Kutheni Ukhonza UThixo?
Ukumkani owayesoyika uThixo wanikela eli cebiso kunyana wakhe: “Uze umazi uThixo kayihlo, umkhonze ngentliziyo epheleleyo nangomphefumlo onoyolo.” (1 Kronike 28:9) Kucacile ukuba, uYehova ufuna abakhonzi bakhe bamkhonze ngeentliziyo ezinombulelo nezinoxabiso.
NJENGAMANGQINA kaYehova, siyavuma ukuba xa sasiqala ukucaciselwa amathemba eBhayibhile, sasidloba njengamatakane ngenxa yombulelo. Suku ngalunye, sasifunda into entsha ngeenjongo zikaThixo. Okukhona sasifunda ngoYehova, kokukhona sasisiya siba nomnqweno onamandla wokumkhonza “ngentliziyo epheleleyo nangomphefumlo onoyolo.”
Abaninzi abaye bangamaNgqina kaYehova bayaqhubeka bekhonza uYehova ngovuyo olukhulu kubo bonke ubomi babo. Noko ke, amanye amaKristu aqala kakuhle, kodwa ekuhambeni kwexesha, alahlekelwa yimbono yezizathu ezisishukumisela ukuba sikhonze uThixo. Ngaba oko kuye kwenzeka kuwe? Ukuba kunjalo, ungaphelelwa lithemba. Unokuphinda ulufumane uvuyo ophulukene nalo. Njani?
Cinga Ngeentsikelelo Zakho
Okokuqala, camngca ngeentsikelelo zemihla ngemihla ozifumanayo kuThixo. Cinga ngezipho ezihle zikaYehova: imisebenzi yakhe emininzi yendalo—izinto ezifumaneka kuye wonk’ ubani kungakhathaliseki imeko yakhe yentlalo okanye yezoqoqosho—amalungiselelo okutya neziselo, impilo oyinandiphayo, ulwazi lwakho ngenyaniso yeBhayibhile, yaye okona kubalulekileyo, isipho soNyana wakhe. Ukufa kwakhe kwakulungiselela indlela yokukhonza uThixo ngesazela esicocekileyo. (Yohane 3:16; Yakobi 1:17) Okukhona ucamngca ngokulunga kukaThixo, kokukhona uxabiso lwakho ngaye luya kukhula. Ngoko ke intliziyo yakho iya kukushukumisela ukuba umkhonze unombulelo ngako konke akwenzele kona. Akuthandabuzeki ukuba uya kuqalisa kwakhona ukuvakalelwa njengomdumisi owabhala esithi: “Zininzi izinto ozenzileyo, Owu Yehova Thixo wam, kwanemisebenzi yakho emangalisayo neengcamango zakho kuthi; akukho namnye onokuthelekiswa nawe. . . . Zininzi kakhulu kunokuba ndinokubalisa.”—INdumiso 40:5.
La mazwi abhalwa nguDavide, indoda eyayineengxaki ebomini bayo. Njengomfana oselula, uDavide wachitha ixesha elininzi eyimbacu kuba uKumkani uSawule ongendawo nabalindi bakhe babefuna ukumbulala. (1 Samuweli 23:7, 8, 19-23) UDavide naye wayenobuthathaka awayefanele ajamelane nabo. Wakuvuma oku kule Ndumiso yama-40 esithi: “Iintlekele zandirhawula de azaba nakubalwa. Ndafikelwa ziziphoso zakho ezingakumbi kunokuba ndinokuzibona; zaba ninzi ngakumbi kuneenwele zentloko yam.” (INdumiso 40:12) Ewe, uDavide wayeneengxaki, kodwa akazange onganyelwe ngokupheleleyo zizo. Wanikela ingqalelo kwiindlela uYehova awayemsikelela ngazo, phezu kwazo nje iingxaki awayenazo, yaye wafumanisa ukuba ezo ntsikelelo zazizodlula lee ingxaki awayenazo.
Xa uziva ugutyungelwa ziingxaki zobuqu okanye uziva ungafaneleki, kuhle ukukhe unqumame, uze ubale iintsikelelo zakho, njengokuba uDavide wenzayo. Akuthandabuzeki ukuba, uxabiso lwakho ngezo ntsikelelo lwakushukumisela ukuba uzahlulele kuYehova; iingcamango ezinjalo zisenokukunceda ukuba uvuselele uvuyo lwakho owaphulukana nalo zize zikuncede ukhonze uThixo ngentliziyo enoxabiso.
Iintlanganiso Zebandla Zinokukunceda
Ukongezelela ekucamngceni wedwa ngokulunga kukaYehova, simele sinxulumane namanye amaKristu. Kuyakhuthaza ukuhlanganisana ngokuthe rhoqo namadoda, amabhinqa nabantu abaselula abathanda uThixo nabazimiseleyo ukumkhonza. Umzekelo wabo unokusikhuthaza ukuba sikhonze uYehova ngomphefumlo uphela. Ubukho bethu kwiHolo yoBukumkani bunokubakhuthaza nabo.
Kuyavunywa ukuba, xa sifika ekhaya emva komsebenzi onzima wolo suku, okanye xa sidimazekile ngenxa yengxaki okanye ubuthathaka obuthile, kusenokungabi lula ukucinga ngokuya kwintlanganiso kwiHolo yoBukumkani. Xa kunjalo, kusenokufuneka sibe ngqongqo kwiziqu zethu, ‘siwuqobe umzimba wethu,’ ngokungathi kunjalo, ukuze sithobele umyalelo wokuhlanganisana namanye amaKristu.—1 Korinte 9:26, 27; Hebhere 10:23-25.
Ukuba oko kuyafuneka, ngaba sifanele sigqibe ngelithi asimthandi ngokwenene uYehova? Akunjalo. AmaKristu aqolileyo angaphambili awayenothando olungathandabuzekiyo ngoThixo ayefanele azibhokoxe ngamandla ukuze enze ukuthanda kukaThixo. (Luka 13:24) Umpostile uPawulos wayengomnye waloo maKristu. Ngokuphandle wazichaza iimvakalelo zakhe ngale ndlela: “Ndiyazi ukuba kum, oko kukuthi, kwinyama yam, akuhlali nto ilungileyo; kuba umnqweno ukho kum, kodwa amandla okwenza oko kuhle akakho. Kuba okulungileyo endikunqwenelayo andikwenzi, kodwa okubi endingakunqweneliyo kuko endikuqheliselayo.” (Roma 7:18, 19) Yaye waxelela abaseKorinte esithi: “Ukuba ndivakalisa iindaba ezilungileyo, andinasizathu sakuqhayisa, kuba oko kuyimfuneko. . . . Ukuba ndikwenza oku ngokuzithandela, ndinomvuzo; kodwa ukuba ndikwenza ngokunxamnye nokuthanda kwam, noko kunjalo ndiphathiswe ubugosa.”—1 Korinte 9:16, 17.
Njengoninzi lwethu, uPawulos wayenotyekelo lwesono olwalumthintela kumnqweno wakhe wokwenza okulungileyo. Sekunjalo, wakulwela nzima ukuluthintela olo tyekelo, yaye kwizihlandlo ezininzi, waphumelela. Kakade ke, uPawulos akazange akufeze oko ngamandla akhe. Wabhala esithi: “Ezintweni zonke ndinamandla ngenxa yalowo undomelezayo.” (Filipi 4:13) UYehova, owanika uPawulos amandla, nawe uya kukunika amandla ukuze wenze okulungileyo ukuba uyamcela ukuba akuncede. (Filipi 4:6, 7) Ngoko ke lulwele “nzima ukholo,” yaye uYehova uya kukusikelela.—Yude 3.
Akuyomfuneko ukuba uwulwe wedwa lo mlo. Emabandleni amaNgqina kaYehova, abadala abaqolileyo abangamaKristu, nabo bazingisayo ‘ekululweleni nzima ukholo,’ bayafuna ukukunceda. Ukuba uya kumdala ukuba akuncede, uya kuzabalazela ‘ukukuthuthuzela.’ (1 Tesalonika 5:14) Usukelo lwakhe luya kuba kukuba “njengendawo yokuzimela umoya nendawo yokuzifihla esiphangweni.”—Isaya 32:2.
“UThixo uluthando,” yaye ufuna ukuba abakhonzi bakhe bamkhonze kuba bemthanda. (1 Yohane 4:8) Ukuba uthando lwakho ngoThixo lufuna ukuvuselelwa, thabatha amanyathelo afanelekileyo ukuze wenjenjalo, njengoko kwandlalwe ngasentla. Uya kuvuya kuba ukwenzile oko.