Iingxaki Zabantu—Ngaba Ziya Kuze Ziphele?
“UMNTU omnye kwabane emhlabeni ulihlwempu, abantu abaliwaka lesigidi esisi-1,3 baphila ngemali engaphantsi kwedola enye ngosuku, abaliwaka lesigidi abakwazi ukufunda nokubhala, abaliwaka lesigidi esisi-1,3 abanawo amanzi acocekileyo okusela yaye abaliwaka lesigidi balala ngendlala.” Itsho njalo ingxelo yaseIreland ngokuphathelele imeko yehlabathi.
Hayi indlela ekubuhlungu ngayo ukuba abantu bengakwazi ukufumana izicombululo ezihlala zihleli kwiingxaki zehlabathi! Ezi ngxaki zibonakala zibuhlungu nangakumbi xa ufumanisa ukuba uninzi lwabantu oluchazwe kule ngxelo ngamabhinqa nabantwana abangenakuzinceda. Akusothusi na ukuba nangoku, kule nkulungwane yama-21, “amalungelo abantu abaninzi engahlonelwa”?—The State of the World’s Children 2000.
“Ihlabathi Elitsha Kwakwesi Sizukulwana Sinye”
IUnited Nations Children’s Fund iye yathi “le meko yokudandatheka abakuyo aba bantu inokupheliswa ehlabathini lonke.” Lo mbutho uthi iimeko ezilusizi la mawaka ezigidi ekufuneka azinyamezele okwangoku “azinakuphepheka okanye azinakuguqulwa.” Eneneni, uye wakhuthaza ukuba “bonke abantu bayile ihlabathi elitsha kwakwesi sizukulwana sinye.” Unethemba lokuba, kweli hlabathi wonke umntu “akasayi kuba lihlwempu yaye ucalucalulo, ugonyamelo nezifo azisayi kubakho.”
Abo banoluvo olunjalo bakhuthazwa kukuba kwanangoku abantu abanenyameko benza umsebenzi omkhulu ekunciphiseni imiphumo ebuhlungu “ebangelwa luthotho lweemfazwe neentlekele ezibonakala zingapheli.” Ngokomzekelo, ngaphezu kweminyaka eli-15 edluleyo, iChernobyl Children’s Project “iye yanceda ekuthomalaliseni ukubandezeleka kwabantwana abaninzi abaye banomhlaza ngenxa yokuqhushumba kwenyukliya.” (The Irish Examiner, April 4, 2000) Ngokuqinisekileyo le mibutho mikhulu nemincinane incede abantu abaninzi abangamaxhoba emfazwe neentlekele.
Sekunjalo, abo banikela olu ncedo bazibona izinto njengokuba zinjalo. Bayazi ukuba iingxaki ezikhoyo “zande yaye zendele kakhulu kunokuba kwakunjalo kwiminyaka elishumi edluleyo.” UDavid Begg, umphathi oyintloko wombutho wokunceda abantu waseIreland, iConcern, uthi “abasebenzi, abaxhasi nabanikelayo benza lukhulu” xa iMozambique yahlaselwa zizantyalantyala zezikhukula. Wongezelela ngelithi: “Kodwa, uncedo lwethu sisodwa alwanele kwiintlekele ezininzi kangaka.” Ngokuphathelele amalinge okunceda eAfrika, uvuma ngokuphandle esithi: “Akukho themba lingako.” Abaninzi basenokuvakalelwa kukuba amazwi akhe ayinyaniso nakwimeko yehlabathi liphela.
Ngaba ngokwenene sinokulindela ukubona “ihlabathi elitsha kwakwesi sizukulwana sinye”? Ngoxa imizamo eyenziwayo ngoku yokunikela uncedo incomeka, ngokuqinisekileyo kusengqiqweni ukucinga ngelinye ihlabathi elitsha elinobulungisa nelinoxolo. IBhayibhile yalatha kwelo themba, njengoko inqaku elilandelayo liza kubonisa.
[Inkcazelo Ngomfanekiso okwiphepha 2]
Iphepha 3, abantwana: UN/DPI Photo by James Bu