Ihlabathi Elinembono Egqwethekileyo Ngokunyaniseka
NGOKUHLWA ngomnye uLwesihlanu ofudumeleyo eTel Aviv, kwaSirayeli, umfana oselula waya kwelinye iqela lolutsha elalihleli ngaphandle kwinightclub. Kungekudala kwaqhushumba ibhombu eyalibetha lathi saa elo qela.
Omnye wazibulala ngesiqhushumbisi yaye wabulala nabanye abantu abaselula abali-19. Kamva igosa loncedo lokuqala lathi kwiintatheli: “Kwakuthe saa amalungu omzimba abantu abaselula kuyo yonke loo ndawo, amalungu abantwana abancinane gqitha—andizange ndiyibone into emanyumnyezi ngolo hlobo.”
UThurstan Brewin wabhala kwiThe Lancet esithi: “Ziimpawu ezithandwa ngumntu wonke, njengokunyaniseka . . . , ezinokubangela iimfazwe okanye zizenze zingapheli lula.” Ewe, ukususela kwiiMfazwe Zomnqamlezo zeNgqobhoko ukusa ekubulaweni kwezihlwele ngamaNazi eJamani, imbali yabantu izaliswe zizantyalantyala zegazi eziphalazwe ngenxa yokunyaniseka.
Ayanda Amaxhoba Ngenxa Yokunganyaniseki
Alithandabuzeki elokuba, ukunyaniseka kwempambano kusenokuba yingozi, kodwa ukunganyaniseki nako kusenokubangela abantu babe ziintlaba zahlukane. IWebster’s New Encyclopedic Dictionary ithi, ukunyaniseka kuthetha ‘ukuthembeka kumntu okanye kwinjongo ethile’ yaye “kuthetha ukubambelela entweni nokuba sekumnyam’ entla.” Nangona abantu abaninzi besithi bayaluthanda olu hlobo lokunyaniseka, abantu bayabandezeleka ngenxa yokungabikho kokunyaniseka kweyona ndawo isisiseko—entsatsheni. Inani labantu abaqhawule umtshato laphule izikeyi, nto leyo eye yabangelwa kukufuna ukuzanelisa, amanzithinzithi okuphila, nokwanda kokungathembeki ngokwesini. Yaye njengokuba kunjalo ngamaxhoba ebhombu eyaqhushumba eTel Aviv, ngokufuthi ulutsha luba ngamaxhoba amsulwa.
Enye ingxelo ithi: “Abantwana balahlekelwa ngamathuba okufunda ngenxa yokungazinzi kwentsapho emva koqhawulo-mtshato, ukwahlukana nokukhuliswa ngumzali omnye.” Kubonakala ukuba amakhwenkwe akhuliswa ngumama ongenamyeni ngokukhethekileyo aba sengozini yokulahlekelwa ngamathuba okufunda, asenokuzibulala yaye asenokuba ziinjubaqa. Nyaka ngamnye, abantwana abasisigidi eUnited States bajamelana noqhawulo-mtshato lwabazali babo, yaye minyaka le, isiqingatha sabo bonke abantwana abazalwa ngabazali abatshatileyo kwelo lizwe kusenokwenzeka ukuba baya kuba ngamaxhoba oqhawulo-mtshato xa befikelela kwiminyaka eli-18 ubudala. Amanani abonisa ukuba le meko iyafana nakwabanye abantu abaselula abaninzi abakwamanye amazwe.
Ukunyaniseka—Ngaba Kuyinto Enzima?
Ukunganyaniseki okwandayo kwezi mini kwenza amazwi kaKumkani uDavide afaneleke nangakumbi xa wathi: “Ndisindise, Yehova, kuba lowo unyanisekileyo ufikelele esiphelweni; kuba abantu abathembekileyo bathe shwaka phakathi koonyana babantu.” (INdumiso 12:1) Kutheni ukunganyaniseki kuxhaphake kangaka? URoger Rosenblatt, kwiphephancwadi iTime wathi: “Nangona ukunyaniseka kuyinto ebalulekileyo, kwande uloyiko, ukungazithembi, ukuxhaphaza nokuba namabhongo.” Ichaza ixesha esiphila kulo, ngokuphandle iBhayibhile ithi: “Abantu baya kuba ngabazithandayo, . . . abanganyanisekanga, abangenawo umsa wemvelo.”—2 Timoti 3:1-5.
Ekubeni ukunyaniseka—okanye ukunganyaniseki—kunempembelelo engamandla kwindlela umntu acinga ngayo nendlela azenza ngayo izinto, sisenokubuza, ‘Sifanele sinyaniseke kubani?’ Funda inqaku elilandelayo ukuze ufumane impendulo.
[Inkcazelo Ngomfanekiso okwiphepha 3]
Photo above: © AFP/CORBIS