Imibuzo Evela Kubafundi
Ngaba kusoloko kunyanzelekile ukuzalisa izifungo ezenziwa kuThixo?
Ngokutsho kweZibhalo, isifungo ngumnqophiso kuThixo wokwenza into ethile, ukwenza umnikelo, ukuqalisa inkonzo okanye into ethile, okanye ukungazenzi izinto ezithile kodwa ezivumelekileyo. IBhayibhile ineengxelo zabantu abenza izifungo zokwenza into ethile kuphela xa uThixo naye enze okuthile. Ngokomzekelo, uHana, unina womprofeti uSamuweli, “wenza isibhambathiso wathi: ‘Owu Yehova wemikhosi, ukuba nakanjani na uthe wayikhangela inkxwaleko yekhobokazana lakho waza okunene wandikhumbula, ungalilibali ikhobokazana lakho uze okunene ulinike ikhobokazana lakho inzala eyinkwenkwe, ndiza kuyinikela kuYehova yonke imihla yobomi bayo, nencakuba ayiyi kufika entlokweni yayo.’” (1 Samuweli 1:11) Kwakhona iBhayibhile ichaza izifungo njengezenziwa ngokuzithandela. Kunyanzeleke kangakanani ukuzalisa izifungo ezenziwa kuThixo?
UKumkani uSolomon kaSirayeli wamandulo uthi: “Xa sukuba ubhambathisa isibhambathiso kuThixo, musa ukuthingaza ukusifezekisa.” Wongezelela esithi: “Oko ukubhambathisileyo, kufezekise. Kulunge ngakumbi ukuba ungabhambathisi kunokuba ubhambathise ungafezekisi.” (INtshumayeli 5:4, 5) UMthetho owanikwa uSirayeli ngoMoses uthi: “Xa uthe wabhambathisa isibhambathiso kuYehova uThixo wakho, uze ungacothi ukusifezekisa, ngokuba uYehova uThixo wakho uya kusifuna kuwe, kuze ngenene oko kube sisono kuwe.” (Duteronomi 23:21) Ngokucacileyo, ukwenza isifungo kuThixo kungumbandela onzulu. Sifanele senziwe ngenjongo efanelekileyo, yaye lowo usenzayo akafanele awathandabuze amandla anawo okuzalisa nasiphi isifungo asenzayo. Kungenjalo, kubhetele ukuba angasenzi kwaukusenza. Noko ke, ngaba kunyanzelekile ukuba zonke izifungo ezenziweyo zizalisekiswe?
Kuthekani ukuba kufuneka ubani azalisekise isifungo ngokwenza oko akufumanisa kamva ukuba kuchasene nokuthanda kukaThixo? Masithi sisifungo esithi ngandlel’ ithile sichaphazele ukuziphatha okubi ngokwesini nonqulo lokwenyaniso? (Duteronomi 23:18) Kakade ke, akunyanzelekanga ukuba ubani azalisekise isifungo esinjalo. Ngaphezu koko, kuMthetho kaMoses, isifungo esenziwe libhinqa sasinokugatywa nguyise okanye indoda yalo.—Numeri 30:3-15.
Kwakhona cinga ngemeko yomntu owenze isifungo kuThixo sokuba uya kuhlala engatshatanga kodwa ngoku ukufumanisa kunzima. Isifungo sakhe simbeka kwimeko anokuvakalelwa kukuba ukusizalisekisa kunokumenza aphule imilinganiselo kaThixo ngokuphathelele ukuziphatha. Ngaba ufanele alwele ukusizalisekisa eso sifungo? Ngaba bekungayi kuba bhetele ukuba azikhusele ekuziphatheni okubi ngokungasizalisekisi isifungo esinjalo kunoko afune inceba kaThixo aze acele uxolo? Nguye kuphela onokugqiba ngalo mbandela. Akakho omnye umntu onokumgqibela.
Kuthekani ukuba ubani wenze isifungo afumanisa kamva ukuba usenze ngokungxama? Ngaba usafanele azabalazele ukusizalisekisa? Kwakungelula kuYafete ukuzalisekisa isifungo awasenza kuThixo, kodwa wenza umzamo wokusizalisekisa. (ABagwebi 11:30-40) Ukuba ubani akasizalisekisi isifungo sakhe kuThixo oko kusenokumbangela “acaphuke” aze awonakalise umsebenzi waloo mntu. (INtshumayeli 5:6) Ukuwuthabatha lula umbandela wokuzalisekisa isifungo kusenokuphumela ekulahlekelweni yinkoliseko kaThixo.
UYesu Kristu wathi: “Ke uEwe makabe nguEwe, uHayi wenu, abe nguHayi; kuba okugqithe koko kuvela kongendawo.” (Mateyu 5:37) UmKristu akafanele axhalabele nje ukuzalisekisa isifungo kuThixo kodwa ufanele anyaniseke kumazwi akhe—kuThixo nakubantu. Kuthekani ukuba uzifumanisa esengxakini kuba enze isivumelwano nomnye umntu esasibonakala sifanelekile ekuqaleni kodwa ngoku esibonakala sibubudenge xa eqwalasela izinto? Akafanele azithabathe lula izinto ezinjalo. Kodwa ngenxa yengxubusho enyanisekileyo, omnye umntu usenokugqiba kwelokuba amkhulule kweso sifungo sakhe.—INdumiso 15:4; IMizekeliso 6:2, 3.
Ngokuphathelele izifungo nazo zonke ezinye izinto, yintoni efanele isixhalabise kakhulu? Masihlale sifuna ukugcina ulwalamano oluhle noYehova uThixo.
[Imifanekiso ekwiphepha 30, 31]
UHana akazange athingaze ukuzalisa isifungo sakhe
[Imifanekiso ekwiphepha 30, 31]
Nangona kwakunzima ukwenjenjalo, uYafete wasizalisekisa isifungo sakhe