IBhayibhile—Incwadi Efundisa Indlela Yokuphila
“ILIZWI likaThixo liphilile, linamandla yaye libukhali ngaphezu kwalo naliphi na ikrele elintlangothi-mbini . . . yaye liyakwazi ukuphicotha iingcamango notyekelo lwentliziyo.” (Hebhere 4:12) Le nkcaza yoko kunokuphunyezwa liLizwi likaThixo ngokuqinisekileyo iphawula ukuba iBhayibhile asiyoncwadi nje emnandi.
Omnye umbhali ngezonqulo wakubeka ngokungqalileyo oku wathi: “Isigidimi sayo sibaluleke njengokuphefumla ebomini bethu.” Wongezelela wathi: “Xa ucinga ngendlela esikulangazelela ngayo ukuphiliswa namhlanje uze ufunde iBhayibhile unalo mbono, ufumana imiphumo engummangaliso.” Njengesibane esiqaqambileyo, iBhayibhile inikela ukhanyo kwimibuzo emininzi eyintsinda-badala nakwiingxaki zobomi banamhlanje.—INdumiso 119:105.
Eneneni, ubulumko ekuthethwa ngabo eBhayibhileni bunamandla okulungisa indlela esicinga ngayo, busincede sicombulule iingxaki zethu, siphucule ubomi bethu, buze busixhobise ngobuchule bokuhlangabezana neengxaki esingenakuzitshintsha. Okona kubaluleke ngakumbi kukuba, iBhayibhile isinceda sazi uThixo yaye simthande.
Incwadi Ebangela Ubomi Bube Nenjongo
UMbhali weBhayibhile, uYehova uThixo, ‘uqhelene nazo zonke iindlela zethu.’ Uzazi ngakumbi izinto esizisweleyo ngokwenyama, ngokweemvakalelo nangokomoya nangaphezu kokuba thina sizazi. (INdumiso 139:1-3) Ngokusengqiqweni, ubeka imilinganiselo ecacileyo ngendlela abafanele baziphathe ngayo abantu. (Mika 6:8) Kububulumko ukufuna ukuqonda loo milinganiselo nokhokelo uze ufunde ukuphila ngayo. Unoyolo umntu “oyoliswa ngumthetho kaYehova,” utsho njalo umdumisi. “Konke akwenzayo kuya kuphumelela.” (INdumiso 1:1-3) Ngokuqinisekileyo sifanele silihlolisise elo themba.
UMaurice, umfundisi-ntsapho odla umhlala-phantsi, wayesoloko ekholelwa ukuba iBhayibhile ixabisekile ngokwembali yaye iyafundisa. Ukanti, wayethandabuza ukuba iphefumlelwe nguThixo. Emva kokuphulaphula inkcazelo ngesizathu sokuba uThixo anike abantu iLizwi lakhe elibhaliweyo, uMaurice wahlolisisa iziprofeto zeBhayibhile ezahlukahlukeneyo. Ngoxa wayesengumfana, wayefunde imbali yamandulo, uncwadi, inzululwazi nokuma komhlaba. Uyavuma ukuba wayenengqondo ekhawulezayo kodwa engaqiqi ngokwaneleyo ukuba angayiqonda imizekelo yezinto ezininzi ezixhasa ubunyaniso beBhayibhile. “Ndandibanjiswe kukusukela ubomi obutofotofo, ubutyebi neziyolo zobomi. Ngelishwa, ndahlala ebumnyameni yaye ndingazi nto ngobuhle nobunyaniso beyona ncwadi ibalaseleyo kwezakha zabhalwa.”
Ngoku uMaurice ukwiminyaka yama-70, ebhekisela kwingxelo yokubonakala kukaYesu kumpostile uTomas, ngoxabiso uthi: “Isandla sam siye safakwa ‘kwinxeba elophayo’ eliya kuwaphelisa ngonaphakade engqondweni yam onke amathandabuzo okuba iBhayibhile iyinyaniso.” (Yohane 20:24-29) Njengoko umpostile uPawulos watshoyo ngokufanelekileyo, iBhayibhile ityhila utyekelo lwentliziyo, ize yenze ubomi bube nentsingiselo. Ngokwenene iyincwadi yobomi.
Amandla Okunyamezela Ubomi Obuneengxaki
IBhayibhile inikela nesiluleko esinceda abantu ukuba bahlukane nemikhwa emibi. UDaniel wakwazi ukoyisa umkhwa ongacocekanga wokutshaya, wayeka nokuya kumatheko angalawulekiyo nokusebenzisa kakubi utywala. (Roma 13:13; 2 Korinte 7:1; Galati 5:19-21) Ngokusengqiqweni, ukwahlukana nemikhwa enjalo nokwambatha “ubuntu obutsha” kufuna umgudu onyanisekileyo. (Efese 4:22-24) UDaniel uthi: “Kwakulucelomngeni ngenxa yokuba asifezekanga.” Sekunjalo, waphumelela. Ngoku uDaniel ufunda iLizwi likaThixo yonke imihla, yaye limenza ahlale esondele kuYehova.
Njengoko wayekhula, uDaniel wayesoloko eyihlonela ngokunzulu iBhayibhile—nangona engazange ayifunde—yaye wayethandaza kuThixo busuku ngabunye. Ukanti, ikho into eyayisilela. Wayengafumani lonwabo. Zajika izinto mhla waqala ukubona igama likaThixo eBhayibhileni. (Eksodus 6:3; INdumiso 83:18) Emva koko, wasebenzisa igama elithi Yehova xa ethandaza, yaye imithandazo yakhe yaba yengqale ngakumbi. “UYehova waba ngumntu osondele kakhulu kum, yaye usengoyena mhlobo wam usondeleyo.”
Ngaphambi kokuba afunde iBhayibhile, uDaniel wayenembono emfiliba ngekamva. Uthi: “Akufuneki nokuba ude ube ngumntu okrelekrele kakhulu ukuze ubone oko kwenzekayo emhlabeni namhlanje. Ndandisoyika, yaye ndazama ukuzigcina ndixakekile ukuze ndingacingi ngako.” Emva koko wafunda ukuba uThixo uya kumisela okusesikweni kubo bonke kumhlaba ocociweyo, apho abantu abathobelayo beya kunandipha uxolo nolonwabo olungunaphakade. (INdumiso 37:10, 11; Daniyeli 2:44; ISityhilelo 21:3, 4) Ngoku uDaniel unethemba eliqinisekileyo. Le mpembelelo yomelezayo yeBhayibhile imnceda ukuba ahlale enembono efanelekileyo ngobomi.
Uncedo Lokoyisa Iingxaki Zomphefumlo
UGeorge wayeneminyaka esixhenxe ukufa kukanina. Wayesoyika ukulala ebusuku, engazi nokuba uya kuvuka na ngemini elandelayo. Wandula ke wafunda oko kwathethwa nguYesu ngokufa novuko esithi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi [likaYesu] baze baphume.” Wachukunyiswa nangamazwi kaYesu athi: “Ndim uvuko nobomi. Lowo ubonisa ukholo kum, nokuba uyafa, uya kubuyela ebomini.” (Yohane 5:28, 29; 11:25) Ezo ngcamango zavakala zisengqiqweni yaye zithuthuzela. UGeorge uthi: “Akubangeli mdla ukucinga nje ngale nyaniso kodwa ichukumisa nentliziyo.”
UDaniel, okhankanywe ngaphambilana naye wayesoyika. Unina wayengakwazi ukumkhulisa yedwa, ngoko wasiwa kumakhaya amaninzi okukhulisa abantwana. Wayesoloko eziva elikheswa yaye wayelangazelela ukufumana unqabiseko lokuba lilungu lentsapho enothando. Ekugqibeleni, wakufumana oko wayekufuna ngokufundisisa iBhayibhile. UDaniel wanxulumana nebandla lamaKristu lamaNgqina kaYehova waza waba yinxalenye yentsapho yokomoya, apho waziva amkelekile yaye ethandwa ngabanye. Eneneni, iBhayibhile iyingenelo ngokoqobo yaye iyanelisa emphefumlweni.
Khumbula ukuba, uYehova uyakubona oko kusentliziyweni yethu yaye uyakwazi oko sikufunayo. UThixo “ucikida iintliziyo,” yaye unika “ngamnye ngokweendlela zakhe.”—IMizekeliso 21:2; Yeremiya 17:10.
Isiluleko Esisebenzisekayo Kubomi Bentsapho
IBhayibhile inikela isiluleko esisebenzisekayo ngokuphathelele imicimbi yolwalamano lwabantu. UGeorge uthi: “Ukungaboni ngasonye nokungaqondani zezinye zezinto ezibangela uxinezeleko ebomini.” Uhlangabezana njani nako? “Xa ndivakalelwa kukuba umntu othile unento ngakum, ndisebenzisa isiluleko esingqalileyo esikuMateyu 5:23, 24 esithi: ‘Xolelana nomzalwana wakho.’ Ukukwazi nje ukuthetha ngolo ngquzulwano kuba nemiphumo. Ndiyaluva uxolo lukaThixo ekuthethwa ngalo eBhayibhileni. Eso siluleko siyasebenza. Siluncedo ngokwenene.”—Filipi 4:6, 7.
Xa indoda nomfazi bengaboni ngasonye, bobabini kufuneka ‘bakhawuleze ukuva, bacothe ukuthetha, bacothe ukuqumba.’ (Yakobi 1:19) Elo cebiso liphucula unxibelelwano. UGeorge wongezelela ngokuthi: “Xa ndisebenzisa isiluleko sokuthanda nokuphatha umfazi wam ngendlela endiziphatha ngayo, ndiyibona ngokukhawuleza imiphumo. Kuba lula ukuba andihlonele.” (Efese 5:28-33) Ewe, iBhayibhile isifundisa ukuba sikuqonde size sihlangabezane nako ukungafezeki kwethu nendlela esinokuphumelela ngayo ukuhlangabezana nokungafezeki kwabanye.
Isiluleko Esihlala Sihleli
UKumkani osisilumko uSolomon wathi: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.” (IMizekeliso 3:5, 6) Hayi indlela acace nanzulu ngayo loo mazwi!
IBhayibhile ingamandla okwenza okulungileyo. Inceda abo bathanda uThixo ukuba bavisisanise ubomi babo nokuthanda kwakhe baze bafumane ulonwabo ‘ngokuhamba emthethweni kaYehova.’ (INdumiso 119:1) Kungakhathaliseki ukuba zinjani iimeko zethu, iBhayibhile iqulethe ukhokelo nesiluleko esisifunayo. (Isaya 48:17, 18) Yifunde yonke imihla, camngca ngoko ukufundayo uze ukusebenzise. Iya kuyigcina ingqondo yakho ihluzekile yaye ijoliswe kwizinto ezinyulu nezakhayo. (Filipi 4:8, 9) Akuyi kufunda indlela yokuphila nokunandipha ubomi kuphela kodwa uya kufunda nokuthanda uMdali wobomi.
Ngokulandela elo khondo, wena—njengabanye abazizigidi—uya kufumanisa ukuba iBhayibhile asiyoncwadi nje emnandi. Iya kungqineka iyincwadi yokuphila ngokwenene!
[Umfanekiso okwiphepha 6]
IBhayibhile inako ukomeleza isigqibo sakho sokoyisa imikhwa emibi
[Umfanekiso okwiphepha 7]
IBhayibhile ikufundisa indlela yokusondela kuThixo