Nceda Abantu Abangaboniyo Bafunde NgoYehova
1. UYesu wayibonisa njani imfesane kwiimfama?
1 UYesu wayeza kufa kwiintsuku ezingephi. Njengoko wayeshiya isixeko saseYeriko, iimfama ezimbini ezingqibayo zadanduluka zathi: “Nkosi, . . . yiba nenceba kuthi!” Nangona uYesu wayecinga ngeemvavanyo awayeza kutyhubela kuzo, wema, wazibiza, waza waziphilisa. (Mat. 20:29-34) Sinokuyixelisa njani imfesane uYesu awayibonisa iimfama?
2. Singashumayela njani kumntu ongaboniyo esidibana naye kwiindawo zikawonke wonke?
2 Yiba Luncedo: Ukuba udibana nomntu ongaboniyo, mhlawumbi kwindawo kawonke wonke, zazise kuye uze ucele ukumnceda. Ekubeni abantu abangaboniyo bedla ngokuxhatshazwa, ekuqaleni usenokungakuthembi. Noko ke, xa unobubele nomdla kuye, uya kukuthemba. Ungalibali ukuba, ukuba yimfama kunamanqanaba angafaniyo, ibe ngawo agqibayo ukuba lo mntu ufanele kukuncedwa njani. Emva kokumnceda, mhlawumbi ungade umazise ukuba ufundisa abantu iBhayibhile. Cela ukumfundela imibhalo enjengale, iNdumiso 146:8 okanye uIsaya 35:5, 6. Ukuba uyakwazi ukufunda iBraille, mbuze ukuba akangethandi na ukuba nencwadi eza kumnceda afunde okungakumbi ngeBhayibhile. Unokude umncede afumane iincwadi ezirekhodiweyo ku-jw.org/xh. Ukuba ikhompyutha yakhe iyakwazi ukumfundela ngokuvakalayo loo nto ivelileyo, angazivuyela iincwadi eziku-jw.org/xh ezinokukhutshelwa nge-RTF (Rich Text Format).—Jonga ibhokisi ethi “Xa Unceda Imfama. . .”
3. Singabakhangela njani abo bangaboniyo kwintsimi yethu?
3 Khangela Abaziimfama: Kunqabile ukuba sidibane nabantu abaziimfama kwindlu ngendlu ngenxa yokuba kunzima ngabaninzi ukuvumela umntu abangamaziyo angene kwizindlu zabo. Ngoko ke, ngumgudu ‘ukubakhangela’ ukuze sishumayele kubo. (Mat. 10:11) Ngaba kukho umntu oyimfama osebenza okanye ofunda naye? Yiya kuye uze uthethe naye. Ukuba kwintsimi yakho kukho isikolo sabangaboniyo, zama ukuqonda ukuba bangazamkela na iincwadi zethu zeBraille kwithala labo. Ngaba kukho umntu omaziyo onelungu lentsapho elingaboniyo? Ngaba kwintsimi yakho kukho imibutho enika abantu abangaboniyo izinto eziluncedo? Xelela ilungu lentsapho okanye umntu okhoyo ngelo xesha ukuba amaNgqina kaYehova anomdla wokunceda abo bangaboniyo, uze ucele ukubaphathela iincwadi zeBraille okanye amazwi arekhodiweyo. Mbonise ukuba iBhayibhile ithembisa ukuba, kungekudala uThixo uza kukuphelisa tu ukungaboni. Usenokude umbonise nevidiyo eku-jw.org/xh enomxholo othi, Andinakuphila Ngaphandle Kwayo, ebalisa ngamava endoda ethe yangenelwa ngokuba neBhayibhile yeBraille. Ngokucacisa isizathu sotyelelo lwakho, uya kuba nethuba lokufikelela kwabo bangaboniyo.
4. Sifunda ntoni kumava kaJanet?
4 Udade ongaboniyo ogama linguJanet waya kwindawo enabantu abangaboniyo. Waqalisa incoko nebhinqa elincinane. UJanet wathi kulo, “uYesu waphilisa abaziimfama ukuze abonise into aza kuyenzela bonke abo bangaboniyo.” Bafunda ISityhilelo 21:3, 4, ibe uJanet wachaza indlela uBukumkani bukaThixo obuza kusiphumeza ngayo esi sithembiso. Eli bhinqa lathi cwaka laza lathi: “Zange ndayiva le nto kumntu ongaboniyo. Uninzi lwabantu ababonayo lukholelwa ukuba abantu baba ziimfama ngenxa yento abayenzayo okanye eyenziwa ngookhokho babo.” UJanet wathumela umyalezo ochaza indlela anokuyikhuphela ngayo incwadi ethi Okufundiswa YiBhayibhile, ibe ngoku bafunda iBhayibhile kunye kabini ngeveki.
5. Nangona singenakubaphilisa abaziimfama njengoYesu, ziziphi iintsikelelo ezinokubangelwa ngumdla esiwubonisa kubo?
5 Ewe kona, asinakukwazi ukuphilisa iimfama njengokuba uYesu wenzayo, kodwa sinako ukunceda bonke abo bamfanyekiswe nguthixo wale nkqubo yezinto kuquka nabo bangaboniyo ukuze baqonde inyaniso yeLizwi likaThixo. (2 Kor. 4:4) UYesu waphilisa amadoda amabini ngaseYeriko ngenxa yokuba ‘wayebasizela.’ (Mat. 20:34) Ukuba nathi sibonisa umdla ofanayo kwabo baziimfama, singaba nelungelo lokunceda abanye bafunde ngoYehova, lowo uza kukuphelisa tu ukungaboni.