Xa UThixo Engenelela—Sinokulindela Ntoni?
NGENKULUNGWANE yesibhozo ngaphambi kweXesha Eliqhelekileyo, uKumkani uHezekiya wakwaYuda oneminyaka engama-39 ubudala wafumanisa ukuba unesifo esinganyangekiyo. Enxunguphaliswe zezi ndaba, uHezekiya wabongoza uThixo emthandazweni ukuba amphilise. Esebenzisa umprofeti wakhe, uThixo wathi: “Ndiwuvile umthandazo wakho. Ndizibonile iinyembezi zakho. Yabona, ndiya kongezelela kwimihla yakho iminyaka elishumi elinesihlanu.”—Isaya 38:1-5.
Kwakutheni ukuze uThixo angenelele kwesi sihlandlo? Kwiinkulungwane ngaphambilana, uThixo wathembisa uKumkani uDavide olilungisa esithi: ‘Indlu yakho nobukumkani bakho ngokuqinisekileyo buya kuqina ukusa kwixesha elingenammiselo phambi kwakho; netrone yakho kanye iya kumiselwa ngokuqinileyo ukusa kwixesha elingenammiselo.’ Kwakhona uThixo watyhila ukuba uMesiya wayeya kuzalwa kumnombo kaDavide. (2 Samuweli 7:16; INdumiso 89:20, 26-29; Isaya 11:1) Ngexesha lokugula kwakhe, uHezekiya wayengekabi nanyana. Ngenxa yoko, umnombo kaDavide wobukumkani wawusengozini yokuphela. Ukungenelela kukaThixo kwimeko kaHezekiya kwaphumeza injongo ekhethekileyo yokulondoloza umnombo okhokelela kuMesiya.
Ngenjongo yokuzalisekisa izithembiso zakhe, uYehova wangenelela ngenxa yabantu bakhe izihlandlo eziliqela ebudeni bexesha langaphambi kobuKristu. UMoses wathi ngokuphathelele ukukhululwa kwamaSirayeli kubukhoboka baseYiputa: “Kwaba ngenxa yokunithanda kukaYehova, nangenxa yokusigcina kwakhe isifungo awasifungela ookhokho benu, le nto anikhuphe ngesandla esomeleleyo uYehova.”—Duteronomi 7:8.
Ngokufanayo, ngenkulungwane yokuqala, uThixo wangenelela ukuze ahambisele phambili iinjongo zakhe. Ngokomzekelo, kwindlela eya eDamasko, umYuda ogama linguSawule wabona umbono ongummangaliso owawumthintela ukuba angayi kutshutshisa abafundi bakaKristu. Ukuguquka kwale ndoda, eyaba ngumpostile uPawulos, kwaba nendima ebalulekileyo ekusasazweni kweendaba ezilungileyo kwiintlanga.—IZenzo 9:1-16; Roma 11:13.
Ngaba Wayesoloko Engenelela?
Ngaba uThixo wayefanele angenelele okanye wayengenelela kwiimeko ezithile? IZibhalo zibonisa ngokucacileyo ukuba wayengasoloko engenelela. Nangona uThixo wasindisa amaHebhere amathathu aselula ekubulaweni kwiziko lomlilo nomprofeti uDaniyeli emhadini weengonyama, akazange abasindise ekufeni abanye abaprofeti. (2 Kronike 24:20, 21; Daniyeli 3:21-27; 6:16-22; Hebhere 11:37) UPetros wakhululwa ngokungummangaliso kwintolongo awayevalelwe kuyo nguHerode Agrippa I. Sekunjalo, kwalo kumkani ufanayo wabulala umpostile uYakobi, yaye uThixo akazange angenelele ekunqandeni olu lwaphulo-mthetho. (IZenzo 12:1-11) Nangona uThixo wanika abapostile amandla okuphilisa abagulayo kwanokuvusa abafileyo, kodwa akazange alishenxise “iliva enyameni” elalithwaxa umpostile uPawulos, ekusenokwenzeka ukuba yayisisigulo esithile.—2 Korinte 12:7-9; IZenzo 9:32-41; 1 Korinte 12:28.
UThixo akazange abasindise abafundi bakaKristu kwintshutshiso eyayiphenjelelwa nguMlawuli ongumRoma uNero. AmaKristu ayengcungcuthekiswa, atshiswe ephila aze aphoswe kwizilwanyana zasendle. Noko ke, le ntshutshiso ayizange iwamangalise amaKristu okuqala, yaye ngokuqinisekileyo ayizange ilwenze buthathaka ukholo lwawo lokuba uThixo ukho. Ngapha koko, uYesu wayebalumkisile abafundi bakhe ukuba baza kusiwa phambi kweenkundla zamatyala yaye babefanele bakulungele ukubandezeleka kwanokufela ukholo.—Mateyu 10:17-22.
Kanye njengoko wenzayo kwixesha elidluleyo, namhlanje ngokuqinisekileyo uThixo unako ukusindisa abakhonzi bakhe kwiimeko eziyingozi, yaye abo bavakalelwa kukuba baye bakhuselwa nguye abafanele bagxekwe. Noko ke, kunzima ukugqiba ngelithi uThixo wangenelela okanye akazange enjenjalo kwiimeko ezinjalo. Abakhonzi bakaYehova abathembekileyo abaliqela benzakaliswa lugqabhuko-dubulo eToulouse, yaye amawakawaka amaKristu athembekileyo afa kwiinkampu zamaNazi namaKomanisi naphantsi kweemeko ezilusizi yaye uThixo akazange angenelele. Kutheni uThixo engangeneleli ukuze ngokuzenzekelayo abahlangule bonke abo akholiswa ngabo?—Daniyeli 3:17, 18.
‘Ixesha Nesihlo Esingenakubonwa Kwangaphambili’
Intlekele eyehlayo inokuchaphazela nabani na, yaye ayinanto yakwenza nokuthembeka kuThixo. Ebudeni bogqabhuko-dubulo lwaseToulouse, ekwasinda kulo uAlain noLiliane, kwafa abantu abangama-30 kwaza kwenzakala abaninzi, nangona babengenatyala. Ngomlinganiselo omkhulu, amashumi amawaka abantu aba ngamaxhoba olwaphulo-mthetho, ukuqhuba ngokungenankathalo, okanye iimfazwe, yaye uThixo akanakubekwa tyala ngezo ntlekele zibehlelayo. IBhayibhile iyasikhumbuza ukuba wonke umntu ‘wehlelwa lixesha nasisihlo esingenakubonwa kwangaphambili.’—INtshumayeli 9:11.
Okungakumbi, abantu bayagula, baluphale baze bafe. Kwanabo bebecinga ukuba uThixo uye wasindisa ubomi babo ngokungummangaliso okanye abo bathi baye baphiliswa nguye ngokungalindelekanga, baye bafa ekugqibeleni. Ukupheliswa kokugula nokufa ‘nokosulwa kwazo zonke iinyembezi’ emehlweni abantu kuya kwenzeka kwixesha elizayo.—ISityhilelo 21:1-4.
Ukuze oko kwenzeke, kufuneka into engakumbi kunokuba nje uThixo angenelele ngezihlandlo ezithile. IBhayibhile ithetha ngesiganeko esibizwa ngokuba ‘yimini enkulu kaYehova.’ (Zefaniya 1:14) Ebudeni bokungenelela ngomlinganiselo omkhulu, uThixo uya kubushenxisa bonke ubungendawo. Abantu baya kufumana ilungelo lokuphila ngonaphakade kwiimeko ezifezekileyo, apho ‘izinto zangaphambili zingayi kukhunjulwa, zinganyuki zithi qatha entliziyweni.’ (Isaya 65:17) Kwanabafileyo baya kuvuswa, ngaloo ndlela kupheliswa owona monakalo mkhulu owakha wenzeka kwimbali yabantu. (Yohane 5:28, 29) Ngothando nangobulungisa bakhe obungunaphakade uya kwandula ke uThixo aphelise zonke iingxaki zabantu ngokupheleleyo.
Indlela UThixo Angenelela Ngayo Namhlanje
Noko ke, oku akuthethi ukuba okwangoku uThixo akakukhathalele ukugcuma kwendalo. Namhlanje, uThixo unika bonke abantu ithuba lokumazi nokuba nolwalamano kunye naye, kungakhathaliseki ukuba ngabaluphi na uhlanga okanye imvelaphi. (1 Timoti 2:3, 4) UYesu wachaza le nkqubo ngala mazwi: “Akukho mntu unako ukuza kum ngaphandle kokuba uBawo, owandithumayo, amtsale.” (Yohane 6:44) UThixo utsala abantu abantliziyo zinyanisekileyo ngesigidimi soBukumkani esivakaliswa ngabakhonzi bakhe ehlabathini lonke.
Ukongezelela, uThixo uphembelela ngokungqalileyo ubomi babo bafuna ukukhokelwa nguye. Ngomoya wakhe oyingcwele, uThixo ‘uvula iintliziyo zabo’ ukuze baqonde ukuthanda kwakhe baze benze oko akufunayo. (IZenzo 16:14) Ewe, ngokusinika ithuba lokwazi yena, iLizwi lakhe neenjongo zakhe, uThixo ubonisa uthando nomdla anawo kuthi.—Yohane 17:3.
Okokugqibela, uThixo unceda abakhonzi bakhe namhlanje, kungekhona ngokubasindisa ngokungummangaliso, kodwa ngokubanika umoya wakhe oyingcwele ‘namandla angaphaya koko kuqhelekileyo’ ukuze bahlangabezane nayo nayiphi na imeko abanokujamelana nayo. (2 Korinte 4:7) Umpostile uPawulos wabhala wathi: “Ezintweni zonke ndinamandla ngenxa yalowo undomelezayo [uYehova uThixo].”—Filipi 4:13.
Ngenxa yoko sinezizathu zokuba nombulelo kuThixo suku ngalunye ngenxa yobomi nethemba asinika lona lokuphila ngonaphakade kwihlabathi elingenako konke konke ukubandezeleka. Umdumisi wabuza: “Ndiya kumbuyekeza ngantoni na uYehova ngalo lonke uncedo lwakhe kum? Ndiya kuthabatha indebe yosindiso olukhulu, ndiya kubiza egameni likaYehova.” (INdumiso 116:12, 13) Ukulifunda rhoqo eli phephancwadi kuya kukunceda ukuba uqonde into uThixo ayenzileyo, ayenzayo naseza kuyenza ukuze ufumane ulonwabo ngoku nethemba eliqinileyo lekamva.—1 Timoti 4:8.
[Amagama acatshulweyo akwiphepha 6]
“Izinto zangaphambili aziyi kukhunjulwa, zinganyuki zithi qatha entliziyweni.”—Isaya 65:17
[Imifanekiso ekwiphepha 5]
Kumaxesha okubhalwa kweBhayibhile, uYehova akazange akuthintele ukuxulutywa ngamatye kukaZekariya . . .
engazange akunqande nokubulawa kwabantu abamsulwa nguHerode
[Umfanekiso okwiphepha 7]
Lisondele ixesha laxa kungayi kuphinda kubekho ukubandezeleka; kwanabafileyo beya kuphila kwakhona