Ukuvavanywa Kokholo EPoland

NGOKUBALISWA NGUJAN FERENC

NDANDILIGATYANA lomfana ngoxa kwakugquba IMfazwe Yehlabathi II. Ndimkhumbula kakuhle utatomncinci owayengomnye wamaNgqina kaYehova. Wayethanda ukusityelela ekhaya aze asifundele iBhayibhile. Abazali bam babengenamdla, kodwa mna nomkhuluwa wam uJózef, nodade wethu uJanina, sasinomdla kakhulu. Kungekudala safuzisela uzahlulelo lwethu kuYehova ngokubhaptizwa. Ndabhaptizwa ndineminyaka eli-14 ubudala.

Bebona indlela ukufundisisa kwethu iBhayibhile okuye kwabuphembelela ngayo ubomi bethu, abazali baqalisa ukuphulaphula. Xa utata wafumanisa ukuba iBhayibhile iyalugweba unqulo lwezithixo, wathi: “Ukuba oku kuthethwa liLizwi likaThixo, abefundisi bebesigcina sisebumnyameni. Nyana, thula yonke imifanekiso eseludongeni uze uyilahle!” Malunga neminyaka emibini kamva, abazali bam babhaptizwa. Bakhonza uYehova ngokuthembeka bade bafa.

Iingxaki Esajamelana Nazo

AmaNgqina kaYehova ajamelana namaxesha anzima emva kwemfazwe. Ngokomzekelo, iofisi eseLodz yagqogqwa liSebe Lezokhuseleko, yaye abo babesebenza apho babanjwa. Kwimpuma yasePoland abanqolobi beNational Armed Forces, bephenjelelwa ngumfundisi othile wamaKatolika, bawahlasela ngolunya amaNgqina kaYehova.a

Kwakhona malunga neli xesha, amagosa angamaKomanisi ayirhoxisa imvume awayesinike yona ngaphambili yokuqhuba iindibano zethu, yaye azama ukuphazamisa iindibano ezazisele ziqhubeka. Sekunjalo, inkcaso enjalo yasenza sazimisela nangakumbi ekushumayeleni ngoBukumkani bukaThixo. Ngowe-1949 kwanikelwa ingxelo yamaNgqina angama-14 000 ePoland.

Kungekudala, ndaba nguvulindlela, umlungiseleli wexesha elizeleyo wamaNgqina kaYehova. Isabelo sam sokuqala sasikwiikhilomitha ezinokuba ngama-300 ukusuka ekhaya. Noko ke, ekuhambeni kwexesha ndamiselwa njengomveleli ohambahambayo kummandla okwimpuma yeLublin, kufuphi nalapho abazali bam babehlala khona.

Ukubanjwa Nokutshutshiswa

NgoJuni 1950, ndabanjwa ndaza ndatyholwa ngamagosa angamaKomanisi ngokuba yintlola yelaseUnited States. Ndafakwa kwisisele esifumileyo. Ebusuku ndandincinwa ligosa lophando. Lathi kum: “Unqulo okulo lihlelo yaye lilutshaba loRhulumente wethu. Iofisi yenu ifunela amaMerika inkcazelo. Sinobungqina boko! Abazalwana bakho sele bekuvumile ukuba baye bahambahamba elizweni baza baqokelela inkcazelo kwizakhiwo zasemkhosini nakwimizi-mveliso.”

Kakade ke, ezi zityholo zazibubuxoki. Sekunjalo, umphathi wamajoni wandicebisa ukuba ndityobele ukuba ndilahla oko wayekubiza ngokuba “yintlangano yakho elihlazo.” Wazama ngokuphindaphindiweyo ukundenza ndityobele. Wade wenza nomgudu wokuba ndibhale phantsi amagama needilesi zawo onke amaNgqina endiwaziyo nendawo apho iimpapasho zethu zisasazwa khona. Imigudu yakhe yaba lilize.

Emva koko, la magosa andibetha ngentonga ndade andabikho zingqondweni. Andule ke, andigalela ngamanzi ukuze ndivuke, emva koko aphinda aqhubeka endincina. Ngobusuku obulandelayo, ndabethwa kanobom ezithendeni. Ndacela uThixo ngokuvakalayo ukuba andiphe amandla okuba ndinyamezele. Ndivakalelwa kukuba wenjenjalo. Kangangonyaka ndandisoloko ndincinwa ngokuthe rhoqo ebusuku.

Ndakhululwa entolongweni ngoAprili 1951, kodwa amaNgqina amaninzi ayesavalelwe. Ndaya kwiNgqina elinembopheleleko ndaza ndacela isabelo esitsha. Landibuza: “Akoyiki ukuphinda ubanjwe?” Ndaphendula ndathi: “Ndizimisele nangakumbi ukusebenza apho kukho imfuneko enkulu khona.” Ndaqhubeka nomsebenzi wam wokuba ngumveleli ohambahambayo, yaye kamva ndacelwa ukuba ndilungelelanise ukushicilela nokusasaza iimpapasho zethu ePoland.

Ngaloo maxesha, sasisebenzisa oomatshini bokushicilela neewax stencil ukuze sikhuphele IMboniselo. Umgangatho wethu wokushicilela wawuphantsi, yaye kwakufuneka sihlawule imali ephakame gqitha ukuthenga iphepha, ngelo xesha elalingqongophele gqitha. Lo msebenzi wokukhuphela wawufanele wenziwe kwiindawo ezifihlakeleyo, njengeshedi, imigangatho yangaphantsi nakumagumbi aseluphahleni. Abo babebhaqwa, babesohlwaywa ngokuvalelwa entolongweni.

Ndikhumbula iqula esasilisebenzisa. Kudonga lwalo, iimitha ezili-11 ngaphantsi komhlaba, kwakukho isivalo esiphumela kwigumbi elincinane apho sasishicilela khona amaphephancwadi. Ukuze sifike apho, kwakufuneka sihliswe ngentambo. Ngenye imini, ndandihliswa kweli qula nge-emela enkulu eyenziwe ngamaplanga xa kwaqhawuka intambo ngesiquphe. Ndawela phantsi ndaza ndaphuka umlenze. Emva kokuhlala esibhedlele, ndabuyela kwakhona ekusebenziseni umatshini wokushicilela.

Malunga neli xesha ndadibana noDanuta, umlungiseleli onenzondelelo onguvulindlela. Ngowe-1956 satshata, yaye kwiminyaka emine elandelayo, sasisebenza kunye kubulungiseleli kumbindi wePoland. Ngowe-1960 sasi nabantwana ababini, yaye sagqiba kwelokuba uDanuta uza kuyiyeka inkonzo yexesha elizeleyo ukuze abanyamekele. Kungekudala emva koko, ndabanjwa kwakhona, yaye ngeli xesha ndafakwa kwisisele esizele ziimpuku. Kwiinyanga ezisixhenxe kamva, ndagwetywa iminyaka emibini entolongweni.

Ukungena Ndiphuma Entolongweni

Kwakukho amabanjwa angaphezu kwangama-300 kwintolongo yaseBydgoszcz, yaye ndathandaza kuYehova ukuba ndabelane ngesigidimi soBukumkani nabantliziyo zinyanisekileyo. Ndathetha nomphathi wentolongo, ndicebisa ukuba ndisebenze njengomchebi weenwele. Ndingalindelanga, wavuma. Kungekudala ndandicheba iindevu neenwele zamabanjwa, yaye ndinikela ubungqina kulawo anomdla.

Kungekudala ibanjwa elalisebenza nam njengomchebi weenwele lasabela kwiincoko zethu. Laqalisa nokwabelana nabanye ngezinto elizifunde eBhayibhileni. Kungekudala, umphathi wentolongo wasiyalela ukuba siyeke ukusasaza oko akubiza ngokuba “yingcamango yabagrogrisi.” Umntu endandicheba naye iinwele wama eqinile. Wacacisa esithi: “Ndandisiba, kodwa ngoku andisebi. Ndandilikhoboka lenicotine, kodwa ndiyekile ukutshaya. Ndifumene injongo ebomini, yaye ndifuna ukuba ngomnye wamaNgqina kaYehova.”

Ukukhululwa kwam entolongweni, ndathunyelwa ePoznan ukuze ndongamele “umzi wokubhaka izonka,” njengoko yayibizwa njalo indawo efihlakeleyo esasishicilela kuyo. Ekupheleni kweminyaka yee-1950, indlela esasishicilela ngayo yaphucuka kakhulu. Safunda indlela yokunciphisa ubukhulu bamaphepha ngobuchule bokufota—ubugcisa obaba luncedo gqitha—nokusebenzisa oomatshini bokushicilela iiRotaprint offset. Ngowe-1960 kwakhona saqalisa ukushicilela nokudibanisa iincwadi.

Kungekudala emva koko, ummelwane wakuxela oko sasikwenza, yaye ndaphinda ndabanjwa. Emva kokuba ndikhululwe ngowe-1962, ndafumana isabelo sokukhonza eSzczecin kwakunye neqela labanye. Kodwa ngaphambi kokuba sihambe, safumana oko sakukholelwa njengolwalathiso oluvela kubazalwana abangamaKristu abanyanisekileyo lokuba kunoko siye eKielce. Noko ke, apho sabanjwa, yaye ndagwetywa omnye unyaka onesiqingatha entolongweni. Sasingcatshwe ngabakhohlisi ababephakathi kwethu. Ekuhambeni kwexesha, bafunyaniswa baza basuswa phakathi kwethu.

Xa ekugqibeleni ndakhululwa entolongweni, ndamiselwa njengomveleli kumsebenzi wethu wokushicilela kuyo yonke iPoland. Ngowe-1974, emva kweminyaka elishumi ndiphepha ukubhaqwa, ndafunyanwa ndaza ndabanjwa eOpole. Kungekudala emva koko ndathunyelwa entolongweni eZabrze. Umphathi wentolongo wandixelela oku: “Umsebenzi kabhishopu wakho uphelile. Ukuba uyaqhubeka udlulisela le ngcamango yakho kwabanye, uya kuvalelwa wedwa.”

Ukushumayela Entolongweni

Kakade ke, umsebenzi wam njengomlungiseleli wawungaphelanga. Enyanisweni, ndaqalisa isifundo seBhayibhile nababini endandibanjwe nabo. Ekugqibeleni, benza inkqubela de ndababhaptiza ebhafini enkulu esentolongweni.

Namanye amabanjwa asabela kwintshumayelo yethu, yaye ngoAprili 1977, sadibana sonke ukuze senze iSikhumbuzo sokufa kukaKristu. (Luka 22:19) Kwiinyanga ezimbini kamva, ngoJuni 1977, ndakhululwa, ndaza andaphinda ndibanjwe.

Ngelo xesha abasemagunyeni babesewunyamezela umsebenzi wethu. Alithandabuzeki elokuba ukutyelelwa ngamalungu eQumrhu Elilawulayo lamaNgqina kaYehova kwasinceda kakhulu. Ngowe-1977, abathathu kubo bathetha nabaveleli, oovulindlela nabantu abaye bangamaNgqina ixesha elide kwizixeko ezahlukahlukeneyo. Kunyaka olandelayo, ababini kubo batyelela kwiOfisi yeMicimbi Yezakwalizwi. Noko ke, umsebenzi wethu wavunyelwa ngowe-1989. Sithethanje, kukho amaNgqina akhutheleyo angama-124 000 ePoland.

Ngenxa yempilo enkenenkene, uDanuta ebengakwazi ukundipheleka kwiminyaka yamva nje, kodwa uyandikhuthaza yaye ufuna ndiqhubeke ndityelela amabandla. Ndiya kuhlala ndinombulelo ngokundinceda andomeleze ebudeni bokuvalelwa entolongweni izihlandlo ezininzi.

Isigqibo endasenzayo kwiminyaka engama-50 eyadlulayo sokuba ndikhonze uYehova uThixo yayisisigqibo esifanelekileyo. Ndiye ndonwaba kakhulu ekumkhonzeni ngentliziyo iphela. Mna nomfazi wam siye sakubona ukunyanisa kwamazwi abhalwe kuIsaya 40:29: “[UYehova] unika odiniweyo amandla; nalowo ungenamandla makhulu umenza aphuphume ukomelela okupheleleyo.”

[Umbhalo osemazantsi]

[Imifanekiso ekwiphepha 29]

Sasisebenzisa oomatshini bokushicilela yaye kamva sasebenzisa umatshini wokushicilela iRotaprint offset ukushicilela iimpapasho zethu

[Imifanekiso ekwiphepha 30]

Mna nomfazi wam, uDanuta