Uyakhumbula Na?
Ngaba uye wakunandipha ukufunda iinkupho zakutshanje zeMboniselo? Ngoko, khangela enoba unokuyiphendula na le mibuzo ilandelayo:
• INkundla Yesizwe Yomgaqo-siseko yaseJamani yaba negalelo kuluphi uloyiso lwasemthethweni olubandakanya unqulo?
Le nkundla yasiguqula isigqibo esingesihle senye inkundla ngokuphathelele amaNgqina kaYehova nokwaziwa kwawo njengentlangano kawonke-wonke. Esi sigqibo soyisileyo sathi phantsi kwenkululeko yonqulo umntu ‘usenokuthobela iinkolelo zonqulo lwakhe’ kuneemfuno zikaRhulumente.—8/15, iphepha 8.
• Wabandezeleka ixesha elide kangakanani uYobhi?
Incwadi kaYobhi ayibonisi ukuba wabandezeleka iminyaka emininzi. Ukubandezeleka kukaYobhi nokuphela kwako kwathabatha iinyanga eziliqela, mhlawumbi ngaphantsi konyaka.—8/15, iphepha 31.
• Kutheni sinokuqiniseka ukuba uMtyholi ungaphezu kwento nje ekholelwayo?
UYesu Kristu wayesazi ukuba uMtyholi wayengumntu wokwenene. UYesu walingwa ngumntu wokwenene, kungekhona ububi obabukuye. (Mateyu 4:1-11; Yohane 8:44; 14:30)—9/1, iphepha 5-6.
• IMizekeliso 10:15 ithi: “Izinto ezixabisekileyo zesityebi ziyidolophu yaso enqabisekileyo. Ukonakala kwezisweli bubuhlwempu bazo.” Kuyinyaniso njani oku?
Ubutyebi bunokuba likhusi kwiingxaki ezithile zobomi, njengoko nedolophu enezinto inikela umlinganiselo othile wonqabiseko kwabo bahlala kuyo. Kwelinye icala, ubuhlwempu bunokuba yingozi xa kukho utshintsho olungalindelekanga kwiimeko zokuphila.—9/15, iphepha 24.
• Kwaqala ngayiphi ingqiqo ‘ukubiza egameni likaYehova’ ngemihla kaEnoshi? (Genesis 4:26)
Igama likaThixo lalisetyenziswa kwasekuqaleni kwembali yoluntu; ngoko, oko kwaqalwa ngexesha likaEnoshi yayingekokubiza egameni likaYehova ngokholo. Kusenokwenzeka ukuba abantu baqalisa ukusebenzisa igama likaThixo ngendlela enyelisayo kubo ziqu okanye kwabanye abantu abasondela ngabo ekunquleni uThixo.—9/15, iphepha 29.
• Ngokwendlela elisetyenziswe ngayo eBhayibhileni, lithetha ukuthini igama elithi “uqeqesho?”
Eli gama alibhekiseli kulo naluphi na uhlobo lokuxhaphaza okanye inkohlakalo. (IMizekeliso 4:13; 22:15) Igama lesiGrike elithi “uqeqesho” ngokuyintloko libhekisela ekuyaleleni, ekufundiseni okanye ekulungiseni yaye, maxa wambi kwisohlwayo esiqatha kodwa sothando. Indlela ebalulekileyo yokuba abazali baxelise uYehova kukuzabalazela ukuba kuhlale kukho unxibelelwano phakathi kwabo nabantwana babo. (Hebhere 12:7-10)—10/1, iphepha 8, 10.
• AmaKristu okwenyaniso namhlanje akubonisa njani ukuba axhasa ulawulo lukaThixo?
Xa ethethelela uBukumkani bukaThixo, amaNgqina kaYehova akabuphixanisi nezobupolitika okanye aphembelele imvukelo nxamnye noorhulumente babantu, nkqu nakuloo mazwe avalwe umlomo okanye atshutshiswayo kuwo amaNgqina. (Tito 3:1) Azama ukuba negalelo ngendlela eluncedo ngendlela uYesu nabafundi bakhe benkulungwane yokuqala abenza ngayo yaye azabalazela ukunceda abantu basebenzise imilinganiselo yeBhayibhile eyakhayo, njengokunyaniseka, ukuziphatha kakuhle nokusebenzisa imigaqo elungileyo ezintsatsheni.—10/15, iphepha 6.
• Amanzi anika ubomi aqukuqela njani eAndes?
AmaNgqina kaYehova enza umgudu wokusa iinyaniso zeBhayibhile ebantwini, nangeelwimi ezimbini zasekuhlaleni, isiQuechua nesiAymara. AmaNgqina atyelela abantu abahlala kwiziqithi zeLake Titicaca, kuquka namaqonga “adadayo” akwesi siqithi enziwe ngeengcongolo ezikhula kwiindawo eziphezulu zeli chibi.—10/15, iphepha 8-10.
• UThixo uye wanikela ntoni ukuze isikhokele, nto leyo esenokufaniswa nenkqubo yekhompyutha yokukhokela kwiinqwelo-moya ezikhwela abantu zezi mini?
UThixo uye wanika abantu amandla okubakhokela ngokuziphatha, amandla angaphakathi okuziphatha. Esi sisazela esidalwe naso. (Roma 2:14, 15)—11/1, iphepha 3-4.
• Kutheni ukufa kukaYesu kunexabiso elikhulu?
Xa indoda efezekileyo uAdam yonayo, yena nenzala yakhe baphulukana nobomi. (Roma 5:12) Njengomntu ofezekileyo, uYesu wanikela ngobomi bakhe, ngaloo ndlela esenza ukuba abantu abathembekileyo bafumane ubomi obungunaphakade.—11/15, iphepha 5-6.
• Yayingoobani amaSkitiya akhankanywe kwabaseKolose 3:11?
AmaSkitiya yayiluhlanga loonothwal’ impahlana kumathafa aseYurophu naseAsiya, olwalulawula ukususela ngowama-700 ukusa kowama-300 B.C.E. Yayingabakhweli bamahashe nabaphumi-mkhosi aboyikekayo. Kusenokwenzeka ukuba eyabaseKolose 3:11 yayibhekisela, kungekhona kuhlanga oluthile, kodwa kwabona bantu benza izinto eziphum’ emgceni.—11/15, iphepha 24-5.
• Kutheni sinokuthi uMthetho Omkhulu yimfundiso efuna ingqalelo yethu ethe rhoqo?
Lo mgaqo ubalulekileyo wobuntu ucaciswa kubuYuda, kubuBhuda, kwingcamango yamaGrike nobuConfucius. Noko ke, oko kwathethwa nguYesu kwiNtshumayelo yakhe yaseNtabeni kufuna izenzo, yaye kuchaphazela ubomi babantu kuyo yonke indawo, abadala nabancinane. (Mateyu 7:12)—12/1, iphepha 3.