IBhayibhile—Yayixatyisiwe Yaye Ukupapashwa Kwayo Kwakuthintelwa
“Ndinqwenela ukuba iincwadi ezingcwele ziguqulelwe kuzo zonke iilwimi,” wabhala watsho uDesiderius Erasmus, umphengululi odumileyo ongumDatshi wenkulungwane ye-16.
UMNQWENO kaErasmus wawukukuba bonke abantu bafunde iZibhalo yaye baziqonde. Noko ke, abachasi beBhayibhile bayikhaba ngaw’ omane loo ngcamango. Eneneni, ngelo xesha elaseYurophu laliyingozi kakhulu kwanakumntu obonisa umdla nje ongephi koko kuthethwa yiBhayibhile. Ipalamente yaseNgilani yawisa umthetho owawuyalela ukuba “nabani na ofunda iZibhalo ngesiNgesi ufanele ahluthwe umhlaba, impahla, nobomi . . . yaye, ukuba uyaqhubeka enenkani, okanye uye waphinda wazifunda emva kokuba eye waxolelwa, ufanele axhonywe kuqala ngenxa yokungcatsha ukumkani, andule ke atshiswe ngenxa yokuwexuka kuThixo.”
Kumbindi Yurophu, iNkundla Yokuncina Amakholwa YamaKatolika ekhohlakeleyo yayizingela amahlelo “oqhekeko,” njengabalandeli bakaWaldo baseFransi, ngenjongo yokuwatshutshisa ngenxa yomkhwa wawo wokushumayela “ngeevangeli okanye iileta nangezinye izibhalo ezingcwele, . . . ekubeni ukushumayela nokuthetha ngokuphandle ngezibhalo ezingcwele kwakwalelwe ngokupheleleyo kumarhamente.” Amadoda nabafazi abaninzi bathuthunjiswa ngokoyikekayo baza babulawa ngenxa yokuba bethanda iBhayibhile. Babezibeka esichengeni sokufumana izohlwayo ezibuhlungu ngenxa nje yokucengceleza uMthandazo weNkosi okanye iMithetho Elishumi nokufundisa abantwana babo.
Ukuzinikela okunjalo kwiLizwi likaThixo kwaqhubeka kukho ezintliziyweni zabahambi ngezonqulo ababehamba ngenqanawa beyokwenza uMntla Merika ithanga. Incwadi ethi A History of Private Life—Passions of the Renaissance ithi kwiMerika yamandulo, “ukufunda kwakubotshwa ngabande linye nonqulo, kwakuluphawu lwenkqubo esekelwe ngokupheleleyo ekuqhelaneni neBhayibhile.” Eneneni, intshumayelo eyapapashwa eBoston ngowe-1767 yancomela oku: “Zifunde ngenkuthalo izibhalo ezingcwele. Yonke imihla ekuseni nangokuhlwa umele ufunde isahluko eBhayibhileni yakho.”
Ngokutsho kweBarna Research Group yaseVentura, eKhalifoniya, abemi baseMerika abangaphezu kwama-90 ekhulwini, ngokomlinganiselo baneeBhayibhile ezintathu. Noko ke uhlolisiso olusandul’ ukwenziwa lubonisa ukuba, nangona iBhayibhile isaxatyiswe kakhulu apho, “ukuchitha ixesha elithile uyifunda, uyifundisisa uze ukusebenzise ebomini bakho oko ukufundayo kuyo . . . yinto yezolo.” Inkoliso yabantu inofifi nje ngoko ikuquletheyo. Omnye umbhali wemihlathi kumaphephandaba wathi: “Ingcamango yokuba [iBhayibhile] isenokuzisa izicombululo kwiingxaki nezinto ezixhalabisa abantu namhlanje, inqabe kakhulu.”
Ingcinga Exhaphakileyo
Inkolelo exhaphakileyo yeyokuba sinokuphumelela ebomini ngokusebenzisa nje ingqondo nangokuba nentsebenziswano. IBhayibhile igqalwa njengenye yeencwadi ezininzi ezithetha ngonqulo nangamava obuqu, kungekhona njengencwadi yezibakala nenyaniso.
Ngoko inkoliso yabantu ihlangabezana njani neengxaki ezandayo kunye neembambano eziyinkathazo ebomini? Isebumnyameni ngokomoya, ayinalo ukhokelo nolwalathiso oluqinileyo ngendlela yokuziphatha neyonqulo. Ifana neenqanawa ezingenamiphini yokubhexa, “zikhukuliswa zizo zonke iimfundiso zabantu, . . . ngenkohliso nobuqhophololo babantu.”—Efese 4:14, The Twentieth Century New Testament.
Ngoko, simele sizibuze, Ngaba iBhayibhile yenye nje yeencwadi zonqulo? Okanye ngaba ngokwenene iliLizwi likaThixo, eliqulethe inkcazelo esebenzisekayo nebalulekileyo? (2 Timoti 3:16, 17) Ngaba kufanelekile ukuba siyiqwalasele iBhayibhile? Le mibuzo iya kuphendulwa kwinqaku elilandelayo.
[Umfanekiso okwiphepha 3]
UDesiderius Erasmus
[Inkcazelo]
From the book Deutsche Kulturgeschichte
[Umfanekiso okwiphepha 4]
Abalandeli bakaWaldo babekelwa bucala ngenjongo yokuba batshutshiswe ngenxa yokuba babeshumayela ngeZibhalo
[Inkcazelo]
Stichting Atlas van Stolk, Rotterdam