Abavakalisi BoBukumkani Bayabalisa

“Ndiyaqala Ukuyiva Ke Le Nto!”

UDOROTA, umlungiseleli wexesha elizeleyo oliNgqina likaYehova ePoland, wayese unyana wakhe oneminyaka eli-14 ubudala kwikliniki yasesikolweni. Xa wayemxilonga, ugqirha ogama linguJanina,a wabuza uDorota ngezinto azenzayo unyana wakhe ekhaya.

UDorota waphendula esithi: “Xa ndingenathuba lokwenjenjalo, unyana wam usilungiselela isidlo sangokuhlwa sonke sobathandathu entsatsheni. Kwakhona ucoca indlu aze alungise izinto ekhaya. Uyathanda ukufunda. Ungumfundi okhutheleyo.”

UJanina wathi: “Kuyamangalisa oko. Ndineminyaka eli-12 ndisebenza apha, le nto undixelela yona ndiyayizibula.”

Ebona ithuba lokunikela ubungqina, uDorota wachaza esithi: “Abazali abaninzi bayasilela ukubaqeqesha kakuhle abantwana babo. Yiloo nto abantwana babo bedla ngokungazihloneli.”

UJanina wabuza: “Ukwazela phi konke oku? Inkoliso yabazali ayinalo nofifi ngezi zinto.”

UDorota waphendula: “Inkcazelo enjalo ivela eBhayibhileni. Ngokomzekelo, ngokutsho kweDuteronomi 6:6-9, simele sizifundise thina kuqala ngaphambi kokufundisa abantwana bethu. Ngaba asifanele siyibethelele ezintliziyweni nasezingqondweni zethu kuqala imilinganiselo esifuna ukuyibethelela ebantwaneni bethu?”

UJanina wathi: “Kuyandimangalisa oko. Undimangalisile!” Wandula ke wabuza uDorota indlela iBhayibhile emncede ngayo ekukhuliseni nasekufundiseni abantwana bakhe.

UDorota wacacisa esithi: “Veki nganye sifundisisa iBhayibhile nabantwana bethu. Sisebenzisa incwadi enomxholo othi Imibuzo Yabantu Abaselula—Iimpendulo Eziluncedo.”b Wandula ke wachaza le ncwadi waza wakhankanya noko ikuquletheyo.

UJanina wathi: “Ndiyaqala ukuyiva ke le nto! Ndingayifumana loo ncwadi?”

Emva kweyure, uDorota wabuya nale ncwadi.

“Khawutsho, uhamba yiphi icawa?” UJanina wabuza, njengoko ehlolisisa le ncwadi.

“Ndingomnye wamaNgqina kaYehova.”

“AmaNgqina kaYehova abaphatha njani abantu bezinye iicawa?”

“Kanye ngale ndlela ndikuphatha ngayo—ngentlonelo,” waphendula njalo uDorota, waza wongezelela esithi: “Kakade ke, sinqwenela ukuba bayazi inyaniso yeBhayibhile.”

UJanina wathi: “Sele ndingenelwe kwangoku.”

Xa wayesele eza kuhamba, uDorota wabongoza uJanina ukuba afunde iBhayibhile. “Iza kukwenza ube nenjongo ebomini ize ikuncede emsebenzini wakho.”

UJanina wavuma esithi: “Undikhuthazile ukuba ndenjenjalo.”

Ngobuchule nangokuzimisela, uDorota waxhakamfula ithuba lokunikela ubungqina ngoxa wayeye kwagqirha.—1 Petros 3:15.

[Imibhalo esemazantsi]