Uyakhumbula Na?
Ngaba uye wakunandipha ukufunda iinkupho zakutshanje zeMboniselo? Ukuba kunjalo, khawubone ukuba unokuyiphendula kusini na le mibuzo ilandelayo:
• Yiyiphi inkqubo ebandakanya iNtshumayelo yaseNtabeni onokuyisebenzisa ukunciphisa uxinezeleko?
Mini nganye, unokufunda enye yeemfundiso zikaYesu ezisisiseko ezikule ntshumayelo okanye kwenye indawo kwiincwadi zeVangeli. Ngokucamngca ngaloo mfundiso uze uzame ukuyisebenzisa, unokufumana ulonwabo olongezelelekileyo uze unciphise uxinezeleko.—12/15, iphepha 12-14.
• Ziziphi izizathu ezithathu ezifanelekileyo zokuba abadala bebandla baqeqeshe izicaka zolungiselelo ukuba zisingathe iimbopheleleko ezongezelelekileyo?
Ngenxa yolwando kwinani lamaNgqina kaYehova, kufuneka amadoda amaninzi anokuthenjwa ukuze ancede abo basandul’ ukubhaptizwa ukuba benze inkqubela. Ukukhula neengxaki zempilo zenza abanye abadala abangamagqala bangakwazi ukwenza okungakumbi. Yaye abanye abadala abanamava baneembopheleleko ezingapheleli nje kwibandla lasekuhlaleni, ngoko basenokungakwazi ukwenza okungakumbi emabandleni abo njengangaphambili.—1/1, iphepha 29.
• Abantu bathembela njani koothixo abangengabo abokwenene?
Abaninzi banqula oothixo beenkonzo zabo, kodwa aba basenokuba ngoothixo abangaphiliyo abangenalusindiso njengoBhahali womhla kaEliya. (1 Kumkani 18:26, 29; INdumiso 135:15-17) Abanye banqula abantu abadumileyo kwezolonwabo okanye abezemidlalo, abangenakunikela themba lokwenene ngekamva. Ngokwahlukileyo, uYehova ukho ngokwenene yaye uyazizalisekisa iinjongo zakhe.—1/15, iphepha 3-5.
• Sinokufunda ntoni kwindlela uKayin awasabela ngayo kwisilumkiso sikaThixo?
UThixo usinike inkululeko yokuzikhethela, yaye sinokukhetha ukwenza oko kufanelekileyo kunokwenza okubi, ndlela leyo uKayin awenza ngayo. Kwakhona iBhayibhile ibonisa ukuba uYehova uyabagweba abangaguqukiyo.—1/15, iphepha 22-3.
• Kutheni ukucoceka kubaluleke gqitha ngoku?
Njengoko kutshintsha izinto ekuhlaleni, abaninzi abachithi xesha lingako becoca amakhaya abo njengoko kwakuqhelekile. Ukutyeshela ukucoceka kokutya namanzi kunokubangela iingozi zempilo. Ukongezelela kucoceko lomzimba, iBhayibhile ibalaselisa ukunikela ingqalelo kucoceko lokomoya, lokuziphatha nolwengqondo.—2/1, iphepha 3-6.
• Ngokuphathelele amangqina awayephila ngaphambi kwexesha lobuKristu, uPawulos wathi ‘ayengenakwenziwa agqibelele ngaphandle kwethu.’ Ngoba? (Hebhere 11:40)
Ebudeni beWaka Leminyaka elizayo, uKristu nabazalwana bakhe abathanjisiweyo ezulwini, abakhonza njengookumkani nababingeleli, baya kusebenzisa iingenelo zentlawulelo kwabo bavusiweyo. Abo bathembekileyo njengabo kubhekiselwa kubo kumaHebhere isahluko 11 ‘baya kwenziwa bagqibelele.’—2/1, iphepha 23.
• Wayezama ukuthini uPawulos xa wawaxelela oku amaHebhere: “Anikade nixhathise kude kuphalale igazi”? (Hebhere 12:4)
Wayethetha ukuxhathisa de kufikelele kwinqanaba lokufa. Kukho imizekelo engokwembali yabo bathembeka de bafa. Nangona amaHebhere awayebhalelwa nguPawulos ayengazange avavanywe de afika kwelo nqanaba, kwakufuneka aqhubele kwelokukhula, akhe ukholo lwawo ukuze anyamezele nantoni na enokuwehlela.—2/15, iphepha 29.
• Kutheni kubhetele ukukuphepha ukuthi uYehova uthibaza okusesikweni kwakhe ngenceba?
Kwezinye iilwimi, “ukuthibaza” kunokuthetha ukuyalaza okanye ukungayenzi into ethile. UYehova nguThixo wokusesikweni nenceba yaye xa ezibonakalisa ezo mpawu, zombini ziyavisisana. (Eksodus 34:6, 7; Duteronomi 32:4; INdumiso 116:5; 145:9) Okusesikweni kukaYehova akuyomfuneko ukuba kuthanjiswe okanye kuthityazwe ngenceba.—3/1, iphepha 30.
• Ngaba kufanelekile ngomKristu ukuba aqhole umzimba womntu ofileyo amthandayo?
Ukuqhola yindlela yokulondoloza isidumbu. Abanye abantu bamandulo babekwenza oko ngenxa yonqulo. Kwakungenjalo ngabanquli bokwenyaniso. (INtshumayeli 9:5; IZenzo 24:15) Ukuqhola ibiya kuba kukulibazisa into engenakuphepheka, ukubuyela komzimba eluthulini. (Genesis 3:19) Kodwa bekungayi kubakho mfuneko yakuxhalaba ukuba umthetho ubufuna ukuba kuqholwe umzimba, amanye amalungu entsapho ebethanda ngolo hlobo, okanye oko bekufuneka ngenxa yokuba abanye beza kuhamba umgama omde besiya emngcwabeni.—3/15, iphepha 29-31.
• Yiyiphi imizekelo yeBhayibhile esifundisa ukuba uThixo wamkela abantu bazo zonke iintlanga?
UYehova wathumela umprofeti uYona ukuba alumkise abantu baseNineve yaye uThixo waxelela uYona ukuba akwamkele ukuguquka kwabo. Ngelizwi nangomzekelo, uYesu wakhuthaza ukuba kuboniswe uthando kumaSamariya. Umpostile uPetros noPawulos baba nendima ekuziseni iindaba ezilungileyo kwabangengomaYuda. Ngokusuka kuloo mizekelo sinokuyibona imfuneko yokuzama ukunceda abantu abasuka kuzo zonke iimvelaphi.—4/1, iphepha 21-4.