlinganiselo omncinane woko kuza kwenzeka kwikamva. Okuvuyisayo kukuba, umsebenzi wakhe wokufundisa nowokuphilisa wawubonisa kwangaphambili iintsikelelo ezaziya kuthululelwa emhlabeni phantsi korhulumente obuBukumkani bukaThixo.

Ukuphilisa ngomlinganiselo wehlabathi lonke kusondele.a Le nkqubo kaThixo yokuphilisa iboniswe kakuhle ngumpostile uYohane: “Sandibonisa umlambo wamanzi obomi, uqaqambile, ngathi ngumkhenkce, uphuma etroneni kaThixo neyeMvana. Phakathi kwesitrato sawo, ngapha nangapha komlambo, ngumthi wobomi, ovelisa iintlobo zeziqhamo ezilishumi elinambini, unika iinyanga ngeenyanga zonke isiqhamo sawo; aye amagqabi omthi lowo engawokuphilisa iintlanga.”—ISityhilelo 22:1, 2.

Amabinzana anjengala ‘amanzi obomi’ nelithi ‘imithi yobomi’ abonisa ukuba emva kokupheliswa kwenkqubo yanamhlanje engendawo, amalungiselelo aphilisayo oBukumkani bukaThixo aya kwenza abantu bafezeke ngokuthe ngcembe. Enyanisweni, iingenelo zedini lentlawulelo likaYesu (kuquka ukuxolelwa kwezono ngokupheleleyo), kunye nolwazi ngoYesu Kristu noYise, ziya kuzisa impilo efezekileyo nobomi obungunaphakade.—Yohane 3:16.

Ulonwabo Kwihlabathi LikaThixo Elitsha

Ngoko, khawube nomfanekiso-ngqondweni wehlabathi elingenabo ubundlobongela, ungcoliso okanye ubuhlwempu. Yiba nombono wentsapho yakho iphila ngoxolo kwiParadisi ebuyiselweyo. (Isaya 32:17, 18) Olunjani uvuyo oluya kubangelwa kukubona iintlobo ngeentlobo zemibala ngengqondo nangezivamvo ezifezekileyo!

UFaber Birren uthi: “Imeko engokwemvelo yomntu ikukuphila kwimeko-bume eguquguqukayo rhoqo—ngokukhanya, umbala, nezimvo. Ngokwemvelo ayikho into ekuthiwa yimeko-bume enomdintsi. Imibala yenye yezinto zemvelo ezibukeka gqitha zeli hlabathi. Ingokwemvelo, kungekhona into yamaxesha athile, yaye ikakhulu ubomi obumnandi buxhomekeke kuyo.”

Hayi indlela esixabiseke ngayo isiphiwo sokubona! Olunjani uvuyo oluya kubakho xa amehlo abekade eziimfama—ngokoqobo okanye ngokomoya—ebona!

Ewe, kwiParadisi ebuyiselweyo ezayo, ubumfama nezinye iziphene azisayi kuba sabangela ukungonwabi! Akukho mntu uya kuphinda alahlekiswe kwakhona. Ekubeni kuya kwesamela uthando lokwenene, bonke abantu baya kukhanyiselwa ngokomoya. Oko, nokungakumbi, akunto ikude, kodwa ngoku lixesha lokuba samkelwe nguLowo uya kuzalisekisa idinga lakhe elingokwesiprofeto: “[Ngelo xesha, NW] aya kuvulwa amehlo eemfama”!—Isaya 35:5.

[Umbhalo osemazantsi]

[Umfanekiso okwiphepha 7]

Ngelo xesha aya kuvulwa amehlo eemfama!