Imibuzo Evela Kubafundi

Wayephi uDaniyeli xa amaHebhere amathathu ayevavanywa phambi komfanekiso omkhulu owawumiswe nguNebhukadenetsare kwithafa laseDura?

IBhayibhile ayisixeleli, ngoko akukho mntu namhlanje unokwazi ukuba uDaniyeli wayephi ngelo thuba lokuvavanywa.

Bambi bathe ngenxa yesikhundla sasemthethweni awayekuso uDaniyeli okanye ngenxa yokuba wayefumana amalungelo akhethekileyo kuNebhukadenetsare kusenokwenzeka ukuba wayekwisikhundla esiphezulu kwesikaShadraki, uMeshaki noAbhednego yaye ngaloo ndlela uDaniyeli wayenganyanzelekanga ukuba aye kwithafa laseDura. UDaniyeli 2:49 ubonisa ukuba kangangethuba elithile wayekwisikhundla esiphakamileyo kunamaqabane akhe amathathu. Kodwa asinabungqina bokuba oku kwakumkhulula ekuhlanganisaneni nabanye phambi komfanekiso.

Bezama ukucacisa ukungabikho kukaDaniyeli, bambi bathe kusenokwenzeka ukuba wayekuhambo lwaseburhulumenteni okanye wayegula waza akakwazi ukuya. Noko ke, iBhayibhile ayitsho. Nokuba kwakutheni, ikhondo likaDaniyeli kusenokwenzeka ukuba lalingathandabuzeki, kuba ukuba lalithandabuzeka, ngokuqinisekileyo amagosa aseburhulumenteni aseBhabhiloni anomona ayeza kulisebenzisa ukuze ambhaxeke izityholo. (Daniyeli 3:8) Ngaphambi nasemva kweso siganeko, uDaniyeli wazingqina engumgcini wengqibelelo, ethembekile kuThixo kulo naluphi na ucelomngeni awayejamelana nalo. (Daniyeli 1:8; 5:17; 6:4, 10, 11) Ngoko nangona iBhayibhile ingasixeli isizathu sokuba uDaniyeli angabikho kwithafa laseDura, sinokuqiniseka ukuba ngokungalalanisi wayethembekile kuYehova uThixo.—Hezekile 14:14; Hebhere 11:33.