Ngaba Ukho Umntu Onokuthenjwa?
EMVA kokuwa koDonga lwaseBerlin ngowe-1989, kwatyhilwa intaphane yezinto ezazisenziwa emfihlakalweni. Ngokomzekelo, uLydiaa wafumanisa ukuba xa kwakulawula ubuSoshiyali eMpuma Jamani, amaStasi okanye iSebe Lezokhuselo likaRhulumente lalinoxwebhu oluneenkcukacha zezinto awayezenza ngasese. Nangona uLydia wamangaliswayo kukuva oko, wothuka gqitha kukuva ukuba ngubani owanikela loo nkcazelo kumaStasi—yayingumyeni wakhe. Wayengcatshwa ngumntu awayemthembe gqitha.
IThe Times yaseLondon ithi uRobert wayelinene elikhulileyo “elalimhlonela gqitha, limxabisile yaye limthembile ugqirha walo.” Loo gqirha kuthiwa “wayenobubele novelwano.” Kusenjalo uRobert wafa ngequbuliso. Ngaba wabulawa sisifo sentliziyo okanye istroke? Akunjalo. Abasemagunyeni bathi loo gqirha watyelela uRobert kwikhaya lakhe, yaye bengazi uRobert nentsapho yakhe wamfaka inaliti eneyeza elibulalayo. Kuyacaca ukuba uRobert wabulawa ngumntu amthembileyo.
ULydia noRobert baphoxwa ngabantu ababathembileyo, yaye yaba buhlungu imiphumo yoko. Kwezinye iimeko imiphumo ayidli ngokuba buhlungu kangako. Sekunjalo, ixhaphakile into yokuphoxwa ngabantu esibathembileyo. Ingxelo eyapapashwa liziko lohlolisiso eliphambili eJamani, iAllensbacher Jahrbuch der Demoskopie 1998-2002, yabonisa ukuba kolunye uhlolisiso yaba ngabantu abangama-86 ekhulwini abakhe baphoxwa ngumntu othile ababemthembile. Kunokwenzeka ukuba nawe ukhe wehlelwa koku. Ngoko ke, asimele sothuswe yingxelo eyakhutshwa liphephandaba laseSwitzerland iNeue Zürcher Zeitung ngowama-2002 lisithi “sekuqengqeleke amashumi eminyaka bengasathembani abantu kumazwe afumileyo aseNtshona.”
Kuthabatha Ixesha Ukuthemba Umntu, Kodwa Kunokuphela Ngomzuzu
Kuthetha ukuthini ukuthemba abanye? Esinye isichazi-magama, sithi ukuthemba abanye kuthetha “ukukholelwa ukuba banyanisekile yaye abayi kwenza nantoni na eza kukwenzakalisa ngabom.” Kuthabatha ixesha ukuthemba umntu, kodwa kunokuphela ngomzuzu. Ekubeni bebaninzi kangaka abantu abaye baphoxwa ngabo babathembileyo, ngaba iyamangalisa into yokuba abantu bemadolw’ anzima ukuthemba abanye? Ngokutsho kohlolisiso olwapapashwa eJamani ngowama-2002, “kulutsha lwalapho phantse ibe ngumntu om-1 kwaba-3 onabantu abathembayo.”
Sisenokuzibuza oku: ‘Ngaba ukho umntu esinokumthemba? Ngaba kuluncedo ukuthemba umntu ngoxa esenokusiphoxa?’
[Umbhalo osemazantsi]
a Asingomagama abo la.
[Amagama acatshulweyo akwiphepha 3]
Olunye uhlolisiso lwabonisa ukuba ngabantu abangama-86 ekhulwini abakhe baphoxwa ngumntu othile ababemthembile