Ukuhlanjululwa Ukuze Senze Imisebenzi Emihle
“Masizihlambulule kuko konke ukudyobheka kwenyama nokomoya, sigqibelelisa ubungcwele sisoyika uThixo.”—2 KORINTE 7:1.
1. UYehova ufuna babe njani abo bamnqulayo?
“NGUBANI na onokunyuka aye entabeni kaYehova, yaye ngubani na onokunyuka endaweni yakhe engcwele?” UKumkani uDavide wakwaSirayeli wamandulo wabuza loo mbuzo obangel’ umdla ngokuphathelele unqulo olwamkelekileyo kuYehova. Wandula ke waphendula esithi: “Nguye nabani na omsulwa ezandleni zakhe nohlambulukileyo entliziyweni, ongawuphathanga njengongento umphefumlo Wam, nongenzanga sifungo ngenkohliso.” (INdumiso 24:3, 4) Ukuze amkeleke kuYehova, ongcwele, ubani umele ahlambuluke aze abe ngcwele. Ngaphambilana, uYehova wayekhumbuze ibandla lamaSirayeli esithi: “Nimele nizingcwalise nibe ngcwele, kuba ndingcwele mna.”—Levitikus 11:44, 45; 19:2.
2. UPawulos noYakobi bakugxininisa njani ukubaluleka kokuhlambuluka kunqulo lokwenyaniso?
2 Kwiinkulungwane kamva, umpostile uPawulos wabhalela amanye amaKristu kwisixeko esasonakele ngokuziphatha saseKorinte esithi: “Ekubeni sinazo ezi zithembiso, zintanda, masizihlambulule kuko konke ukudyobheka kwenyama nokomoya, sigqibelelisa ubungcwele sisoyika uThixo.” (2 Korinte 7:1) Kwakhona oku kugxininisa ingongoma yokuba ukuze abe nolwalamano noThixo aze afumane iintsikelelo azithembisileyo, ubani umele ahlambuluke aze ahlale ecocekile ngokwasemzimbeni nangokomoya. Ngokufanayo, xa wayebhala ngonqulo olwamkelekileyo kuThixo, umfundi uYakobi wathi: “Unqulo oluhlambulukileyo nolungadyobhekanga ngokwembono kaThixo noBawo wethu lulo olu: ukuvelela iinkedama nabahlolokazi embandezelweni yabo, nokuzigcina ungenabala kulo ihlabathi.”—Yakobi 1:27.
3. Ukuze unqulo lwethu lwamkeleke kuThixo, simele sizabalazele ntoni?
3 Ekubeni ukuhlambuluka, ukuba ngcwele, nokungadyobheki kubalulekile kunqulo lokwenyaniso, nabani na ofuna ukukholisa uThixo ufanele akuzabalazele ukuyifikelela le milinganiselo. Kuba abantu namhlanje benemilinganiselo neengcamango ezahlukileyo ngokuphathelele ukuhlambuluka, noko ke, simele sikwazi size senze oko uYehova akugqala kuhlambulukile yaye kwamkelekile. Simele sazi oko uThixo akufunayo kubanquli bakhe kule nkalo noko aye wakwenza ukubanceda ukuze bahlale behlambulukile baze bamkeleke kuye.—INdumiso 119:9; Daniyeli 12:10.
Ukuhlanjululwa Ukwenzela Unqulo Lokwenyaniso
4. Chaza oko iBhayibhile ikuthethayo ngokuhlambuluka.
4 Kwinkoliso yabantu, ukuhlambuluka kuthetha nje ukungangcoli. Noko ke, eBhayibhileni, ukuhlambuluka kuchazwa ngamagama aliqela esiHebhere nesiGrike achaza ukuhlambuluka kungekhona nje ngokwasemzimbeni kodwa ngokufuthi ngokuziphatha nangokomoya. Ngaloo ndlela, enye intyilalwazi yeBhayibhile ithi: “‘Ukuhlambuluka’ ‘nokungahlambuluki’ ngamabinzana angafane abhekisele kucoceko lwasemzimbeni, kodwa abhekisela kunqulo. Enyanisweni umgaqo ‘wokuhlambuluka’ phantse uchaphazela zonke iinkalo zobomi.”
5. UMthetho kaMoses wawuneenkcukacha ukusa kuwuphi umkhamo ngokuhlambuluka kobomi bamaSirayeli?
5 Eneneni, uMthetho kaMoses wawuquka imithetho nemimiselo kuzo zonke iinkalo zobomi bamaSirayeli, wawuchaza ngokucacileyo oko kuhlambulukileyo nokwamkelekileyo noko kungenjalo. Ngokomzekelo, kwiLevitikus isahluko 11 ukusa kwese-15, sifumana imiyalelo eneenkcukacha ngokuphathelele ukuhlambuluka nokungahlambuluki. Izilwanyana ezithile zazingahlambulukanga, yaye amaSirayeli ayengamele azitye. Ukuzala kwakuya kumenza umfazi angahlambuluki kangangexesha elithile. Izifo ezithile zolusu, ingakumbi iqhenqa, nokubhobhoza kwamalungu esini endoda nomfazi ngokufanayo zazimenza umntu angahlambuluki. Kwakhona uMthetho wawuchaza ngokucacileyo ngoko kumele kwenziwe kwiimeko ezaziquka ukungahlambuluki. Ngokomzekelo, kwiNumeri 5:2, siyafunda: “Bayalele oonyana bakaSirayeli ukuba bakhuphe enkampini wonke umntu oneqhenqa naye wonk’ ubani obhobhozayo naye wonk’ ubani ongahlambulukanga ngenxa yomphefumlo oswelekileyo.”
6. Imithetho yokuhlambuluka yamiselwa ngayiphi injongo?
6 Ngokungathandabuzekiyo, le mithetho neminye kaYehova yayiquka iinkalo zempilo nezinto eziphathelele ukusebenza kwamalungu omzimba ngaphambi kokuba oku kwaziwe kwezonyango, yaye abantu babezuza ngokuyilandela. Sekunjalo, le mithetho yayingamiselwanga nje ngenxa yempilo okanye ukuwakhokela kwezonyango. Yayiyinxalenye yonqulo lokwenyaniso. Isibakala sokuba yayichaphazela ubomi babantu bemihla ngemihla—ukutya, ukuzala, umtshato, nezinye izinto—sigxininisa ukuba njengoThixo wabo, uYehova wayenelungelo lokugqiba ngoko kufanelekileyo noko kwakungafanelekanga kuzo zonke iinkalo zobomi bawo, bantu abo ababezahlulele kuYehova.—Duteronomi 7:6; INdumiso 135:4.
7. Ngokugcina uMthetho, uhlanga lwakwaSirayeli lwaluza kufumana ziphi iintsikelelo?
7 Kwakhona umnqophiso woMthetho wawuwakhusela amaSirayeli kwimikhwa engcolisayo yeentlanga ezaziwangqongile. Ukuwugcina ngokuthembeka uMthetho, kuquka oko kwakufuneka ukuze ahlale ehlambulukile kuYehova, amaSirayeli ayeya kukufanelekela ukukhonza uThixo aze azuze iintsikelelo zakhe. Ngokuphathelele oku, uYehova waluxelela olu hlanga: “Ukuba nithe nalithobela okunene ilizwi lam, nawugcina ngenene umnqophiso wam, ngokuqinisekileyo noba yinqobo kum kwizizwana zonke, kuba umhlaba uphela ngowam. Yaye niya kuba bubukumkani kum nababingeleli nohlanga olungcwele.”—Eksodus 19:5, 6; Duteronomi 26:19.
8. Kutheni amaKristu namhlanje efanele anikele ingqalelo koko kuthethwa nguMthetho ngokuhlambuluka?
8 Ekubeni uYehova wayenikele iinkcukacha ezinjalo ngoMthetho ukuze ayalele amaSirayeli indlela awayefanele ahlambuluke ngayo, abe ngcwele aze amkeleke kuye, ngaba oku akuwaniki amaKristu isizathu esingakumbi sokuyilandela le miyalelo? Nangona amaKristu engekho phantsi koMthetho, afanele akhumbule ukuba, njengoko uPawulos wachaza, zonke izinto ezabhalwa ngaphambili eMthethweni “zisisithunzi sezinto ezizayo, inkqu yazo ke nguKristu.” (Kolose 2:17; Hebhere 10:1) Ukuba uYehova uThixo, othi “anditshintshanga,” wayekugqala ukuhlambuluka nokungadyobheki njengento ebalulekileyo kunqulo lokwenyaniso ngelo xesha, nathi namhlanje sifanele siwuxhalabele ngokunzulu umbandela wokucoceka emzimbeni, ngokuziphatha, nangokomoya ukuba sifuna ukwamkeleka nokusikelelwa nguye.—Malaki 3:6; Roma 15:4; 1 Korinte 10:11, 31.
Ukucoceka Kusenza Sinconywe
9, 10. (a) Kutheni ukucoceka kubalulekile kumKristu? (b) Kudla ngokuthiwani ngeendibano zamaNgqina kaYehova?
9 Ngaba ukucoceka kuseyinkalo ebalulekileyo kunqulo lokwenyaniso? Nangona ukucoceka emzimbeni nje kukodwa kungamenzi ubani abe ngumnquli wokwenyaniso kaThixo, ngokuqinisekileyo kufanelekile ukuba umnquli wokwenyaniso acoceke emzimbeni kangangoko iimeko zakhe zimvumela. Abo bacocekileyo, ngokufuthi bayaphawulwa ngabantu ababangqongileyo, ingakumbi namhlanje, xa inkoliso yabantu inganikeli ngqalelo ingako ekugcineni imizimba, impahla, okanye nendawo ehlala kuyo icocekile. Oku kusenokuba nemiphumo emihle, njengokuba uPawulos waxelela amaKristu aseKorinte: “Siyakuphepha ukuba sisikhubekiso nangayiphi na indlela, ukuze kungafunyanwa siphoso kubulungiseleli bethu; kodwa ngandlela zonke siyazincomela njengabalungiseleli bakaThixo.”—2 Korinte 6:3, 4.
10 Ngokufuthi, amaNgqina kaYehova aye anconywa ngabasemagunyeni ngenxa yokucoceka kwawo, ukuba nocwangco, nehambo nemikhwa yawo ebekekileyo, ebonakala ingakumbi kwiindibano zawo ezinkulu. Ngokomzekelo, iphephandaba iLa Stampa lithetha ngendibano eyayikwiphondo laseSavona, eItali, lathi: “Eyona nto iphawulekayo xa ubani engena kule ndawo kukucoceka nocwangco lwaba bantu bayisebenzisayo.” Emva kwendibano yamaNgqina eyayikwibala lemidlalo laseSão Paulo, eBrazil, elinye igosa lalapho laxelela lowo wayengumalathisi kwisebe lokucoca esithi: “Ukususela ngoku sifuna ukuba eli bala lemidlalo licoceke ngendlela amaNgqina kaYehova alicoce ngayo.” Elinye igosa lalapho lathi: “Xa amaNgqina kaYehova efuna ukuqesha eli bala, eyona nto isikhathazayo ziintsuku alifuna ngazo. Ngaphandle koko, ayikho enye into.”
11, 12. (a) Nguwuphi umgaqo weBhayibhile esifanele siwukhumbule xa sicinga ngokucoceka? (b) Yiyiphi imibuzo esinokuzibuza yona ngokuphathelele imikhwa yethu nendlela esiphila ngayo?
11 Ukuba ucoceko nocwangco kwindawo yethu yonqulo inokuzisa uzuko kuThixo esimnqulayo, ngokuqinisekileyo ukubonakalisa ezi mpawu kubomi bethu nako kubalulekile. Noko ke, kumakhaya ethu xa sisodwa, sisenokuvakalelwa kukuba sinelungelo lokwenza nantoni na. Yaye xa kufikelelwa kumbandela wokunxiba nokuzilungisa, ngokuqinisekileyo sinenkululeko yokukhetha oko sivakalelwa kukuba siyakuthanda yaye kuhle! Kanti nakulo mbandela, asinakwenza nje unothanda. Khumbula ukuba xa uPawulos wayethetha ngokukhetha kukabani ukutya okuthile, walumkisa amanye amaKristu esithi: “Hlalani niphaphile ukuze eli gunya lenu lingathi ngandlel’ ithile libe sisikhubekiso kwabo babuthathaka.” Wandula ke wachaza lo mgaqo ubalulekileyo: “Zonke izinto zisemthethweni; kodwa asizizo zonke izinto eziyingenelo. Zonke izinto zisemthethweni; kodwa asizizo zonke izinto ezakhayo.” (1 Korinte 8:9; 10:23) Isiluleko sikaPawulos sisebenza njani kuthi kumbandela wokucoceka?
12 Kusengqiqweni ukuba abantu balindele ukuba umkhonzi kaThixo acoceke yaye abe nocwangco. Ngoko ke, sifanele siqiniseke ukuba inkangeleko yamakhaya neeyadi zethu ayiphikisani nendlela esizibiza ngayo, yokuba singabashumayeli beLizwi likaThixo. Ikhaya lethu linikela buphi ubungqina ngathi nangeenkolelo zethu? Ngaba abonisa ukuba sikulangazelela ngokusuk’ entliziyweni ukuphila kwihlabathi elitsha lobulungisa elicocekileyo nelinocwangco, esishumayela ngalo ngokuqiniseka kwabanye? (2 Petros 3:13) Ngokufanayo, indlela esikhangeleka ngayo—enoba kungexesha lethu lokuphumla okanye entsimini—isenokwenza abantu babe nomdla ongakumbi kwisigidimi esisishumayelayo okanye bangabi nawo. Ngokomzekelo, khawuphulaphule la mazwi athethwa yintatheli yephephandaba eMexico: “Enyanisweni, abantu abaselula ngabona baninzi kumaNgqina kaYehova, yaye babonakala ngendlela abazilungisa ngayo iinwele zabo, indlela abacoceke ngayo nabanxiba kakuhle ngayo.” Hayi indlela ekuluvuyo ngayo ukuba nalo mlisela nomthinjana phakathi kwethu!
13. Yintoni esinokuyenza ukuze siqiniseke ukuba kuzo zonke iinkalo zobomi bethu sicocekile yaye sinocwangco?
13 Kakade ke, akuyondlwan’ iyanetha ukuqinisekisa ukuba thina, izinto zethu namakhaya ethu ahlala ecocekile kwaye kukho ucwangco. Phofu ke, oku akufuni zixhobo zobugocigoci nezibiza imali eninzi, kodwa kufuneka ukuceba kakuhle nokuhlala sisenza umgudu. Sifanele siziphe ixesha lokuhlamba umzimba, iimpahla, inqwelo-mafutha, nokucoca amakhaya ethu nezinye izinto. Ukuxakeka entsimi, ukuya kwiintlanganiso nokufundisisa—ndawonye nokunyamekela ezinye izinto zokuphila kwemihla ngemihla—akusikhululi kwimfuneko yokuhlala sicocekile yaye samkelekile kuThixo nakubantu. Umgaqo oqhelekileyo wokuba “yonke into inexesha layo elimisiweyo” usebenza ngokufanayo kule nkalo yobomi bethu.—INtshumayeli 3:1.
Intliziyo Engadyobhekanga
14. Kutheni kunokuthiwa ukucoceka ngokuziphatha nangokomoya kubaluleke nangakumbi kunokucoceka emzimbeni?
14 Njengokuba kubalulekile ukuqiniseka ukuba sicocekile emzimbeni, kubaluleke nangakumbi ukuqiniseka ukuba sicocekile ngokuziphatha nangokomoya. Okusenza sifikelele kwesi sigqibo kukukhumbula ukuba uhlanga lwakwaSirayeli lwalahlwa nguYehova, kungekhona ngenxa yokungacoceki emzimbeni, kodwa ngenxa yokuba lwalonakele ngokuziphatha nangokomoya. Esebenzisa umprofeti uIsaya, uYehova wabaxelela ukuba ngenxa yokuba ‘babeluhlanga olunesono, abantu abasindwa ziziphoso,’ iminikelo yabo, nokugcina kwabo ukuthwasa kwenyanga nesabatha, ewe, nemithandazo yabo yayiluxanduva kuye. Kwakufuneka benze ntoni ukuze bakholise uThixo? UYehova wathi: “Zihlambeni; zihlambululeni; shenxisani ububi benu phambi kwamehlo am; yekani ukwenza okubi.”—Isaya 1:4, 11-16.
15, 16. UYesu wathi yintoni eyenza umntu adyobheke, yaye sinokuzuza njani kumazwi akhe?
15 Ukuze siqonde ngokubhekele phaya ukubaluleka kokucoceka ngokuziphatha nangokomoya, masiphawule oko uYesu wakuthethayo xa abaFarisi nababhali bathi abafundi bakhe babengacocekanga kuba bengazange bazihlambe izandla ngaphambi kokuba batye. UYesu wabalungisa ngokuthi: “Asikokungena emlonyeni wakhe okumenza inqambi umntu; kodwa okuphuma emlonyeni wakhe kuko okumenza inqambi umntu.” Wandula ke uYesu wacacisa: “Izinto eziphuma emlonyeni ziphuma entliziyweni, kwaye ezo zinto zimenza inqambi umntu. Ngokomzekelo, entliziyweni kuphuma iingcinga ezingendawo, ukubulala, ukukrexeza, uhenyuzo, ubusela, ubungqina bobuxoki, izinyeliso. Zizo ezo izinto ezimenza inqambi umntu; kodwa ukutya ngezandla ezingahlanjwanga akumenzi nqambi umntu.”—Mateyu 15:11, 18-20.
16 Sinokufunda ntoni kumazwi kaYesu? UYesu wayebonisa ukuba ubungendawo, ukuziphatha okubi, nezenzo ezingcolileyo zivela kwintliziyo engendawo nengcolileyo. Njengoko umfundi uYakobi esitsho, “ngamnye ulingwa ngokutsalwa nokuwexulwa ngumnqweno wakhe.” (Yakobi 1:14, 15) Ngaloo ndlela, ukuba asifuni ukwenza izono ezinzulu uYesu awazichazayo, akufanele sivumele izinto ezinjalo zingene ezintliziyweni zethu. Oko kuthetha ukuba simele sikulumkele oko sikufundayo, sikubukelayo noko sikuphulaphulayo. Namhlanje, ngenxa yokuba elowo kusithiwa unenkululeko yokuthetha nelungelo lokwenza nantoni na, amashishini okuzonwabisa nawezibhengezo aye aqamba umculo enza nemifanekiso eyanelisa iminqweno yenyama enesono. Sifanele sizimisele ukuba singavumeli iingcamango ezinjalo zithi qatha ezintliziyweni zethu. Eyona nto ibalulekileyo kukuba ukuze simkholise size samkeleke kuThixo, simele sihlale siphaphile ukuze sihlale sinentliziyo ecocekileyo nengadyobhekanga.—IMizekeliso 4:23.
Ukuhlanjululwa Ukuze Senze Imisebenzi Emihle
17. Yintoni ebangele ukuba uYehova acoce abantu bakhe?
17 Ngokuqinisekileyo kuyintsikelelo yaye kuyinkuselo ukuba, ngoncedo lukaYehova, sinokuba ngabacocekileyo kuye. (2 Korinte 6:14-18) Sekunjalo, siyaqonda ukuba uYehova uye wabacoca abantu bakhe ngenxa yenjongo ethile. UPawulos waxelela uTito ukuba uKristu uYesu “wazinikela ngenxa yethu ukuze asihlangule kulo lonke uhlobo lokuchasa umthetho aze azihlambululele isizwana esisesakhe ngokukhethekileyo, esizondelela imisebenzi emihle.” (Tito 2:14) Njengabantu abacociweyo, sifanele sibe nenzondelelo kwiyiphi imisebenzi?
18. Sinokubonakalisa njani ukuba sinenzondelelo kwimisebenzi emihle?
18 Okokuqala, sifanele sizibhokoxe ekuvakaliseni iindaba ezilungileyo zoBukumkani bukaThixo. (Mateyu 24:14) Ngokwenjenjalo, sidlulisela kubantu kuyo yonke indawo ithemba lokuphila ngonaphakade kumhlaba ococeke ngeendlela zonke. (2 Petros 3:13) Kwakhona imisebenzi yethu emihle iquka ukubonakalisa isiqhamo somoya kaThixo kubomi bethu bemihla ngemihla, ngaloo ndlela sizukisa uBawo wethu wasemazulwini. (Galati 5:22, 23; 1 Petros 2:12) Kwaye asibalibali abo bangekho nyanisweni abasenokwehlelwa ziintlekele zokwemvelo okanye iinkxwaleko. Sicinga ngesiluleko sikaPawulos: “Ngoko ke, lo gama ixesha lisasivumela, masenze okulungileyo kubo bonke, ngokukodwa kwabo bahlobene nathi elukholweni.” (Galati 6:10) Yonke imisebenzi enjalo, ephuma kwintliziyo ehlambulukileyo yaye sineentshukumisa ezintle, iyamkholisa uThixo.—1 Timoti 1:5.
19. Ziziphi iintsikelelo esiya kuzifumana ukuba siqhubeka sigcine umlinganiselo ophakamileyo wokucoceka—ngokwasemzimbeni, ngokuziphatha nangokomoya?
19 Njengabakhonzi bOyena Uphakamileyo, simele sithobele amazwi kaPawulos athi: “Ndiyanibongoza ngeemfesane zikaThixo, bazalwana, ukuba niyinikele imizimba yenu ibe yimibingelelo ephilayo, engcwele, eyamkelekileyo kuThixo, inkonzo ke leyo engcwele ngokwamandla enu engqiqo.” (Roma 12:1) Ngamana singaqhubeka silixabisa ilungelo lokuhlanjululwa nguYehova size senze konke okusemandleni ukugcina umlinganiselo ophakamileyo wokucoceka ngokwasemzimbeni, ngokuziphatha nangokomoya. Ukwenjenjalo akusayi kusenza sizihlonele size saneliseke nje kuphela ngoku, kodwa kwakhona sinethemba lokubona “izinto zangaphambili”—inkqubo ekhoyo engendawo nedyobhekileyo—zidlula xa uThixo ‘esenza zonke izinto zibe ntsha.’—ISityhilelo 21:4, 5.
Ngaba Usakhumbula?
• Kwakutheni ukuze amaSirayeli anikwe imithetho emininzi ephathelele ukuhlambuluka?
• Ukucoceka kunokubenza njani abantu babe nomdla ongakumbi kwisigidimi esisishumayelayo?
• Kutheni ukucoceka ngokuziphatha nangokomoya kubaluleke nangakumbi kunokucoceka emzimbeni?
• Sinokubonakalisa njani ukuba singabantu ‘abazondelela imisebenzi emihle’?
[Imifanekiso ekwiphepha 21]
Ukucoceka kwenza abantu babe nomdla ongakumbi kwisigidimi esisishumayelayo
[Umfanekiso okwiphepha 22]
UYesu walumkisa ukuba iingcinga ezingendawo zikhokelela kwizenzo ezingendawo
[Imifanekiso ekwiphepha 23]
Njengabantu abacociweyo, amaNgqina kaYehova azondelela imisebenzi emihle